ᐊᑈᔅᑕᓇᒡ 13
13
ᐸᕐᓇᐸᔅ ᑭᔭ ᓴᓪ ᑲ ᒋᑎᓴᐛᑭᓄᐎᒡ ᒐᒋ ᐊᑐᔅᑯᐛᒡ ᒋᓴᒪᓂᑐᐛ
1ᐊᓐᑕ ᒪᒃ ᐊᓐᑎᔭᑭᒡ ᑲ ᑕᒡ ᒪᒧᐤ ᑲ ᐊᔭᒥᐊᐛᑎᓯᒡ ᒋ ᑕᐅᒡ ᐊᓐᑕ ᐅᒋᔅᒋᐛᐃᒐᓱᒡ ᑭᔭ ᑲ ᒋᔅᑯᑎᒪᒐᒡ᙮ ᐊᐅᑯᓐᒡ ᐅᒡ, ᐸᕐᓇᐸᔅ ᑭᔭ ᓯᒥᐅᓐ ᐱᓐᑐᒄ ᑲ ᐃᓯᓂᐧᑲᑕᑭᓄᐅᑦ ᑭᔭ ᓗᓯᔭᔅ, ᓴᐃᕆᓐ ᑲ ᐅᒋᑦ, ᑭᔭ ᒪᓇᐃᓐ ᐊᓐ ᑲ ᐊᓯᒡ ᓂᑕᐅᒋᓇᑭᓄᐅᑦ ᒋᓴᐅᒋᒪᐛ ᐊᕈᑕ ᑲ ᓂᑕᐅᒋᓇᑭᓄᔨᒋ ᑭᔭ ᓴᓪ᙮ 2ᒪᒂᒡ ᒪᒃ ᐊᓐᑕ ᐊ ᐊᑲ ᒥᒋᓱᒡ ᒥᒄ ᐊ ᒪᒧᐤ ᐊᔭᒥᐊᔅᑐᐛᒡ ᒋᓴᒪᓂᑐᐛ, ᐊᑯᑕ ᑲ ᐃᔨᒥᐃᑯᒡ ᑲ ᐸᔭᒋᓯᔨᒋ ᐊᒐᒂ ᐊ ᐃᑎᑯᒡ, “ᐸᒋ ᑎᐸᓇᐊᐧᑯᒡ ᐸᕐᓇᐸᔅ ᑭᔭ ᓴᓪ ᐛᔅ ᓂᒋ ᐎᔭᔨᒪᐅᒡ ᒐᒋ ᐃᑐᑎᒧᐅᒡ ᐊᑐᔅᒐᐅᓂᔪᐤ᙮”
3ᐃᔅᐱ ᒪᒃ ᑲ ᒋᔅᑕᒡ ᐊᓂᔭ ᐊ ᐃᑎᒡ ᐊ ᐊᑲ ᒥᒋᓱᒡ ᑭᔭ ᒥᒄ ᐊ ᐊᔭᒥᐊᒡ, ᐊᑯ ᒂ ᑕᒋᓇᒡ ᐊ ᐊᔭᒥᐊᔅᑎᒧᐛᒡ ᐊᓂᔭ ᐸᕐᓇᐸᓴ ᑭᔭ ᓴᓚ, ᐊᑯ ᑲ ᒋᑎᓴᐛᒡ᙮
ᓴᐃᐳᕋᔅ ᑲ ᐃᓯᓂᐧᑲᑕᔨᒡ ᒥᓂᔅᑎᑯᔪᐤ ᑲ ᐃᑐᑕᒡ ᐸᕐᓇᐸᔅ ᑭᔭ ᑈᓪ
4ᑲ ᐸᔭᒋᓯᔨᒋ ᐊᒐᒂ ᒪᒃ ᐊᒋ ᒋᑎᓴᐅᑯᒡ ᐸᕐᓇᐸᔅ ᑭᔭ ᓴᓪ ᐊᓐᑕ ᐅᑕᓇᔪᐤ ᓴᓗᓯᔭ ᑲ ᐃᓯᓂᐧᑲᑕᔨᒡ ᐊᑯᑕ ᐊᓐᑕ ᑲ ᐅᒋ ᐳᓯᒡ ᐊᓐᑕ ᒥᓂᔅᑎᑯᒡ ᓴᐃᐳᕋᔅ ᑲ ᐃᓯᓂᐧᑲᑕᔨᒡ ᐊᑯᑕ ᑲ ᐃᔅᒋᒪᒡ᙮ 5ᐃᔅᐱ ᒪᒃ ᒪᓯᑲᒡ ᐊᓐᑕ ᐅᑕᓇᒡ ᓴᓚᒥᔅ ᑲ ᐃᓯᓂᐧᑲᑕᔨᒡ, ᒋ ᐛᐎᑎᒧᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᐊᓐᑕ ᒍᐤ ᐃᔪᐛ ᐅᑦ ᐊᔭᒥᐊᐅᒋᐛᐱᔨᒡ᙮ ᒋ ᐎᒐᐅᑯᐅᒡ ᒪᒃ ᒠᓐ-ᒪᕐᑲ ᒐᒋ ᐎᒋᐃᑯᒡ᙮
