ᐊᑈᔅᑕᓇᒡ 14
14
ᑈᓪ ᑭᔭ ᐸᕐᓇᐸᔅ ᐊᐃᑯᓂᔭᒥᒡ ᑲ ᐃᑐᑕᒡ
1ᐃᔅᐱ ᑲ ᑎᑯᓯᒡ ᐊᓐᑕ ᐊᐃᑯᓂᔭᒥᒡ, ᑈᓪ ᑭᔭ ᐸᕐᓇᐸᔅ ᒋ ᐱᒐᐅᒡ ᐊᓐᑕ ᐊᔭᒥᐊᐅᒋᐛᐱᒡ, ᑭᔭ ᐊᓂᔭ ᑲ ᐃᔅᐱᔅ ᒋ ᓱᒋᑕᑯᓯᒡ ᐊ ᑭᒐᔅᒋᒧᒡ ᒥᒐᑦ ᒍᐤ ᐃᔪᐛ ᑭᔭ ᐊᓂᔭ ᐊᑲ ᒍᐤ ᐃᑎᔅᑲᓇᓯᔨᒋ ᐊᑯᑕ ᑲ ᐅᒋ ᑕᑈᔭᔨᒪᔨᒋ ᒋᓴᓴ᙮ 2ᐊᑯ ᐊᓐᒡ ᒍᐤ ᐃᔪᒡ ᐊᑲ ᑕᑈᑕᒡ, ᒋ ᐃᑐᑐᐛᐅᒡ ᐊᓂᔭ ᐊᑲ ᒍᐤ ᐃᑎᔅᑲᓇᓯᔨᒋ ᒐᒋ ᒥᒋᐱᔭᐊᔨᒋ ᐊᓂᔭᔪᐛ ᐎᐧᑲᓂᓯᒪᐛ᙮ 3ᓇᐅᔅ ᒪᒃ ᒋ ᑕᐅᒡ ᐊᓐᑕ ᐊᓐᒡ ᐊᑈᔅᑕᓇᒡ᙮ ᒋ ᐊᔨᒧᒪᐅᒡ ᒪᒃ ᐅᑎᐸᔨᒋᒐᐛ ᐊᑲ ᓇᔅᒡ ᑯᔅᑕᒋᒡ᙮ ᐊᑯ ᒪᒃ ᑲ ᒥᔨᑯᒡ ᓱᐧᑲᑎᓯᐅᓂᔪᐤ ᒪᒥᔅᑲᒡ ᐛᐸᑎᔨᐛᐅᓇ ᒐᒋ ᐛᐸᑎᔨᐛᒡ ᑭᔭ ᒐᒋ ᐃᑐᑕᒡ ᐊ ᒪᒥᔅᑲᑕᔨᑕᑯᓂᔨᒋ ᒐᒂᔪᐛ, ᐊᓐᑕ ᐊ ᐅᒋ ᓄᑯᑕᑭᓄᐎᒡ ᐊ ᑕᑈᒡ ᐊᓂᔭ ᑲ ᐃᓯ ᐛᐎᑕᒡ ᐊ ᒋᓴᐛᑐᑕᑕᐧᒄ ᐅᑎᐸᔨᒋᒐᐤ᙮
4ᐊᑯ ᒪᒃ ᐃᔪᒡ ᐊᓐᑕ ᐅᑕᓇᒡ ᑲ ᑕᒡ ᒋ ᑎᐸᓂᐃᑐᐅᒡ, ᐱᔅᒐ ᒋ ᑕᑈᑐᐛᐅᒡ ᐊᓂᔭ ᑈᓚ ᑭᔭ ᐸᕐᓇᐸᓴ, ᐊᑯ ᑯᑎᑭᒡ ᐊᓂᔭᔪᐛ ᒍᐤ ᐃᔪᐛ ᑲ ᑕᑈᑐᐛᒡ᙮
ᓕᔅᑐᕋ ᑭᔭ ᑎᕐᐱ ᑲ ᐃᓯᓂᐧᑲᑕᒂᐤ ᐅᑕᓇᐛ ᑲ ᐃᑐᑕᒡ ᐸᕐᓇᐸᔅ ᑭᔭ ᑈᓪ ᑲ ᐃᓯᓂᐧᑲᑕᒋ
5ᐊᑯ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᑭᔭ ᐊᓐᒡ ᒍᐤ ᐃᔪᒡ ᑭᔭ ᐊᓂᔭ ᑲ ᓂᑲᓂᔅᑲᑯᒡ ᒋ ᑯᒂᑕᔨᒪᐅᒡ ᒐᒋ ᓂᓇᐧᑲᒋᐊᒡ ᐊᓂᔭ ᑈᓚ ᑭᔭ ᐸᕐᓇᐸᓴ ᑭᔭ ᒐᒋ ᓂᐸᐊᒡ ᐊ ᐸᐱᒧᓯᓇᑕᐛᒡ᙮ 6ᐃᔅᐱ ᒪᒃ ᑈᓪ ᑭᔭ ᐸᕐᓇᐸᔅ ᐱᔭᑕᒡ ᐅᔭ, ᐊᓐᑕ ᓕᔅᑐᕋ ᑭᔭ ᑎᕐᐱ ᑲ ᐃᓯᓂᐧᑲᑕᔨᒋ ᐅᑕᓇᐛ ᒋ ᐃᓯ ᒋᑎᓯᒧᐅᒡ᙮ ᐊᓐᑕ ᓚᐃᑯᓂᔭ ᐊᔅᒋᒡ ᒋ ᑎᑯᓂᔪᐤ ᐅᔭ ᐅᑕᓇᐛ᙮ ᐊᓐᑕ ᑭᔭ ᐛᔅᑲ ᐊᓂᔭ ᐊᔅᒋᔪᐤ ᐊᑯᑕ ᑲ ᐱᐸᔨᑐᑕᒡ᙮ 7ᐊᑯᑕ ᐊᓐᑕ ᑲ ᐛᐎᑕᒡ ᐅᔭ ᒥᔽᒋᒧᐅᓂᔪᐤ᙮
ᓕᔅᑐᕋ ᑭᔭ ᑎᕐᐱ ᑲ ᐃᓯᓂᐧᑲᑕᒡ ᐃᑕᐅᓇ ᑲ ᐃᑐᑕᒡ ᐸᕐᓇᐸᔅ ᑭᔭ ᑈᓪ
8ᐊᓐᑕ ᒪᒃ ᓕᔅᑐᕋ ᒋ ᑕᐤ ᐸᐃᒄ ᓇᐸᐤ ᐊᒋ ᒪᔅᑲᔨᒋ ᐅᓯᑕ ᐊᑲ ᐅᒋ ᓂᑕᐅᑕᑦ ᐊᐅᑯᓐ ᒪᒃ ᓴᔅ ᑲ ᐃᓯᓇᑯᓯᒂ ᑲ ᐱᒪᑎᓯᑦ᙮ 9ᒪᒂᒡ ᒪᒃ ᐊᓐᑕ ᐊ ᐊᐱᑦ ᐊᓐ ᓇᐸᐤ ᒋ ᓂᑐᑐᐛᐤ ᐊᓂᔭ ᑈᓚ ᐊ ᐃᔨᒥᔨᒋ᙮ ᐃᔅᐱ ᒪᒃ ᑈᓪ ᑲ ᒋᔅᒐᔨᑕᐧᒃ ᐊ ᑕᑈᑎᒥᔨᒋ ᐊᓂᔭ ᓇᐸᐛ ᒐᒋ ᒥᓏᒋᐊᑭᓄᔨᒋ, ᑯᐃᔅᒄ ᒋ ᑭᓄᐛᐱᒪᐤ 10ᐊᑯ ᒂ ᐃᑕᑦ ᐊ ᒋᔄᐛᑦ, “ᐱᓯᑯ, ᓴᑐᑲᐳᐤ ᒪᒃ᙮” ᒋ ᐅᒋ ᐱᓯᑯᓯᐸᑕᐤ ᐊᓐ ᓇᐸᐤ, ᒂ ᐊᑎ ᐱᐸᒧᑕᑦ᙮
