गलाती 3

युँ हुप्‍न्‍या स़ोनो मोसाए ओकानुन

1ए काता ज़ मातीधुज़्याव गलातीर, जे ङ़ादा परमेस्‍वरए ओपाँ जेथैक येसु ख्रीस चबनै जेङ़ाक क्रुसत उसिउ मिताव ब जेरँःके। आज्‍याल कै जेताव इताव, काताए ओमोहोनए नै ओजैचिज़्‍याव? 2जे ङालाई तोबो पाँ है दाँचिके, जे मोसाए ओकानुनलाव य़ेन जेदोवनी छैंव पुरूस जेदैव सैं परमेस्‍वरए ओपाँ थैद जेयुँ जेसुहुबोनी जेदैव? 3जे कै जैद इताव आः मातीधुन्‍यार जेताव? छैंव पुरूसनी जेयुँल साःरो थालिद जेनैज़्‍यावलाई कै जैद जेसक्तीनी सयो·व जेपैंज़्‍याव? 4नो आक पैकाव जेक्‍याँताव जेसहिउ भरी अऩाकलाव ओतारिज़्‍याव सैं साचो ज़ उथ॰रिरिज़्‍याव? 5जेलाई ओल उपुरूस जोरैद्याद जेखार्ल अचम्‍बलाव य़ेनर दोद्याज़्‍याव परमेस्‍वरए जेलाई मोसाए ओकानुन जेदोज़्‍याव रँःद ओदोज़्‍याव सैं ओल ओपाँ थैद जेयुँ जेसुहुबोनी ओदोज़्‍याव? 6धर्मसास्‍त्रल ब गेपुर्खा अब्राहामए उजूँनी अइ लिद सर्सिउ लिज़्‍या,

“परमेस्‍वरलाई उयुँ उसुहुबोनी ज़ परमेस्‍वरए नोलाई धर्मी थ·रैक्‍यो।”#उत १५:६

7ननी ज़ रैंःज़्‍या, जो जोराए परमेस्‍वरलाई यायुँ हुप्‍ज़्‍या, हो होर वाज़ साचो अब्राहामए ओथोर ताज़्‍यार।

8धर्मसास्‍त्रल परमेस्‍वरए ङ़ादा ज़, ‘छुत जातलावर ब यायुँ यासुहुबोनी ज़ ङायुँलाव मितावर तारिज़्‍यार’ लिन्‍या सैंद अब्राहामलाई अइ लिद सतैंदिक्‍यो,

“नँ नयेमनी ज़ प़ाइँ जातलाव मिँराए परमेस्‍वरए ओअसिक दैरिज़्‍यार।”#उत १२:३

9है जैद किताव अब्राहामए उयुँ उसुहुबोनी असिक ओदैव, हिताव ज़ यायुँ सुहुप्‍ज़्‍याव भरिए आज्‍याल ब परमेस्‍वरए ओअसिक दैज़्‍यार। 10कानुननिकाव येमनी परमेस्‍वरए ल्‍योदा बाव पैंज़्‍यावर ते झन सजा दैरिज़्‍यार। काराव ल्‍यो ताकिन धर्मसास्‍त्रल इताव सर्सिउ लिज़्‍या,

“कानुनलाव सर्सिउ य़ेन भरी मासयो·धुज़्‍याव मिँ सजाल परिरिज़्‍या।”#ब्य २७:२६

11परमेस्‍वरए ओङ़ाक कानुनलाव य़ेननी सु ज़ परमेस्‍वरए उयुँलाव मिताव माताधुर। काराव ल्यो ताकिन धर्मसास्‍त्रलाव सर्सिउ मितावनी ज़,

“उयुँ हुप्‍द परमेस्‍वरस खैव मिँ वाज़ बाँचिज़्‍या।”#हब २:४

12कानुनलाव येम ते युँ हुप्‍न्‍यानिकाव येम मिताव माःक। धर्मसास्‍त्रल ब,

“कानुनलाव य़ेन माबिरैद दोज़्‍याव मिँ वाज़ बाँचिज़्‍या।”#लेबी १८:५

13गे गेमासयो·धुज़्‍याव कानुननिकाव दैव परिन्‍या सजाल ओल ख्रीस थाँसिद क्रुसत तङ्गैसिद गेसजा भरी घुर्द नो सजानी पले·सिक्‍यो। धर्मसास्‍त्रलाव सर्सिउ मिताव ज़,

“क्रुसत तङ्गैसिद सिज़्‍याव भरी परमेस्‍वरए ओसजा दैवर ज़।”#ब्य २१:२३

14परमेस्‍वरए अब्राहामलाई ओयो असिक छुत जातलाव मिँराए मनी येसु ख्रीसए ओक्‍याँनी ज़ दैज़्यार। ननी ज़ फरी गे ओललाई गेयुँ हुप्‍ज़्याव भरिए परमेस्‍वरए है दाद ओनैसिज़्‍याव छैंव उपुरूस ब गेदैज़्‍या।

