ᕈᒪᓇ 7
7
ᐎᒋᒥᑐᐅᓐ ᑭᔭ ᐎᓱᐛᐅᓐ
1ᒋᔨᐛᐤ ᓂᐧᑲᓂᓯᑐᒄ, ᓂ ᒐᔅᑎᓇᐅᓐ ᒐ ᓂᔅᑐᑎᒪᒄ ᑕᓐ ᒐ ᐃᓯ ᐛᐎᑎᒪᑎᑯᒡ ᐛᔅ ᒋ ᒋᔅᒐᔨᑕᓇᐛᐤ ᐎᓱᐛᐅᓇ᙮ ᒋ ᒋᔅᒐᔨᑕᓇᐛᒐ ᒥᒄ ᒐ ᐃᔅᐱᔅ ᐱᒪᑎᓯᒂ ᐊᐛᓐ ᐅᑕ ᐊᔅᒋᒡ ᐎᓱᐛᐅᓇ ᒋᑭ ᑎᐸᔨᒥᑯᐤ᙮ 2ᒧᔭᒻ ᐃᔎᐤ ᑕᓐ ᐊ ᐃᓯᓇᑯᓯᑦ, ᐃᑎᔅᑕᔪᐤ ᐎᓱᐛᐅᓂᒡ ᒐ ᐊᑲ ᒋ ᓂᑭᑕᑦ ᐅᓇᐸᒪ ᐊᔅᒄ ᐊ ᐱᒪᑎᓯᔨᒋ᙮ ᒧᔭᒻ ᒪᒃ ᐳᓂᐱᒪᑎᓯᒐᓂ ᐊᓂᔭ ᐅᓇᐸᒪ ᐊᑯ ᑭᑈ ᓇᒪ ᐊᑯ ᒋᑭ ᒪᒪᒋᒂᐱᐧᑲᑎᑯᐤ ᐊᓂᔭ ᐎᓱᐛᐅᓂᔪᐤ᙮ 3ᐅ ᒪᒃ ᑕᓐ ᐊ ᐃᔅᒋᔄᒥᑲᒡ ᐅ ᐎᓱᐛᐅᓐ ᐅᐱᓯᒂᑎᓯᔎᐤ ᒋᑭ ᐃᓯᓂᐧᑲᑕᑭᓄᐤ ᐃᔎᐤ ᑯᑎᑲ ᓇᐸᐛ ᐎᒋᒪᒐ ᐊᔅᒄ ᐊ ᐱᒪᑎᓯᔨᒋ ᐅᓇᐸᒪ᙮ ᓂᐱᒐᓂ ᒪᒃ ᐅᓇᐸᒪ ᐃᔎᐤ ᓇᒪ ᐊᑯ ᒋᑭ ᐅᒋ ᐊᐱᑎᓂᔪᐤ ᐊᓂᔭ ᓂᐳᐅᐤ ᐎᓱᐛᐅᓂᔪᐤ ᑭᔭ ᓇᒪ ᒋᑭ ᐅᒋ ᐱᓯᒂᑎᓯᐤ ᐊᑎ ᑯᑎᑲ ᓇᐸᐛ ᐎᒋᒪᒐ᙮
4ᐊᐅᑯᓐ ᒪᒃ ᒧᔭᒻ ᐊ ᐃᓯᓇᒂᒡ ᑕᓐ ᑲ ᐃᑐᑎᒪᑯᐅᔭᒄ, ᓂᐧᑲᓂᓯᑐᒄ᙮ ᐛᔅ ᒧᔭᒻ ᐊᒋ ᐊᓯᒡ ᒋᔅᑕᔎᐅᑯᐃᔭᒄ ᒋᓴᔅ ᑲ ᓂᐸᐊᑭᓄᐅᑦ ᐊᐅᒄ ᐊ ᐃᓯᓇᒂᒡ᙮ ᐊᑯᑕ ᒪᒃ ᐛᒋ ᐃᓯᓇᒂᒡ ᑯᑎᒃ ᐊᐛᓐ ᐊᑯ ᐊ ᑎᐸᔨᒥᑕᒄ, ᐊᐅᒄ ᒋᓴᔅ᙮ ᐛᔅ ᒋ ᐃᑐᑕᑯᐤ ᒋᓴᒪᓂᑐᐛ ᑲᐤ ᒐᒋ ᐱᒪᑎᓯᑦ ᐊᑎ ᐊᒋ ᓂᐱᑦ ᒐᒋ ᐅᒋ ᒥᔪ ᐊᐱᒋᐃᑕᒄ ᒋᓴᒪᓂᑐᐤ᙮ 