11ᐃᔅᐱ ᑲ ᐛᐸᑕᒡ ᐊᓐᒡ ᐃᔪᒡ ᑕᓐ ᑲ ᐃᑐᑎᒥᔨᒋ ᑈᓚ, ᒋ ᑕᑈᐅᒡ ᓚᐃᑯᓂᔭ ᐃᔨᒧᐅᓂᔪᐤ ᐊ ᐃᓯ ᐃᔨᒥᒡ, “ᒥᓂᑐᐅᒡ ᒋ ᐅᑎᑎᑯᓄᐅᒡ ᒧᔭᒻ ᓇᐸᐅᒡ ᐊ ᐃᓯᓇᑯᓯᒡ᙮” 12ᐊᓂᔭ ᐸᕐᓇᐸᔅ ᐊᐅᒄ ᐅ ᓱᐅᔅ ᒋ ᐃᑕᔨᒪᐅᒡ᙮ ᐊᑯ ᐊᓂᔭ ᑈᓚ ᐊᕐᒪᐃᔅ ᒋ ᐃᑕᔨᒪᐅᒡ᙮ ᐛᔅ ᐊᓂᔭ ᑈᓚ ᒧᔅ ᐎᔾ ᐊᒋ ᐃᔨᒥᔨᒋ ᐊᐅᒄ ᐅᔭ ᐊᕐᒪᐃᔅ ᐛᒋ ᐃᑕᔨᒪᒡ᙮ ᐛᔅ ᐊᐅᒄ ᑲ ᐃᓯ ᑕᑈᑕᒡ ᐊ ᐃᑎᔨᒋ ᐊᕐᒪᐃᔅ ᑲ ᐃᓯᓂᐧᑲᓱᔨᒋ ᐅᒥᓂᑐᐅᒧᐛᐛ᙮ 13ᒋ ᑕᐤ ᒪᒃ ᐊᔭᒥᐊᐅᒋᒪᐤ ᐊ ᐊᑐᔅᑯᐛᑦ ᐊᓂᔭ ᓱᐅᔅ ᑲ ᐃᓯᓂᐧᑲᓱᔨᒋ᙮ ᐊᓐ ᒪᒃ ᐊᔭᒥᐊᐅᒋᐛᑉ ᐊᓐᑕ ᑲᒋ ᒪᒥᒋᒪᑭᓄᐅᑦ ᐅ ᓱᐅᔅ ᐎᐎᑎᒥᒡ ᐊᓐᑕ ᐊᓐ ᐅᑕᓇᐤ ᒋ ᑎᑯᓐ᙮ ᐊᓐ ᒪᒃ ᐊᔭᒥᐊᐅᒋᒪᐤ ᒋ ᐎ ᐱᑎᑲᐊᐤ ᒥᔅᑐᓴ ᑭᔭ ᐛᐱᑯᓇ ᐊᓐᑕ ᐊ ᐃᔎᑕᒧᓂᔨᒡ ᐊᓂᔭ ᐅᑕᓇᔪᐤ ᒐᒋ ᒥᑐᔅᑕᐊᒪᓄᐎᒡ᙮ ᒋ ᐎ ᐃᑐᑎᒻ ᐅᔭ ᑭᔭ ᐊᓂᔭᔪᐛ ᐃᔪᐛ ᒋ ᐎ ᐃᑐᑎᒥᔪᐛ ᐊᒋ ᐎ ᒥᑐᔅᑕᐊᒧᐛᒡ ᐊᓂᔭ ᐊᑈᔅᑕᓇ᙮