कानुननी माःक, य़ाकानी ची

15अ ङानैं ङामेंर, जेलाई गे मिँराए गेचलननी परमेस्‍वरए ओपाँ तोबो पलास्‍द ङायाचिरिज़्‍या। ऩेब्‍लो मिँनी निखार्ल तोबो बाचा नैद, सर्द निसही छाप झाःद निनैकिन नत सुए ज़ माचा·धुर, माघतैधुर। 16हो मिताव ज़ परमेस्‍वरए अब्राहामलाई ओथोस य़ाका तोबो याद उनिनैज़्याव। धर्मसास्‍त्रलाव नो य़ाका अब्राहामए ओथो भरिरास माःक, तोबोए ओक्‍याँत वाज़ यो·के — नो ख्रीस ज़।#उत १२:७ 17नो है ङादाचिज़्‍यावए ओअर्थ आव ज़, नो परमेस्‍वरए अब्राहामस ओनैव बाचाकिन चार सय तीस बर्स छींनी हुव मोसाए ओकानुननी ब नो ङ़ादा ओएधुव य़ाकालाई माख्याव।#प्रस १२:४० 18परमेस्‍वरए नो असिक भरी अब्राहामलाई कानुननी ओयो माःक, य़ाकानी ओयो ची। काराव ल्‍यो ताकिन नो असिक परमेस्‍वरए छींनी कानुननी दैन्‍या ओजैव ताकिन अब्राहामलाई ओएधुव य़ाका अऩाकलाव ज़ तान्‍या ओल्‍यो।

19जे फरी, “हिताव ताकिन ते परमेस्‍वरए मोसालाई नो कानुन काराव ओयो?” है जेलिज़्‍याखेहो। परमेस्‍वरए नो कानुन मिँराए यापाप सतैंद्यान्‍याए जूँनी अब्राहामए ओथोलाव ख्रीस ओमाहुवा पै वाज़ ओयो। नो कानुन परमेस्‍वरए ओचाकर्‍याराए ल्‍योनी थालिद मोसाए उकुइनी मिँरालाई याएक्‍यो। 20परमेस्‍वरए अब्राहामलाई ओयो य़ाका ते त्‍यालाए ल्‍योनी माःक, एकसब्‍द्या ज़ ओल परमेस्‍वरए ल्‍योनी ज़ हुके।

21हैदी ब मोसाए ओकानुन परमेस्‍वरए अब्राहामलाई ओयो य़ाकाकिन तँदा माले। नो कानुनए मिँरालाई परमेस्‍वरस सखैद साःरो युँ जैद ओरायो ताकिन मिँर नो कानुननी परमेस्‍वरए उयुँलाव मितावर ताखेरहो। 22खाली कानुनए ओय़ेन ते मिँरालाई पापए उधूँल क्‍योःद ओरानैज़्‍याव मिताव सरैंःन्‍या लिज़्‍या। नो पापल क्‍योःसिद लिज़्‍यावरानी जो जोराए येसु ख्रीसलाई यायुँ सुहुप्‍ज़्‍यार, हो होराए ज़ परमेस्‍वरए अब्राहामलाई ओयो य़ाकालाव असिक दैज़्‍यार।

23हैदी मनी परमेस्‍वरए ख्रीसनिकाव युँ हुप्‍न्‍या येम ओमासतैंवा पै कानुनए गेलाई घिरिद ओनैसिज़्‍याव मिताव गेल्‍यो। 24है जैद ख्रीसलाई युँ हुप्‍द परमेस्‍वरए उयुँलाव मिताव तान्‍यादा लाँन्‍याए जूँनी कानुनए गेलाई ख्रीसए ल्‍योक ओसारैसिउ मिताव ज़ ताके। 25है जैद युँ हुप्‍द परमेस्‍वरए उयुँलाव मिताव गेतावए हाःकिन गे नो कानुनए उधूँल गेमाले।

युँ हुप्‍न्‍यानी परमेस्‍वरए ओज़ार गेताज़्‍या

26है जैद जे प़ाइँ येसु ख्रीसलाई जेयुँ उहुबोए परमेस्‍वरए ओज़ार ज़ जेताके। 27जे ख्रीसए उमिनत सछैंसिउर परमेस्‍वरए ओङ़ाक ओल ख्रीस मितावर ज़ जेताके। 28हाःकिन जे यहूदी मायहूदी है लिन्‍या ओमेला ब माले, बाँदा माबाँदा है लिन्‍या ब माले, खेपा मेंमा है लिन्‍या ब माले, प़ाइँ ज़ येसु ख्रीसनी तोबो ज़ जेताके। 29ख्रीसए उमींर जेतावए जे ब अब्राहामए ओथोलाव य़ाकालाव असिक दैवर ब जेताके।

Currently Selected:

गलाती 3: NKham

Highlight

Copy

Compare