5ᐛᔅ ᐊᔅᒄ ᐛᔅᑭᒡ ᒋᑦ ᐃᑕᑎᓯᐅᓄᐛ ᐊᒋ ᑎᐸᔨᒥᑯᔭᐧᒄ, ᐊᓐ ᒪᒃ ᐊ ᑎᒂᒡ ᐎᓱᐛᐅᓐ ᑭᔭ ᐊᒋ ᒋᔅᒐᔨᑎᒪᐧᒄ ᐊᓐ ᐎᓱᐛᐅᓐ, ᐊᑯᑕ ᑲ ᐅᒋᐱᔨᒡ ᐊᓐ ᐊ ᒧᔅᒋᐱᔨᒡ ᒐᒋ ᒥᒋᑐᑎᒪᐧᒄ᙮ ᐅ ᒪᒃ ᐊᒋ ᐃᓯ ᐱᒪᑎᓯᔭᐧᒄ ᒧᔭᒻ ᐊ ᓂᐱᔭᐧᒄ ᔅᒋ ᐃᓯᓇᑯᓯᓇᓄᐤ᙮ 6ᐊᓄᒡ ᒪᒃ ᓴᔅ ᔅᒋ ᐎᐧᑯᒋᐃᑯᓇᓄᐤ ᑕᓐ ᑲ ᐃᓯ ᒪᒋᒂᐱᐧᑲᑎᑯᔭᐧᒄ ᐎᓱᐛᐅᓐ, ᐛᔅ ᒋᒋᐛ ᔅᒋ ᓂᑭᑕᓇᓄᐤ ᐊᓐ ᐃᑕᑎᓯᐅᓐ ᓇᔅᒡ ᑲᒋ ᑎᐸᔨᒥᑯᔭᐧᒄ᙮ ᓇᒪ ᐊᑯ ᐊᓐ ᐛᔅᑭᒡ ᐎᓱᐛᐅᓐ ᒋ ᓂᓇᐃᑕᓇᓄᐤ᙮ ᒋᓴᒪᓂᑐᐤ ᐊᐅᒄ ᓂᓇᐃᑐᐛᐧᒄ ᐊᑯ, ᑲ ᐸᔭᒋᓯᑦ ᐊᒐᐧᒄ ᐊ ᐎᒋᐃᑕᐧᒄ᙮
ᐎᓱᐛᐅᓐ ᑭᔭ ᒥᒋᑥᐅᓐ
7ᐊ ᐃᔅᒋᔄᑦ ᐊᓐ ᐊᐛᓐ, ᒪᔭᑎᓄᒐ ᐊᓐ ᐎᓱᐛᐅᓐ ᐛᔅ ᐊᑯᑕ ᑲ ᐅᒋᐱᔨᒡ ᐊᓐ ᒐᒋ ᒥᒋᑐᑎᒪᓐ᙮ ᒪᐅ ᓂᐸ ᐃᓯ ᐎᑎᒧᐊᐤ ᐅ ᐊᐛᓐ, ᑕᐸ ᓇᒪᔭᐤ ᐊᓐ ᐎᓱᐛᐅᓐ ᑲ ᐃᑐᑕᑯᔭᓐ ᒐᒋ ᒥᒋᑐᑎᒪᓐ᙮ ᒥᒄ ᒪᒃ ᐊᑯᑕ ᑲ ᐅᒋ ᒋᔅᒐᔨᑎᒪᓐ ᑕᑈ ᐊ ᒥᒋᑐᑎᒪᓐ ᐊᓐᑕ ᐅᒋ ᑕᓐ ᐊ ᐃᑎᓱᐛᒥᑲᒡ ᐊᓐ ᐎᓱᐛᐅᓐ᙮ ᒧᔭᒻ ᐊᓐᑕ ᐊᓐ ᑲ ᐃᑎᔅᑕᒡ, “ᐊᑲᐎᔾ ᒥᒋ ᒧᔅᑕᓇᒪᒐ,” ᐊᑯᑕ ᑲ ᐅᒋ ᒋᔅᒐᔨᑎᒪᓐ ᐊ ᒥᒋᑐᑎᒪᓐ ᐊ ᒥᒋ ᒧᔅᑕᓇᒪᒐᔭᓐ᙮ 8ᐊᓐᑕ ᒪᒃ ᐊᓐ ᑲ ᐃᑎᔅᑕᒡ ᐎᓱᐛᐅᓂᒡ ᒐ ᐊᑲ ᒋ ᒥᒋ ᒧᔅᑕᓇᒪᒐᑦ ᐊᐛᓐ ᐊᑯᑕ ᑲ ᐅᒋᐱᔨᒡ ᐊᓐ ᓂᓇᐧᑯᐤ ᒐᒋ ᐃᓯ ᒥᒋ ᒧᔅᑕᓇᒪᒐᔭᓐ᙮ ᓇᒪ ᒋᐸ ᐅᒋ ᒋᔅᒐᔨᑎᒻ ᐊᐛᓐ ᐊ ᒥᒋᑐᑕᐧᒃ ᐊᑲ ᐅᒋ ᑎᑯᓂᔪᐛᑯᐱᓇᓂ ᐎᓱᐛᐅᓇ᙮ 9ᐅᑕᒡ ᓂᒋ ᐃᓯ ᐱᒪᑎᓯᓐ ᐊᑲ ᒋᔅᒐᔨᑎᒪᓐ ᑕᓐ ᐊ ᐃᑎᓱᐛᒥᑲᒡ ᐎᓱᐛᐅᓐ᙮ ᐃᔅᐱ ᒪᒃ ᑲ ᒋᔅᒐᔨᑎᒪᓐ ᐃᑎᓱᐛᐅᓐ ᑕᓐ ᐊᔅᒋᔄᒥᑲᒡ, ᐊᑯᑕ ᑲ ᐅᒋ ᒋᔅᒐᔨᑎᒪᓐ ᐊ ᒥᒐᑎᓯᔭᓐ ᑭᔭ ᒧᔭᒻ ᐊ ᓂᐱᔭᓐ ᐊ ᐃᓯᓇᑯᓯᔭᓐ᙮ 10ᐊᑯ ᐊᓐ ᐎᓱᐛᐅᓐ ᑲ ᒥᔨᐛᓄᐅᒡ ᐊᓐᑕ ᒐᒋ ᐅᒋ ᐱᒪᑎᓯᔅᑐᐅᐧᒄ ᒋᓴᒪᓂᑐᐤ, ᐊᑯᑕ ᑲ ᐅᒋ ᒋᔅᒐᔨᑎᒪᓐ ᐊ ᓂᐱᔭᓐ᙮ 11ᒋᓴᒪᓂᑐᐤ ᐅᑦ ᐃᑎᓱᐛᐅᓂᒡ ᒋ ᐅᒋ ᓇᐃᐱᔨᐃᓱᒥᑭᓐ ᒥᒋᑥᐅᓐ ᒐᒋ ᐎᔭᓯᒥᑯᔭᓐ᙮ ᐊᐅᒄ ᒪᒃ ᐅ ᒥᒋᑥᐅᓐ ᑲ ᓂᐸᐃᑯᔭᓐ᙮
12ᐊᑯᑕ ᒪᒃ ᐛᒋ ᐛᐸᑎᒪᓐ ᐊ ᐸᔭᐧᑲᒡ ᐎᓱᐛᐅᓐ᙮ ᑭᔭ ᒥᓯᐛ ᑕᓐ ᐊᑎᓱᐛᒥᑲᒋ ᐊᓂᔭᔪᐛ ᑭᔅᒐᔎᐅᓇ ᐊᓐᑕ ᐎᓱᐛᐅᓂᒡ ᐸᔭᒋᓯᒥᑭᓇ, ᑕᑈᒥᑭᓇ, ᑭᔭ ᒥᔽᐛ᙮
13ᐊᐅ ᐊ ᒪᒃ ᐊ ᐃᓯᓇᒂᒡ ᐊᓐ ᑲ ᒥᔽᓯᒡ ᓂᐳᐅᓂᒡ ᒐᒋ ᐃᑐᑕᐃᑯᔭᓐ ? ᓇᒪᐎᔾ ᑭᑈ᙮ ᒥᒋᑥᐅᓐ ᐊᐅᒄ ᓂᐳᐅᓂᒡ ᑲ ᐃᑐᑕᐃᑯᔭᓐ᙮ ᐊᓐ ᒐᒂᓐ ᐊ ᒥᔽᓯᒡ ᐊᑯᑕ ᑲ ᐅᒋᐱᔪᐅᒥᑲᒡ ᒥᒋᑥᐅᓐ ᓂᐳᐅᓂᒡ ᒐᒋ ᐃᑐᑕᐃᑯᔭᓐ᙮ ᐊᑯᑕ ᒪᒃ ᑲ ᐅᒋ ᓄᑯᑕᑭᓄᐅᒡ ᑕᓐ ᐊᓐ ᐊ ᐃᑕᔨᑕᒂᒡ ᒥᒋᑥᐅᓐ᙮ ᐎᓱᐛᐅᓂᒡ ᐊᑯᑕ ᑲ ᐅᒋ ᓄᑯᑕᑭᓄᐅᒡ ᑕᓐ ᐊᔅᐱᔅ ᐊᑐᐎᔅ ᒪᔭᑎᒡ ᒥᒋᑥᐅᓐ᙮