6ᐃᔅᐱᔅ ᑲᒋ ᐃᓯ ᑭᒐᔅᒋᒧᒡ ᐊᓐᑕ ᒥᓂᔅᑎᑯᒡ ᐊᑯ ᐊᓐᑕ ᐊᓂᔭ ᐅᑕᓇᔪᐤ ᐸᐳᔅ ᑲ ᐃᓯᓂᐧᑲᑕᔨᒡ ᒂ ᐃᑐᑕᒡ᙮ ᐊᑯᑕ ᒪᒃ ᐊᓐᑕ ᑲ ᓂᒋᐊᒡ ᐊ ᒪᒥᑕᐛᑎᓯᔨᒋ ᒍᐤ ᓇᐸᐛ ᐸᕐ-ᒋᓴᔅ ᐊ ᐃᓯᓂᐧᑲᓱᔨᒋ, ᒋ ᒥᒋ ᐅᒋᔅᒋᐛᐃᒐᓱᔪᐛ ᒪᒃ ᐅᔭ ᓇᐸᐛ᙮ 7ᑭᔭ ᐅ ᐸᕐ-ᒋᓴᔅ ᒋ ᐅᐎᒐᐛᑭᓄᐤ ᐊᓂᔭ ᒋᓴᐅᒋᒪᐛ ᐊᓐᑕ ᐊᓂᔭ ᒥᓂᔅᑎᑯᔪᐤ ᑲ ᑕᔨᒋ, ᓴᕐᒋᔭᔅ ᑈᓚᔅ ᑲ ᐃᓯᓂᐧᑲᓱᔨᒋ, ᐊᒋ ᒥᔅᑎ ᐃᑈᐧᑲᔨᒋ᙮ ᐊᓐ ᒪᒃ ᒋᓴᐅᒋᒪᐤ ᒋ ᐎᓴᒪᐤ ᐸᕐᓇᐸᓴ ᑭᔭ ᓴᓚ ᐊ ᐎ ᐸᑕᐧᒃ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮ 8ᒥᒄ ᒪᒃ ᐅ ᑲ ᒪᒥᑕᐛᑎᓯᑦ ᐸᕐ-ᒋᓴᔅ ᑲ ᐃᓯᓂᐧᑲᓱᑦ, ᐊᓕᒪᔅ ᒋ ᐃᓯᓂᐧᑲᑎᑯᐤ ᐊᓂᔭ ᑯᕆᒃ ᑲ ᐃᓯ ᐃᔨᒥᔨᒋ, ᒋ ᐎ ᑯᔅᑎᔭᐤ ᐸᕐᓇᐸᓴ ᑭᔭ ᓴᓚ ᒐᒋ ᐎᑎᒧᐛᔨᒋ ᐊᓂᔭ ᒋᓴᐅᒋᒪᐛ ᒥᔽᒋᒧᐅᓂᔪᐤ, ᐛᔅ ᓇᒪ ᐅᒋ ᓂᑐᐛᔨᒪᐤ ᒐᒋ ᑕᑈᔭᔨᒪᔨᒋ ᐅᑎᐸᔨᒋᒐᐛ ᒋᓴᓴ᙮ 9ᐊᑯ ᒪᒃ ᓴᓪ, ᐊᓐ ᑈᓪ ᑲ ᐃᓯᓂᐧᑲᑕᑭᓄᐅᑦ ᐊ ᓴᑭᔅᒋᓇᔅᑲᑯᑦ ᑲ ᐸᔭᒋᓯᔨᒋ ᐊᒐᒂ, ᒋ ᑭᓄᐛᐱᒪᐤ ᐊᓂᔭ ᑲ ᒪᒥᑕᐛᑎᓯᔨᒋ ᓇᐸᐛ, 10ᐊᑯ ᒂ ᐃᑕᑦ, “ᒧᔭᒻ ᒥᒋᒥᓂᑐᐤ ᐅᑦ ᐊᐛᓯᒪ ᐊ ᐃᑕᔨᑕᑯᓯᔨᓐ, ᐊ ᐛᐧᑲᑎᒥᓐ ᒥᓯᐛ ᑯᐃᔅᑯᑕᑎᓯᐅᓐ᙮ ᐊᑯᓐ ᐊᑯ ᐃᔅᐱᔅ ᐎᔭᓯᐃᐛ ᑭᔭ ᐳᓂ ᐊᑯ ᐊ ᐎ ᓂᓱᐅᓇᒋᑕᐅᑦ ᐊᓂᔭ ᑕᓐ ᐊ ᐃᓯ ᓂᑐᐛᔨᑕᐧᒃ ᒋᓴᒪᓂᑐᐤ ᒐᒋ ᐃᑕᑎᓯᓇᓄᐎᒡ᙮ 11ᒋ ᐎᑎᒪᑎᓐ ᐊᓄᒡ ᓄᐛᒡ ᒋᑭ ᐛᐛᓯᐃᒄ ᐅᑎᐸᔨᒋᒐᐤ, ᐛᐃᐱᔅᒋᔅ ᒪᒃ ᓇᒪ ᒋᑭ ᐅᒋ ᐛᐱᒪᐤ ᐱᓯᒻ,” ᒋ ᐃᑕᐤ ᓴᓪ ᐊᓂᔭ ᑲ ᒪᒥᑕᐛᑎᓯᔨᒋ ᓇᐸᐛ᙮
ᑎᐛᒡ ᒪᒃ ᒋ ᒧᓯᑕᐤ ᐊ ᐱᒋᓴᐱᔨᒡ ᑭᔭ ᐊ ᐅᒋ ᑎᐱᔅᒋᐱᔨᒡ ᐊ ᐃᑕᔨᑕᐧᒃ ᐊᓐ ᓇᐸᐤ ᐊᑯ ᓇᒪ ᐅᒋ ᐛᐸᑎᒻ, ᐊᑯ ᑲ ᓇᓂᑐᒥᔅᑯᓇᑦ ᐊᐛᔪᐛ ᒐᒋ ᓯᔅᒋᓂᔅᒐᑕᐃᑯᑦ᙮ 12ᐃᔅᐱ ᒪᒃ ᐎᔭᐸᑕᐧᒃ ᐊᓐ ᒋᓴᐅᒋᒪᐤ ᐅᔭ ᐊ ᐃᔅᐱᔨᒡ ᒋ ᑕᑈᔭᔨᒪᐤ ᐅᑎᐸᔨᒋᒐᐛ ᑭᔭ ᓇᔅᒡ ᑕᑈ ᒋ ᒥᔅᑲᑕᔨᑎᒥᐃᑯᐤ ᑲ ᐃᓯ ᐸᑕᐧᒃ ᐊ ᒋᔅᑯᑎᒪᒐᓄᐎᒡ ᐊ ᐊᔨᒧᒪᑭᓄᔨᒋ ᐅᑎᐸᔨᒋᒐᐛ᙮