14ᐃᔅᐱ ᑈᓪ ᑭᔭ ᐸᕐᓇᐸᔅ ᑲ ᒋᔅᒐᔨᒪᒡ ᐊᓂᔭ ᐃᔪᐛ ᒥᓂᑐᐧᑲᓐ ᐊ ᐎ ᐃᑕᐱᒋᐃᑯᒡ ᒋ ᐱᑯᐱᑎᒧᒡ ᐅᑦ ᐊᐱᒋᑕᐅᓄᐛᐛ ᐊ ᓄᑯᑕᒡ ᐊᑲ ᓇᐊᔨᑕᒡ ᐊᓂᔭ ᐛ ᑎᔨᒋ, ᐊᑯ ᑲ ᐃᔅᐸᔨᑐᒡ ᐊᓐᑕ ᐊᓂᔭ ᐃᔪᐛ ᐊ ᑕᔨᒋ ᐊᑯ ᒂ ᐃᑕᒡ ᐊ ᒋᔄᐛᒡ, 15“ᓇᐸᑐᒄ ᐊᑲᐎᔾ ᐃᑐᑎᒧᒄ ᐅ, ᓇᐸᐅᒡ ᐛᔅ ᐊᓐ ᑭᔭ ᓂᔭᓐ ᒧᔭᒻ ᒋᔨᐛᐤ ᐊ ᐃᑕᔨᑕᑯᓯᔭᒄ ᐊᐅᑯᓐ ᐊ ᐃᑕᔨᑕᑯᓯᔭᒡ᙮ ᒋ ᐎ ᐎᑎᒪᑎᓇᓐ ᒥᔽᒋᒧᐅᓐ ᒐᒋ ᐅᒋ ᐳᓂᐊᑯᒡ ᐊ ᐊᔭᒥᐊᔅᑎᐛᑯᒡ ᐊᓐᒡ ᓂᑎᒥᒄ ᒥᓂᑐᐧᑲᓐᒡ᙮ ᒥᔅᑯᒡ ᐊᓐᑕ ᒋᓴᒪᓂᑐᐤ ᑲ ᐱᒪᑎᓯᑦ ᐊ ᑕᑦ ᒐᒋ ᐃᓯ ᐊᔭᒥᐊᔭᒄ, ᐊᓐ ᑲ ᐅᓯᑕᑦ ᒋᒋᒋᓯᑯᔪᐤ, ᐊᔅᒋᔪᐤ, ᐎᓂᐸᑯᔪᐤ ᑭᔭ ᒥᓯᐛ ᒐᒂᔪᐤ ᐊᓐᑕ ᑲ ᐃᓯ ᐱᒪᑎᓯᒥᑭᓂᔨᒡ᙮ 16ᐅᑕᒡ ᐊᓐᑕ ᒋ ᐱᔅᑎᓇᐤ ᒋᓴᒪᓂᑐᐤ ᒥᓯᐛ ᐊ ᐃᑎᔅᑲᓇᓯᔨᒋ ᐊᐛᔪᐛ ᒐᒋ ᐃᓯ ᐱᒪᑎᓯᔨᒋ ᑕᓐ ᐛ ᐃᓯ ᐱᒪᑎᓯᔨᒋ ᑭᔭ ᒐᒋ ᐃᓯ ᐊᔭᒥᐊᔨᒋ ᑕᓐ ᐛ ᐃᓯ ᐊᔭᒥᐊᔨᒋ᙮ 17ᐃᔭᐱᒡ ᒪᒃ ᒋᓴᒪᓂᑐᐤ ᒧᔅ ᒋ ᒋᔅᒐᔨᑎᒥᐊᐤ ᐃᔪᐛ ᑕᓐ ᐊ ᐃᑕᔨᑕᑯᓯᑦ ᐊᓂᔭ ᐅᒋ ᑕᓐ ᑲ ᐃᓯ ᒥᔪᑐᑕᐧᒃ, ᒧᔭᒻ ᑭᔭ ᒋᔨᐛᐤ ᔅᒋ ᐃᑐᑎᒪᑯᐛᐤ ᒐᒋ ᒋᒧᓂᔨᒡ ᒐᒋ ᐅᒋ ᓂᑕᐅᒋᓂᔨᒡ ᒥᒋᒥᔪᐤ᙮ ᔅᒋ ᒥᔨᑯᐛᐤ ᒥᒋᒥᔪᐤ ᑭᔭ ᒋ ᐃᑐᑕᑯᐛᐤ ᒐᒋ ᒥᔽᔨᑎᒪᒄ᙮” ᐊᐅᒄ ᐅᔭ ᑲ ᐃᑕᑦ ᑈᓪ ᐊᓂᔭ ᐃᔪᐛ ᐊ ᐎ ᓂᑲᐛᑦ ᐊᓂᔭ ᐊ ᐎ ᐊᔭᒥᐊᔅᑕᑯᒡ᙮