ᑕᓐ ᐊ ᐃᓯ ᒪᓯᒐᐱᔨᒡ ᐊᐛᓐ ᐊ ᑕᑦ
14vvᑉ ᒋ ᒋᔅᒐᔨᑕᓇᓄᐤ ᒋᓴᒪᓂᑐᐤ ᐅᑦ ᐊᒐᒂ ᐊ ᑕᔨᒋ ᐊᒋ ᐅᒋᐱᔨᒡ ᐅ ᐎᓱᐛᐅᓐ᙮ ᓂᔾ ᐎ, ᓂ ᐎᔭᓱᐤ ᐱᒪᑎᓯᓐ ᓂᔾ᙮ ᒧᔭᒻ ᐊᐛᓐ ᑲ ᐅᑦ ᐊᐱᒋᐊᑭᓂᑐᑐᐛᑭᓄᐅᑦ ᐊᐅᑯᓐ ᐊ ᐃᑐᑕᑯᔭᓐ ᒥᒋᑥᐅᓐ᙮
Romans 7.15-25 (Proper-9 Year A)
15ᓇᒪ ᓂ ᓂᔅᑐᑕᓐ ᒐᒂᓐ ᐛᒋ ᐃᑐᑎᒪᓐ ᒐᒂᓐ ᐊ ᐃᑐᑎᒪᓐ᙮ ᓴᔅ ᓇᒪ ᓂᑦ ᐃᑐᑕᓐ ᐊᓐ ᑲ ᐎ ᐃᑐᑎᒪᓐ, ᐃᔭᐱᒡ ᐊᓐ ᐊᑲ ᒥᔽᔨᑎᒪᓐ ᐊᐅᑯᓐ ᐊᓐ ᐊ ᐃᑐᑎᒪᓐ᙮ 16ᒧᔭᒻ ᐊ ᐃᑐᑎᒧᐛᓇ ᐊᓐ ᐊᑲ ᐛ ᐃᑐᑎᒪᓐ ᐊᑯᑕ ᐛᒋ ᓄᒂᒡ ᐊ ᑕᑈᑎᒪᓐ ᐊ ᒥᔽᓯᒡ ᐎᓱᐛᐅᓐ᙮ 17ᓇᒪᔭᐤ ᒪᒃ ᑕᑈ ᓂᔾ ᑲ ᐃᑐᑎᒪᓐ ᐊᓐ ᐊᑲ ᒥᔽᔨᑎᒪᓐ ᐊ ᐃᑐᑎᒪᓐ᙮ ᐊᐅᒄ ᐊᓐ ᒥᒋᑥᐅᓐ ᐅᑕ ᐊ ᑕᔭᓐ ᑲ ᑎᒂᒡ ᑲ ᐃᑐᑕᑯᔭᓐ᙮ 18ᓂ ᒋᔅᒐᔨᑕᓐ ᐊᑲ ᓇᔅᒡ ᒋ ᒥᔪᑐᑎᒪᓐ ᓂᔾ ᑎᐱᔨᐛ ᐊ ᐎ ᒥᔪᑐᑎᒪᓐ, ᐅᑕ ᑭᑈ ᓇᒪ ᐅᒡ ᓂᐱᒪᑎᓯᐅᓂᒡ᙮ ᐊᑎ ᐊ ᑎᒂᒡ ᐊ ᐎ ᒥᔪᑐᑎᒪᓐ ᓇᒪ ᐃᔭᐱᒡ ᓂᒋ ᒥᔪᑐᑕᓐ᙮ 19ᐛᔅ ᑕᐸ ᓂᑦ ᐃᑐᑕᓐ ᐊᓐ ᐛ ᐃᓯ ᒥᔪᑐᑎᒪᓐ᙮ ᐊᓐ ᑲ ᒪᔭᑎᒡ ᐊᑲ ᐎ ᐃᑐᑎᒪᓐ ᐊᐅᑯᓐ ᐊ ᐊᑎ ᐃᑐᑎᒪᓐ᙮ 20ᒧᔭᒻ ᒪᒃ ᐊ ᐃᑐᑎᒪᓐ ᐊᓐ ᐊᑲ ᐎ ᐃᑐᑎᒪᓐ, ᓇᒪᔭᐤ ᓂᔾ ᑲ ᐃᑐᑎᒪᓐ ᐊᓐ᙮ ᐊᓐ ᒥᒋᑥᐅᓐ ᐅᑕ ᐊ ᑕᔭᓐ ᑲ ᑎᒂᒡ ᐊᐅᑯᓐ ᐊᓐ ᑲ ᐃᑐᑕᑯᔭᓐ ᐅ ᒐᒋ ᐃᑎᔭᓐ᙮