ᐊᓐᑎᔭᑭᒡ ᑲ ᐃᑐᑕᒡ ᐸᕐᓇᐸᔅ ᑭᔭ ᑈᓪ
13ᐊᑯ ᑈᓪ ᐊᓂᔭ ᒪᒃ ᐎᒐᐛᑭᓇ ᐊᑯᑕ ᐊᓐᑕ ᐸᐳᔅ ᑲ ᐅᒋ ᐳᓯᒡ, ᐊᑯ ᐊᓐᑕ ᐸᕐᑲ ᑲ ᐃᔅᒋᒪᒡ ᐊᓐᑕ ᐸᒻᐱᓕᔭ ᐊᔅᒋᒡ ᑲ ᑎᒂᒡ ᐅᑕᓇᐤ᙮ ᐊᑯᑕ ᐊᓐᑕ ᐸᕐᑲᒡ ᑲ ᐅᒋᔅᑭᑎᑯᒡ ᒠᓐ-ᒪᕐᑲ ᐊᑯ ᐊᓐᑕ ᒋᕈᓯᓕᒥᒡ ᑲᐤ ᒂ ᐃᓯ ᒋᐛᔨᒋ᙮ 14ᐊᑯ ᒥᓐ ᐊᓐᑎᔭᑭᒡ ᒂ ᐃᑐᑕᒡ ᐊᓐᑕ ᐱᓯᑎᔭ ᐊᔅᒋᒡ ᑲ ᑎᒂᒡ ᐅᑕᓇᐤ᙮ ᑲ ᐊᔭᒥᐊᐅᒋᓯᑲᔨᒡ ᒪᒃ ᒋ ᐱᒐᐅᒡ ᐊᓐᑕ ᒍᐤ ᐊᔭᒥᐊᐅᒋᐛᐱᒡ, ᐊᑯ ᒂ ᐊᐱᒡ ᐊᓐᑕ᙮ 15ᒋ ᑕᐤ ᐊᓐᑕ ᐊᐛᓐ ᐊᔭᒥᐊᐅᒋᐛᐱᒡ ᐊ ᐃᔨᒥᑐᐛᑦ ᐊᓂᔭ ᐃᔪᐛ ᐊᔭᒥᐊᐅᐎᓱᐛᐅᓇ, ᑭᔭ ᐊᓂᔭᐧᑲ ᐅᒋᔅᒋᐛᐃᒐᓱᐛ ᑲ ᐃᓯ ᒥᓯᓇᐊᒥᔨᒂᓂ᙮ ᐊᑯ ᒪᒃ ᐊᓐᒡ ᑲ ᓂᑲᓂᔅᑲᒡ ᐊᓂᔭ ᐊᔭᒥᐊᐅᒋᐛᐱᔪᐤ ᒂ ᑯᒂᒋᒪᒡ ᑈᓇ ᑭᔭ ᐊᓂᔭ ᐎᐧᑲᓂᓯᒪᐛ ᒐᒋ ᐃᔨᒪᐊᔨᒋ ᐊᓂᔭᔪᐛ ᐃᔪᐛ ᒐᒋ ᓱᒋᑲᐳᔨᒋ᙮
16ᐊᑯ ᒪᒃ ᑈᓪ ᑲ ᐅᐱᑲᐳᐅᑦ, ᒂ ᐅᐱᓂᔅᒐᔨᑦ ᐊ ᓂᑐᐛᔨᒪᑦ ᐊᓂᔭ ᐃᔪᐛ ᒐ ᐊᑲ ᒋ ᒋᔅᑐᔨᒋ, ᒂ ᐃᔅᒋᔄᑦ, “ᓂᐧᑲᓂᓯᑐᒄ, ᑕᐱᔅᑯᓐ ᒋᔨᐛᐤ ᒍᐤ ᑭᔭ ᒋᔨᐛᐤ ᐊᑲ ᒍᐤ ᑲ ᐃᑎᔅᑲᓇᓯᔭᒄ ᑲ ᐊᔭᒥᐊᔅᑐᐛᒄ ᒋᓴᒪᓂᑐᐤ, ᓂᑐᑐᐅᒄ᙮ 17ᐊᓂᔭ ᒋᓴᒪᓂᑐᐛ, ᒍᐤ ᐃᔪᒡ ᑲ ᑕᑈᔭᔨᒪᒡ ᒋ ᐎᔭᔨᒪᐤ ᐛᔅᑭᒡ ᒋᐧᑲᓂᓯᓄᐛ ᒐᒋ ᐅᑦ ᐃᔨᒥᑦ᙮ ᒋ ᐃᑐᑐᐛᐤ ᒐᒋ ᐊᑎ ᒥᒐᑎᔨᒋ ᒪᒂᒡ ᐊᓐᑕ ᐃᒋᑉᑎᒡ ᑲ ᑕᔨᒋ᙮ ᐊᑯ ᒪᒃ ᐊ ᐃᔅᐱᔅ ᓱᒐᔨᑕᑯᓯᔨᒋ ᒋᓴᒪᓂᑐᐛ ᒋ ᐎᐎᑕᐃᑯᐅᒡ ᐊᓐᑕ ᐊᔅᒋᒡ ᐅᒡ᙮ 18ᓇᐎᔪᐛ ᐱᐳᓇ ᒪᒃ ᒋ ᐃᔅᐱᔅ ᓯᐱᔪᐛᓯᔅᑐᐛᐤ ᐊᓂᔭᔪᐛ ᒍᐤ ᐃᔪᐛ ᒪᒂᒡ ᐊᓐᑕ ᐸᐧᑯᑎᔅᑭᒥᑲᒡ ᑲ ᑕᔨᒋ ᐊᑎ ᐊᑲ ᐅᒋ ᓂᓇᐃᑕᑯᑦ᙮ 19ᒋᓴᒪᓂᑐᐤ ᒪᒃ ᒋ ᒥᔭᐤ ᐊᓂᔭᔪᐛ ᒍᐤ ᐃᔪᐛ ᐊᓂᔭ ᐊᔅᒋᔪᐤ ᑲᐃᓇᓐ ᑲ ᐃᓯᓂᐧᑲᑕᔨᒡ ᒐᒋ ᑎᐱᔨᐛᐅᓯᔨᒋ ᐃᔅᐱ ᑲ ᐃᑎᓱᐛᑦ ᒐᒋ ᓂᓱᐅᓇᒋᐊᑭᓄᔨᒋ ᐊᓂᔭᔪᐛ ᓂᔄᐅᑕᒡ ᑲ ᐃᑎᔅᑲᓇᓯᔨᒋ ᐃᔪᐛ ᐊᓐᑕ ᑲ ᑕᔨᒋ᙮ 20ᓇᐤ ᒥᑕᓯᒥᑎᓄᐤ ᐊᓱ ᐱᑕᑕᒡ ᑕᑐᔪᐛ ᐱᐳᓇ ᒪᒃ ᒋ ᐃᔅᐱᔅ ᑕᐅᒡ ᐊᓐᑕ᙮”