18ᐊᑎ ᒪᒃ ᐅᔭ ᐊᒋ ᐃᓯ ᐎᑎᒧᐛᑭᓄᐎᒡ ᐅᒡ ᐃᔪᒡ ᐃᔭᐱᒡ ᒋ ᐎ ᓂᐸᐊᐅᒡ ᒥᔅᑐᓴ ᒐᒋ ᒥᑐᔅᑕᐊᒧᐛᒡ ᐊᓂᔭ ᐊᑈᔅᑕᓇ᙮ ᒐᒃ ᒪᒃ ᑲ ᓴᐧᑯᒋᒥᑯᒡ ᐊᓂᔭ ᐊᑈᔅᑕᓇ ᒐ ᐊᑲ ᒋ ᐃᑐᑕᒡ ᐅᔭ᙮
19ᐱᔅᒐ ᒍᐤ ᐃᔪᒡ ᒋ ᐅᑐᑕᐅᒡ ᐊᓐᑕ ᐊᓐᑎᔭᑭᒡ ᐊᓐ ᐅᑕᓇᐤ ᐊᓐᑕ ᐱᓯᑎᔭ ᐊᔅᒋᒡ ᑲ ᑎᒂᒡ, ᑭᔭ ᐱᔅᒐ ᐊᓐᑕ ᐊᐃᑯᓂᔭᒻ ᒋ ᐅᑐᑕᐅᒡ, ᐊᑯ ᑲ ᓴᐧᑯᒋᒪᒡ ᐊᓂᔭ ᐃᔪᐛ ᒐᒋ ᐎᒋᐃᑯᒡ ᐊ ᐎ ᓂᐸᐊᒡ ᑈᓚ᙮ ᐊᑯ ᑲ ᐸᐱᒧᓯᓇᑕᐛᒡ ᐊᑯ ᑲ ᐎᐎᑕᐸᑕᒡ ᐊᓐᑕ ᐊᓂᔭ ᐅᑕᓇᔪᐤ ᐊᒋ ᐃᑕᔨᒪᒡ ᐊ ᓂᐱᔨᒋ ᐊᓂᔭ ᑈᓚ᙮ 20ᒥᒄ ᒪᒃ ᐃᔅᐱ ᐊᓐᒡ ᑲ ᑕᑈᔭᔨᒪᒡ ᒋᓴᓴ ᑲ ᐛᔅᑲᑲᐳᔅᑐᐛᒡ ᐊᓂᔭ ᑈᓚ, ᒋ ᐅᓂᐤ ᐊᑯ ᒥᓐ ᑲᐤ ᑲ ᐱᒐᑦ ᐊᓂᔭ ᐅᑕᓇᔪᐤ᙮ ᒥᓐ ᒪᒃ ᐊᓂᔭ ᐎᔭᐱᓂᔨᒡ ᑈᓪ ᑭᔭ ᐸᕐᓇᐸᔅ ᐊᓐᑕ ᑎᕐᐱᒡ ᒋ ᐃᑐᑕᐅᒡ᙮
ᑈᓪ ᑭᔭ ᐸᕐᓇᐸᔅ ᑲᐤ ᑲ ᒋᐛᒡ ᐊᓐᑕ ᐊᓐᑎᔭᑭᒡ ᐊᓐᑕ ᓯᕆᔭ ᐊᔅᒋᒡ ᑲ ᑎᒂᒡ ᐅᑕᓇᐤ