21ᒪᐅ ᒪᒃ ᐊ ᐃᓯ ᐛᐸᑎᒪᓐ ᒧᔅ ᐊ ᐃᔅᐱᔨᔭᓐ᙮ ᐊᑎ ᐛ ᒥᔪᑐᑎᒪᓂ ᔭᐃᑕᔾ ᒧᔅ ᐊᔅᒋᐱᔪᐤ ᐊ ᐎ ᒥᒋᑐᑎᒪᓐ᙮ 22ᐅᑕ ᐱᒡ ᐊ ᑕᔭᓐ ᓇᔅᒡ ᓂ ᒥᔽᔨᑎᒥᐃᑯᐛᓐ ᒋᓴᒪᓂᑐᐤ ᐅᐎᓱᐛᐅᓐ᙮ 23ᐊᑯ ᒥᒄ ᒪᐅ ᐊ ᐃᓯ ᐛᐸᑎᒪᓐ ᒧᔅ ᐊ ᐎ ᐃᔅᐱᔨᔭᓐ᙮ ᑎᑯᓐ ᐊ ᐃᓯ ᒪᓯᒐᐱᔨᒡ ᐅᑕ ᐊ ᑕᔭᓐ, ᐊᓐ ᐊ ᐎ ᒥᔪᑐᑎᒪᓐ ᑭᔭ ᐊᓐ ᐊ ᐎ ᒥᒋᑐᑎᒪᓐ ᒪᓯᒐᐱᔨᐛ᙮ ᐊᓐ ᒪᒃ ᒧᔅ ᐊ ᑎᒂᒡ ᐊ ᐎ ᒥᒋᑐᑎᒪᓐ ᐊᐅᒄ ᑕᐸᔨᒥᑯᔭᓐ᙮ 24ᑕᑈ ᑭᑈ ᓂ ᐅᔅᑕᐱᔨᓐ ! ᐊᐛᓐ ᒪᒃ ᒐ ᐸᒋ ᐎᐧᑯᒋᐃᑦ ᐅᑕ ᐅᔭ ᒥᔭᔪᐤ ᒐ ᓂᐱᒥᑭᓂᔨᒡ ? 25ᓂᓇᔅᑯᒪᑕᐤ ᒋᓴᒪᓂᑐᐤ ᐊᓐ ᐛᒋᐃᑕᐧᒄ ᒋᓴᔅ ᙭ ᐅᒡ !
ᒪᐅ ᐊ ᐃᔅᐱᔨᔭᓐ᙮ ᓂᔾ ᐅᑕ ᑎᐱᔨᐛ ᐊ ᑕᔭᓐ ᓂ ᒥᔽᔨᑎᒥᐃᑯᐛᓐ ᒋᓴᒪᓂᑐᐤ ᐅᐎᓱᐛᐅᓐ ᑭᔭ ᓂ ᐎ ᓂᓇᐃᑎᒺᓐ᙮ ᒥᒄ ᒪᒃ ᐊᓐᑕ ᑕᓐ ᐊ ᐃᓯ ᐱᒪᑎᓯᔭᓐ ᑎᑯᓐ ᐊ ᐃᓯ ᐅᑦ ᐊᐱᒋᐊᑭᓂᑐᑕᑯᔭᓐ ᒥᒋᑥᐅᓐ᙮
Currently Selected:
ᕈᒪᓇ 7: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