“ᐊᑯ ᒋᓴᒪᓂᑐᐛ ᑲ ᐎᔭᔨᒪᔨᒋ ᐊᐛᔪᐛ ᒐ ᓂᑲᓂᔅᑲᑯᒡ ᑭᔭ ᒐᒋ ᑎᐸᔅᑯᓂᑯᒡ᙮ ᒐᒃ ᒪᒃ ᒂ ᐃᑕᑦ ᐅᒋᔅᒋᐛᐃᒐᓱᐤ ᓴᒻᔪᐃᓪ᙮ 21ᐊᑯ ᒐᒃ ᐅᒡ ᐃᔪᒡ ᒂ ᐃᑕᒡ ᓴᒧᐃᓚ ᐊ ᓂᑐᐛᔨᒪᒡ ᐊᐛᔪᐛ ᒐ ᐅᒋᓴᐅᒋᒪᒥᒡ᙮ ᐊᑯ ᒪᒃ ᒋᓴᒪᓂᑐᐤ ᑲ ᐎᔭᔨᒪᑦ ᓴᓚ ᒐᒋ ᐅᒋᓴᐅᒋᒪᒥᒡ᙮ ᓴᓪ ᒪᒃ ᐅᑕᐎᔭ ᑭᔅ ᒋ ᐃᓯᓂᐧᑲᓱᔪᐛ, ᐊᓐᑕ ᐱᓐᒋᒥᓐ ᐊ ᑕᔨᒋ ᒋ ᐃᑎᔅᑲᓇᓯᔪᐛ᙮ ᐃᔅᐱ ᒪᒃ ᓇᐎᔪᐛ ᐱᐳᓐ ᑲ ᐃᔅᐱᔅ ᒋᓴᐅᒋᒪᐅᑦ, 22ᐊᑯ ᑎᐱᑦ ᑲ ᒥᔅᑯᑎᔅᑯᐛᑦ ᓴᓚ, ᑎᐱᑦ ᑲ ᒋᓴᐅᒋᒪᐅᐃᑯᑦ ᒋᓴᒪᓂᑐᐛ᙮ ᒋ ᐃᑕᐤ ᒪᒃ ᒋᓴᒪᓂᑐᐤ,
ᑎᐱᑦ, ᒐᓯᔾ ᐅᑯᓴ, ᐊᐅᒄ ᒪᔽᔨᒥᒃ ᓇᐸᐤ ᐊ ᐃᑕᔨᑕᑯᓯᑦ ᐊ ᐃᑐᑕᐧᒃ ᒥᓯᐛ ᑕᓐ ᐊ ᐃᓯ ᓂᑐᐛᔨᒥᒃ ᒐᒋ ᐃᑐᑕᐧᒃ᙮
23ᒋᓴᒪᓂᑐᐤ ᒪᒃ ᑭᔭ ᒋ ᐃᔅᒋᔄᐤ ᒐ ᐸᒋ ᐃᑎᓴᐛᑦ ᐊᐛᔪᐛ ᑎᐱᑦ ᐊ ᑕᔨᒋ ᐊ ᐅᒋᔨᒋ ᒐᒋ ᐱᒪᒋᐊᑦ ᐃᔅᕋᐃᓪ ᐃᔪᐛ ᐊᐅᒄ ᒪᒃ ᐅᔭ ᒋᓴᓴ, ᐊᓂᔭᔪᐛ ᑲ ᐃᔅᒋᔄᑦ ᒐᔅᑎᓇᔅ ᒐ ᐸᒋ ᐃᑎᓴᐛᑦ᙮ 24ᐊᔅᒄ ᐊᑲ ᐅᒋ ᒋᒋᐱᔨᑕᑦ ᒋᓴᔅ ᐊ ᑭᒐᔅᒋᒧᑦ, ᒠᓐ ᒋ ᑭᒐᔅᒋᒪᐤ ᒥᒐᑦ ᐃᔅᕋᐃᓪ ᐃᔪᐛ ᐊ ᐃᑕᑦ, ᒂᔅᑲᑎᓯᒄ ᒐ ᓂᑭᑎᒪᒄ ᒋᒥᒐᑎᓯᐅᓄᐛᐛ, ᑭᔭ ᒐ ᓯᑲᐃᑕᑯᐅᔭᒄ᙮ 25ᐃᔅᐱ ᒪᒃ ᒐᑲᑦ ᑲ ᒋᔅᑕᑦ ᒠᓐ ᒥᓯᐛ ᑕᓐ ᑲ ᐃᓯ ᓂᑐᐛᔨᒥᑯᑦ ᒋᓴᒪᓂᑐᐛ ᒐ ᐃᑎᑦ, ᒋ ᐃᑕᓯᐱᓐ ᐊᓂᔭᔪᐛ ᐃᔪᐛ, ‘ᐊᐛᓐ ᐊ ᐃᑕᔨᒥᔭᒄ ᓂᔾ ? ᓇᒪᔭᐤ ᓂᔾ ᙭ ᐊᓐ ᑲ ᐊᓱᐛᐱᒪᒄ᙮ ᓴᔅ ᐎᐱᒡ ᒋᑭ ᑎᑯᓯᓄᐤ, ᓇᒪ ᐛᐛᒡ ᓂᑦ ᐃᔅᐱᑕᔨᑕᑯᓯᓐ ᓂᔾ ᒐᒋ ᐊᐱᐧᑯᓂᒧᒡ ᐅᒥᔅᒋᓇ᙮’ ᐊᐅᒄ ᐅᔭ ᑲ ᐃᔅᒋᔄᒂ ᐊᓂᔭᐧᑲ ᒠᓐ ᐅᓯᑲᐃᑕᒐᐤ᙮”