21ᑈᓪ ᑭᔭ ᐸᕐᓇᐸᔅ ᒋ ᐛᐎᑎᒧᒡ ᒥᔽᒋᒧᐅᓂᔪᐤ ᐊᓐᑕ ᑎᕐᐱ, ᒥᒐᑦ ᒪᒃ ᐊᐛᔪᐛ ᒋ ᑕᑈᔭᔨᒪᔪᐛ ᒋᓴᓴ᙮ ᐊᑯ ᒥᓐ ᑲᐤ ᐊᓐᑕ ᓕᔅᑐᕋ ᒂ ᐃᑐᑕᒡ, ᒥᓐ ᐊᓐᑕ ᐊᐃᑯᓂᔭᒥᒡ, ᐊᑯ ᒥᓐ ᐊᓐᑕ ᐊᓐᑎᔭᑭᒡ᙮ 22ᐊᑯᑕ ᐊᓐᑕ ᑲ ᐃᔨᒪᐊᒡ ᐊᓂᔭ ᐊᐛᔪᐛ ᑲ ᑕᑈᔭᔨᒪᔨᒋ ᒋᓴᓴ ᐊ ᓯᒋᒪᒡ ᒐᒋ ᒪᒥᒋᒥᓂᒥᔨᒋ ᐅᑕᑈᑎᒧᐅᓂᔪᐤ᙮ ᒋ ᐃᑕᐅᒡ ᑭᔭ ᐊ ᓂᑐᐛᔨᑕᑯᓂᔨᒡ ᐊᐛᓐ ᒐᒋ ᓂᒋᔅᑲᐧᒃ ᓂᓇᐧᑯᐤ ᒐᒂᔪᐛ ᐊ ᐊᔨᒥᓂᔨᒋ ᒐᒋ ᐱᒐᑦ ᒋᓴᒪᓂᑐᐛ ᐅᒋᓴᐅᒋᒪᐅᓂᔨᒡ᙮ 23ᐊᑯ ᒪᒃ ᒥᓯᐛ ᐊᓐᑕ ᑲ ᐊᑎ ᑕᔨᒋ ᐅᒪᒧᐊᔭᒥᐊᐛ ᑈᓪ ᑭᔭ ᐸᕐᓇᐸᔅ ᒋ ᐎᔭᔨᒪᐅᒡ ᐊᐛᔪᐛ ᒐᒋ ᓂᑲᓂᔅᑯᐛᔨᒋ ᐊᓂᔭ ᐅᒪᒧᐊᔭᒥᐊᐛ ᐊᓐᑕ ᑲ ᑕᔨᒋ᙮ ᐃᔅᐱ ᒪᒃ ᑲ ᒋᔅᑕᒡ ᐊᓂᔭ ᐊ ᐊᑲ ᒥᒋᓱᒡ ᒥᒄ ᐊ ᐊᔭᒥᐊᒡ ᐊᑯ ᑲ ᐊᔭᒥᐊᔅᑎᒧᐛᒡ ᒐᒋ ᐊᐱᒋᐃᑯᒡ ᐅᑎᐸᔨᒋᒐᐛ, ᐊᓂᔭᔪᐛ ᑲ ᑕᑈᔭᔨᒪᒡ᙮
24ᐃᔅᐱ ᒪᒃ ᑲ ᓴᐳᔅᑲᒡ ᐊᓂᔭ ᐊᔅᒋᔪᐤ ᐱᓯᑎᔭ ᑲ ᐃᓯᓂᐧᑲᑕᔨᒡ ᐊᑯ ᐊᓐᑕ ᐸᒻᐱᓕᔭ ᑲ ᐃᓯᓂᐧᑲᑕᔨᒡ ᐊᔅᒋᔪᐤ ᒂ ᐱᒐᒡ᙮ 25ᒂ ᐛᐎᑕᒡ ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᐊᓐᑕ ᐸᕐᑲᒡ᙮ ᐊᑯ ᒥᓐ ᐊᓐᑕ ᐊᑕᓕᔭᒡ ᒂ ᐃᑐᑕᒡ᙮