26“ᓂᐧᑲᓂᓯᑐᒄ, ᒋᔨᐛᐤ ᒪᒃ ᑲ ᐃᑎᔅᑲᓇᓯᔭᒄ ᐊᑉᕋᐊᒻ ᐊ ᑕᑦ ᑭᔭ ᒋᔨᐛᐤ ᐊᑲ ᒍᐤ ᑲ ᐃᑎᔅᑲᓇᓯᔭᒄ ᑲ ᐊᔭᒥᐊᔅᑐᐛᒄ ᒋᓴᒪᓂᑐᐤ, ᔅᒋ ᐎᑎᒪᑯᓇᓄᐤ ᑕᓐᑕ ᒐᒋ ᐅᒋ ᐱᒪᒋᐅᔭᐧᒄ᙮ 27ᐛᔅ ᐊᓐᒡ ᐃᔪᒡ ᐊᓐᑕ ᒋᕈᓯᓕᒥᒡ ᑲ ᑕᒡ ᑭᔭ ᐊᓂᔭ ᑲ ᓂᑲᓂᔅᑲᑯᒡ ᓇᒪ ᐅᒋ ᒋᔅᒐᔨᒪᐅᒡ ᒋᓴᓴ ᐊᔪᑯᓐ ᐊᓂᔭ ᐅᐱᒪᒋᐃᐛᐛ, ᑭᔭ ᓇᒪ ᐅᒋ ᓂᔅᑐᑎᒧᐛᓯᐱᓐᒡ ᑕᓐ ᑲ ᐃᓯ ᒥᓯᓇᐊᒥᔨᒋ ᐊᓂᔭᐧᑲ ᐅᒋᔅᒋᐛᐃᒐᓱᐛ ᑕᓐ ᑲ ᐃᓯ ᐊᔨᒧᒪᔨᒋ ᐊᓂᔭ ᙭ᑕ᙮ ᐊᑎ ᒪᒃ ᐊᓯᑯᒻ ᐊ ᒍᐤ ᐊᔭᒥᐊᐅᒋᓯᑲᔨᒡ ᐊᒋ ᐃᔨᒥᑐᐛᑭᓄᐎᒡ᙮ ᒥᒄ ᒪᒃ ᐃᔅᐱ ᐊᓐᒡ ᒍᐤ ᐃᔪᒡ ᑲ ᓂᑐᐛᔨᒪᒡ ᒋᓴᔅ ᒐᒋ ᓂᐸᐊᑭᓄᔨᒋ, ᐊᑯ ᒂ ᑎᐱᐱᔨᒡ ᑕᓐ ᑲ ᐃᑎᓯᓇᐃᑭᓄᐅᒡ ᒐ ᐃᔅᐱᔨᒡ᙮ 28ᐊᑯ ᐊᓐᒡ ᐃᔪᒡ ᒂ ᐃᑕᒡ ᐊᓂᔭ ᑈᓚᑕ ᒐᒋ ᓂᐸᐊᑭᓄᔨᒋ ᒋᓴᓴ, ᒋ ᒋᔅᒐᔨᑎᒧᒡ ᒪᒃ ᐊᑲ ᐅᒋ ᒥᒋᑐᑎᒥᔨᒋ ᒥᒄ ᒪᒃ ᐃᔭᐱᒡ ᒋ ᐃᑕᐅᒡ ᒐ ᓂᐸᐊᑭᓄᔨᒋ᙮ 29ᐛᔅᑭᒡ ᒋ ᒥᓯᓇᐃᑭᓄᐤ ᐊᓐᑕ ᒥᓯᓇᐃᑭᓂᒡ ᑕᓐ ᒐ ᐃᑐᑕᑯᑦ ᐃᔪᐛ ᙭, ᒥᓯᐛ ᒪᒃ ᒋ ᑎᐱᐱᔪᐤ ᐅᔭ, ᒋᓴᔅ ᒋ ᓂᐸᐊᑭᓄᐤ ᐊᑯ ᒂ ᓂᑎᓇᑭᓄᐅᑦ ᒋᐱᔭᑎᑯᒡ ᐅᒡ, ᐊᑯ ᑲᒋ ᓇᐃᐧᑯᐛᑭᓄᐅᑦ᙮ 30ᒋᓴᒪᓂᑐᐤ ᒪᒃ ᒋ ᐅᓂᔅᑲᓇᐤ ᓂᐳᐅᓂᒡ ᐅᒡ᙮ 31ᒥᒐᑐᐤ ᒋᓯᑲᐛ ᒪᒃ ᒋ ᐛᐱᒥᑯᐤ ᐊᓂᔭᔪᐛ ᐊᐛᔪᐛ ᑲᓕᓕᒡ ᑲᒋ ᐅᒋ ᐸᒋ ᐎᒐᐅᑯᔨᒋ ᒋᕈᓯᓕᒥᒡ ᐃᔅᐱᔅ᙮ ᒋ ᐎᑎᒧᐛᔪᐛ ᒪᒃ ᐃᔅᕋᐃᓪ ᐃᔪᐛ ᒥᓐ ᐊ ᐱᒪᑎᓯᑦ᙮”
32“ᓂᔭᓐ ᒪᒃ ᒋ ᐸᒋ ᑎᐸᒋᒧᔅᑕᑎᓇᓐ ᒥᔽᒋᒧᐅᓐ ᐊᐅᒄ ᐅ ᓴᔅ ᐊ ᑎᐱᐱᔨᒡ ᐊᓂᔭ ᒋᓴᒪᓂᑐᐤ ᑕᓐ ᑲ ᐃᑕᑦ ᐊᓂᔭᐧᑲ ᒋᐧᑲᓂᓯᓄᐛ ᒐᔅᑎᓇᔅ ᒐ ᐃᑐᑕᐧᒃ᙮ 33ᒋ ᐅᓂᔅᑲᓇᐤ ᒋᓴᓴ ᓂᐳᐅᓂᒡ ᐅᒡ᙮ ᐊᐅᒄ ᐅᔭ ᒋᓴᒪᓂᑐᐤ ᐛᔅᑭᒡ ᑲ ᐃᑕᒂ ᐊᓂᔭ ᒋᐧᑲᓂᓯᓄᐛ ᒐ ᐃᑐᑕᐧᒃ, ᑭᔭ ᒪᒂᒡ ᒋᔭᓄᐤ ᐊ ᐱᒪᑎᓯᔭᐧᒄ ᐊ ᑎᐱᐱᔨᒡ᙮ ᐛᔅ ᒋ ᐃᑎᔅᑕᐤ ᐊᓐᑕ ᑎᐱᑦ ᐅᓂᑭᒧᐅᓂᒡ ᓂᓱ ᐱᔅᒋᑎᓯᓇᐃᑭᓂᒡ,
ᒋᔾ ᓂᑯᔅ, ᐊᓄᒡ ᑲ ᒋᓯᑲᒡ ᓂᔾ ᒍᑕᐎᔾ᙮
34ᒋᓴᒪᓂᑐᐤ ᒋ ᐃᑕᐤ ᒐ ᐅᓂᔅᑲᓇᑦ ᓂᐳᐅᓂᒡ ᐅᒡ, ᐊᑲ ᓂᑕ ᒥᓐ ᒐ ᐅᒋ ᓂᐱᔨᒋ᙮ ᐃᑎᔅᑕᐤ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᒋᓴᒪᓂᑐᐤ ᐊᒋ ᐃᔅᒋᔄᑦ,
ᑕᑈ ᒋᑭ ᒥᔨᑎᓐ ᐊᓂᔭᔪᐛ ᐸᔭᒋ ᓱᐛᔨᒋᒐᐅᓇ ᑲ ᑕᑈᐅᒐᔨᑕᒂᒋ ᐊᓂᔭ ᑲ ᐃᑎᒃ ᐊᓂᔭ ᑎᐱᑦ ᒐ ᒥᔨᒃ᙮
35ᐊᑯ ᒪᒃ ᐃᑎᔅᑕᐤ ᑭᔭ ᐊᓐᑕ ᑎᐱᑦ ᐅᓂᑭᒧᐅᓂᒡ,
ᓇᒪ ᒋᑭ ᐅᒋ ᐱᔅᑎᓇᐤ ᑲ ᐸᔭᒋᓯᑦ ᒋᑦ ᐊᐱᒋᐊᑭᓐ ᒐᒋ ᓂᐱᑦ, ᑭᔭ ᐎᔪᐤ ᒐᒋ ᐃᔭᔪᓂᔨᒡ᙮
36ᐛᔅ ᑎᐱᑦ ᒋ ᐊᑐᔅᑯᐛᐤ ᒋᓴᒪᓂᑐᐛ ᑭᔭ ᒧᔅ ᒋ ᐃᑐᑎᒧᐛᐤ ᒋᓴᒪᓂᑐᐛ ᐅᑦ ᐃᑕᔨᑎᒧᐅᓂᔪᐤ ᑲ ᐃᔅᐱᔅ ᐱᒪᑎᓯᑦ᙮ ᐊᑯ ᒂ ᓂᐱᑦ, ᒂᒋ ᓇᐃᐧᑯᐛᑭᓄᐅᑦ ᐊᓐᑕ ᑲ ᐱᒥᓯᒪᑭᓄᔨᒋ ᐊᓂᔭᐧᑲ ᐎᐧᑲᓂᓴ, ᐎᔪᐤ ᒪᒃ ᒋ ᐃᔭᔪᓂᔪᐤ᙮ 37ᒋᓴᔅ ᒪᒃ ᐎᔾ, ᐊᑎ ᐊᒋ ᓂᐱᑦ ᒋ ᐅᓂᔅᑲᓂᑯᐤ ᒋᓴᒪᓂᑐᐛ ᓂᐳᐅᓂᒡ ᐅᒡ, ᓇᒪ ᒪᒃ ᒥᓐ ᐅᒋ ᓂᐳᐤ, ᓇᒪ ᓂᑕ ᐅᒋ ᐃᔭᔪᓂᔪᐤ ᐎᔪᐤ᙮ 38ᒥᓯᐛ ᒋᔨᐛᐤ ᓂᐧᑲᓂᓯᑐᒄ ᐸᒋ ᓂᑐᑐᐅᒄ ᑕᓐ ᐊ ᐃᓯ ᐎᑎᒪᑎᑯᒡ, ᒋᐸ ᒋᔅᒐᔨᑕᓇᐛᐤ ᒥᒄ ᒋᓴᔅ ᐅᒋ ᐊᑯᑕ ᒐᒋ ᐅᒋ ᐛᐸᔨᑎᒪᑯᐅᔭᒄ ᒋᒥᒋᑥᐅᓄᐛᐛ᙮ 39ᒥᓯᐛ ᐊᐛᓐ ᑲ ᑕᑈᔭᔨᒪᑦ ᒋᓴᓴ ᑕᑈ ᒋ ᐛᐸᔨᑎᒧᐛᑭᓄᐤ ᒥᓯᐛ ᐅᒥᒋᑥᐅᓇ, ᓇᒪ ᐎ ᒧᓱᓴ ᐅᐎᓱᐛᐅᓂᔪᐤ ᒋᑭ ᒋ ᑯᐃᔅᑯᓇᑯᐃᑯᐤ ᐊᐛᓐ᙮ 40ᐃᔭᒂᒥᒄ ᒪᒃ ᒐ ᐊᑲ ᒋ ᐃᔅᐱᔨᔭᒄ ᑕᓐ ᑲ ᐃᓯ ᒥᓯᓇᐊᒧᐛᒂ ᐊᓂᔭᐧᑲ ᐅᒋᔅᒋᐛᐃᒐᓱᒡ ᑕᓐ ᑲ ᐃᓯ ᒥᓯᓇᐊᒧᐛᒂ ᒐ ᐃᔅᐱᔨᒋ ᐊᐛᔪᐛ, ᒋ ᐃᑎᓯᓇᐊᒧᐅᓯᐱᓐᒡ,