26ᐊᑯᑕ ᒪᒃ ᐊᓐᑕ ᐅᒋ ᑲᐤ ᒂ ᐃᔅᒋᒪᒡ ᐊᓐᑕ ᐊᓐᑎᔭᑭᒡ, ᐊᓐᑕ ᑲ ᐅᒋ ᒋᑎᓴᐛᑭᓄᐎᒡ ᑭᔭ ᑲ ᒋᔅᑕᒡ ᐊᓂᔭ ᐊᑐᔅᒐᐅᓂᔪᐤ ᑲ ᐃᑎᓱᒪᑭᓄᐎᒡ ᒐᒋ ᐃᑐᑕᒡ᙮ ᐊᔅᒄ ᒪᒃ ᐊᑲ ᐅᒋ ᔅᑐᑕᒡ ᐊᓐᑎᔭᑭᒡ ᐅᒋ, ᒋ ᐊᔭᒥᐊᔅᑎᒪᑯᐅᒡ ᐃᔪᐛ ᒐᒋ ᓱᐛᔨᒥᑯᒡ ᒋᓴᒪᓂᑐᐛ ᒪᒂᒡ ᐊ ᐊᑐᔅᒐᔅᑐᐛᒡ᙮ 27ᐃᔅᐱ ᒪᒃ ᑲᐤ ᒪᓯᑲᒡ ᐊᓐᒡ ᐊᑈᔅᑕᓇᒡ ᐊᓐᑕ ᐊᓐᑎᔭᑭᒡ, ᒋ ᓂᔅᑐᓇᐅᒡ ᐊᓂᔭ ᒥᓯᐛ ᐅᒪᒧᐊᔭᒥᐊᐛ ᐊ ᐛᐎᑎᒧᐛᒡ ᑕᓐ ᑲ ᐃᑐᑎᒥᔨᒋ ᒋᓴᒪᓂᑐᐛ ᐎᔨᐛᐤ ᐊᒋ ᐊᐱᒋᐃᑯᒡ᙮ ᐊᑯ ᒪᒃ ᐊᓐᒡ ᐃᔪᒡ ᒋ ᐎᑎᒪᑯᐅᒡ ᐊᓂᔭ ᐊᑈᔅᑕᓇ, ᐊᓂᔭ ᐃᔪᐛ ᐊᑲ ᒍᐤ ᑲ ᐃᑎᔅᑲᓇᓯᔨᒋ ᑭᔭ ᐎᔨᐛᐤ ᐊ ᑕᑈᔭᔨᒪᒡ ᒋᓴᓴ᙮ 28ᐊᑯᑕ ᒪᒃ ᐅᑕ ᑲ ᑕᒡ ᓇᐅᔅ ᑈᓪ ᑭᔭ ᐸᕐᓇᐸᔅ ᐊᓂᔭ ᑲ ᑕᑈᔭᔨᒪᔨᒋ ᒋᓴᓴ ᐊ ᑕᔨᒋ᙮
Currently Selected:
ᐊᑈᔅᑕᓇᒡ 14: ᓇᔅᑲᐱ
Highlight
Share
Copy
Want to have your highlights saved across all your devices? Sign up or sign in
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