41ᓂᑐᑎᒧᒄ ᒪ, ᒋᔨᐛᐤ ᓇᓂᑎᒻ ᑲ ᒥᒪᔭᔨᒐᔭᒄ, ᒪᒥᔅᑲᑕᔨᑎᒧᒄ ᑭᔭ ᓂᓱᐅᓇᑎᓯᒄ᙮
ᐛᔅ ᒐᒂᓐ ᓂᑭ ᑐᑕᓐ ᐅᑕ ᒪᒂᒡ ᐊᔅᒄ ᐊ ᐱᒪᑎᓯᔭᒄ ᐊᓐ ᒐ ᐊᑲ ᐅᒋ ᑕᑈᑎᒥᐃᑯᔭᒄ ᐊᑎ ᐊᐛᓐ ᐎ ᐎᑎᒪᑯᔭᒂ᙮”
ᐊᔪᐅᒄ ᒪᒃ ᐅᔭ ᑲ ᐃᓯ ᐃᔨᒪᐊᑦ ᑈᓪ ᐊᓂᔭ ᐃᔪᐛ᙮
42ᐃᔅᐱ ᒪᒃ ᒐ ᐎᐎᒡ ᑈᓪ ᑭᔭ ᐸᕐᓇᐸᔅ ᐊᓐᑕ ᐊᔭᒥᐊᐅᒋᐛᐱᒡ ᒋ ᐊᔨᐧᑭᒥᐃᑯᐅᒡ ᐊᓂᔭ ᐃᔪᐛ ᒥᓐ ᒐᒋ ᑎᑯᓯᒡ ᐃᔅᐱᔅ ᒍᐤ ᐊᔭᒥᐊᐅᒋᓯᑲᔨᒐ ᐊᑐᐎᔅ ᒐᒋ ᒋᔅᑯᑎᒪᒐᒡ ᒥᔽᒋᒧᐅᓂᔪᐤ᙮ 43ᐊᑯ ᒪᒃ ᒥᒐᑦ ᒍᐤ ᐃᔪᒡ ᑭᔭ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᑲ ᐊᔭᒥᐊᐛᑎᓯᒡ ᒋ ᐎᒐᐛᐅᒡ ᐊᓂᔭ ᑈᓚ ᑭᔭ ᐸᕐᓇᐸᓴ᙮ ᐊᑯ ᒪᒃ ᐊᓐᒡ ᐊᑈᔅᑕᓇᒡ ᑲ ᐎᑎᒧᐛᒡ ᐊᓂᔭ ᐃᔪᐛ ᐊ ᐃᑕᒡ, ᒋᓴᒪᓂᑐᐤ ᓇᔅᒡ ᑕᑈ ᒋ ᒥᔪᑐᑕᑯᐛᐤ, ᓱᒃ ᑯᐃᔅᒄ ᐎ ᐃᓯ ᐱᒪᑎᓯᒄ ᒐᒋ ᐅᒋ ᓱᐛᔨᒥᑕᒄ ᒋᓴᒪᓂᑐᐤ᙮
ᒍᐤ ᐃᔪᒡ ᑲ ᐅᑕᔨᒪᒡ ᑈᓚ ᑭᔭ ᐸᕐᓇᐸᓴ
44ᒥᓐ ᒪᒃ ᐊ ᒍᐤ ᐊᔭᒥᐊᐅᒋᓯᑲᔨᒡ, ᒐᑲᑦ ᒥᓯᐛ ᐊ ᑎᓯᒡ ᐊᐛᓐᒋ ᐊᓐᑕ ᐅᑕᓇᒡ ᑲ ᑕᒡ ᒋ ᒪᒧᐎᐅᒡ ᐊᓐᑕ ᐊᔭᒥᐊᐅᒋᐛᐱᒡ ᐊ ᐸᒋ ᓂᑐᑕᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ᙮ 45ᐃᔅᐱ ᒪᒃ ᐊᓐᒡ ᒍᐤ ᐃᔪᒡ ᐎᔭᐱᒪᒡ ᐊᓂᔭ ᒥᒐᑦ ᐃᔪᐛ ᐊ ᐎ ᓂᑐᑎᒥᔨᒋ, ᓇᔅᒡ ᒋ ᐅᑕᔨᑎᒧᒡ᙮ ᒋ ᐎ ᓂᔅᑯᔅᑐᐛᐅᒡ ᑕᓐ ᑲ ᐃᔅᒋᔄᔨᒋ ᑈᓚ ᑭᔭ ᒋ ᒪᔭᔨᒪᐅᒡ᙮
46ᒥᒄ ᒪᒃ ᑈᓪ ᑭᔭ ᐸᕐᓇᐸᔅ ᒋ ᓱᒐᔨᒧᐅᒡ ᐊ ᐃᔅᒋᔄᒡ, “ᒋᓴᒪᓂᑐᐤ ᓂᒋ ᓂᑐᐛᔨᒥᑯᓇᓐ ᒋᔨᐛᐤ ᒍᐤ ᐃᔪᒡ ᓂᔅᑎᒻ ᒐᒋ ᐎᑎᒪᑕᒡ ᐅᑦ ᐃᔨᒧᐅᓐ᙮ ᒥᒄ ᒪᒃ ᐊ ᐊᓏᑎᒪᒄ ᐊᑯᑕ ᐛᒋ ᓄᒂᒡ ᐊᑲ ᒋᔅᑕᔨᑕᑯᓯᔭᒄ ᒐᒋ ᐊᔭᔭᒄ ᑲᒋᒡ ᐱᒪᑎᓯᐅᓐ᙮ ᐊᑯ ᒪᒃ ᒐ ᓂᑭᑎᑕᒡ, ᒐ ᐎᑎᒧᐅᒋᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ᙮ 47ᐊᔪᐅᒄ ᐅᔭ ᐅᑎᐸᔨᒋᒐᐤ ᑲ ᐃᑎᓱᒥᔨᒥᑦ ᒐᒋ ᑎᔭᒡ ᑲ ᐃᔅᒋᔄᑦ,
ᔅᒋ ᐅᑎᓂᑎᓐ ᒐᒋ ᐛᔅᑐᐛᔨᓐ ᐊᓐᑕ ᓂᓇᐧᑯᐤ ᐊ ᐃᑎᔅᑲᓇᓯᒡ ᐊᐛᓐᒋ ᐊ ᑕᒡ, ᒐᒋ ᐅᒋ ᒋᔅᒐᔨᑕᒡ ᑕᓐᑕ ᐊ ᐅᒋ ᐱᒪᒋᐃᐛᑦ ᒋᓴᒪᓂᑐᐤ᙮ ᒥᓯᐛ ᒪᒃ ᐊ ᐃᔅᐱᑎᔅᑭᒥᑲᒡ ᐅᑕ ᐊᔅᒋᔾ ᒋᑭ ᐸᑕᑯᓐ᙮”
48ᐃᔅᐱᔅ ᐱᔭᑐᐛᒡ ᑈᓚ ᐊᓂᔭ ᑲ ᐃᔅᒋᔄᔨᒋ ᐊᓐᒡ ᐃᔪᒡ ᐊᑲ ᒍᐤ ᐃᑎᔅᑲᓇᓯᒡ ᓄᐛᒡ ᒋ ᒥᔽᔨᑎᒧᒡ ᑭᔭ ᒋ ᒪᒥᒋᒪᐅᒡ ᒋᓴᒪᓂᑐᐛ ᐊᓂᔭ ᑲ ᐃᓯ ᐱᔅᑎᓂᒥᔨᒋ ᐅᑦ ᐃᔨᒧᐅᓂᔪᐤ᙮ ᐊᑯ ᐊᓐᒡ ᐃᔪᒡ ᑲ ᐅᑎᓂᑯᒡ ᒋᓴᒪᓂᑐᐛ ᒐᒋ ᐊᔭᒡ ᑲᒋᒡ ᐱᒪᑎᓯᐅᓂᔪᐤ ᒋ ᒋᒋ ᑕᑈᔭᔨᒪᐅᒡ ᒋᓴᒪᓂᑐᐛ᙮
49ᐊᑯ ᒪᒃ ᐊᔭᔅᒃ ᒥᓯᑕ ᑲ ᐊᑎ ᐸᑕᑯᓂᔨᒡ ᐅᑎᐸᔨᒋᒐᐤ ᐅᑦ ᐃᔨᒧᐅᓐ᙮ 50ᒥᒄ ᒪᒃ ᐊᓐᒡ ᒍᐤ ᐃᔪᒡ ᒋ ᐃᑐᑐᐛᐅᒡ ᐊᓂᔭ ᓇᐸᐛ ᑭᔭ ᐃᔎᐛ ᓇᔅᒡ ᑲ ᒋᔅᑕᔨᒪᑭᓄᔨᒋ ᐊᓐᑕ ᐅᑕᓇᒡ ᒐᒋ ᒋᔄᓯᔅᑐᐛᔨᒋ ᐊᓂᔭᔪᐛ ᐊᑈᔅᑕᓇ ᑭᔭ ᒐᒋ ᓂᓇᐧᑲᒋᐊᔨᒋ᙮ ᑭᔭ ᒋ ᐎᐎᑎᓴᐅᐛᐅᒡ ᐊᓂᔭ ᑈᓚ ᑭᔭ ᐸᕐᓇᐸᓴ ᐊᓐᑕ ᐊᓂᔭ ᐊᔅᒋᔪᐤ᙮ 51ᒋ ᐸᐳᓯᑕᓯᒧᒡ ᒪᒃ ᑈᓪ ᑭᔭ ᐸᕐᓇᐸᔅ᙮ ᐊᐅᒄ ᐅᔭ ᐊ ᐛᐸᑎᔨᐛᒡ ᐊᑲ ᒥᓐ ᒐ ᐅᒋ ᐊᐱᑕᔨᒪᒡ ᐊᓂᔭᔪᐛ ᐃᔪᐛ ᐊᓂᔭ ᐊᑲ ᐅᒋ ᐎ ᑕᑈᑎᒥᔨᒋ ᒥᔽᒋᒧᐅᓂᔪᐤ᙮ ᐊᑯ ᐊᓐᑕ ᐊᐃᑯᓂᔭᒥᒡ ᒂ ᐃᑐᑕᒡ᙮ 52ᐊᓐᒡ ᒪᒃ ᑲ ᑕᑈᔭᔨᒪᒡ ᒋᓴᓴ ᐊᓐᑕ ᐊᓐᑎᔭᑭᒡ ᑲ ᑕᒡ ᓇᔅᒡ ᑕᑈ ᒋ ᒥᔽᔨᑎᒧᒡ ᑭᔭ ᒋ ᓴᑭᔅᒋᓇᔅᑲᑯᐅᒡ ᑲ ᐸᔭᒋᓯᔨᒋ ᐊᒐᒂ᙮
Currently Selected:
ᐊᑈᔅᑕᓇᒡ 13: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
