कलस्‍सी 1

1ङा पावल, परमेस्‍वरए ओखतैनाव येसु ख्रीसए ओसाची स़ोनो ङास लिज़्‍याव गेभाइ तिमोथीस गिन्‍ल्‍योनी, 2जे कलस्‍सेलाव ख्रीसए उमिनताव छैंवर स़ोनो ओसतत लिज़्‍यावरालाई आव चिथी परींद गिन्‍याचिज़्‍या। जेल्‍योदा गेबाबु परमेस्‍वरए उयुँ गराँद जेयुँ होलाँ जैद ओयाचिउक।

जेजूँनी धन्‍याबाद गिन्‍चरैःज़्‍या

3गिन परमेस्‍वर गेबाबु स़ोनो गेप्रभु येसु ख्रीसनिलाई गिन्पोंखारिक जेजूँनी धन्‍याबाद चरैःव ज़ गिन्‍नैज़्‍या, 4काराव ल्‍यो ताकिन जे येसु ख्रीसए ओल्‍योदा जेयुँ जेसुहुप्‍ज़्याव, स़ोनो छैंव उमींराए ल्‍योदा मया जेदोज़्याव गिन्‍थैके। 5नो जेयुँ हुबो स़ोनो जेमया ते स्‍वर्गताव जेजूँनी नैसिउलाई आस दाद जेनैज़्‍यावनी ज़। नो आस ते ङ़ादा साचो चाव थानी ज़ थैद जेनै। 6नो जेल्‍योदा हुव चाव था ज़ संसार भरिल रा·सिद प़ाइँङ ज़ फाबिद ले। है जैद जे मनी नो पाँर दैद परमेस्‍वरए उयुँ ओगराँव ते इतावनी ची ओल्‍यो लिन्‍या जेतीव छ्यामकिन ज़ जेल्‍योङ मनी परमेस्‍वरए ओपाँर फाबिद बा·नाकेर। 7नो पाँर ङ़ादा इपाफ्रासए ल्‍योनी जेदैके। नो मिँ गिनस सिप य़ेन दाज़्‍याव गिनयुँलाव गिननैं ज़। जे जेजूँनी ब ख्रीसए ओय़ेन फिस्‍को माजैद ज़ दोज़्‍याव। 8जे परमेस्‍वरनिकाव खैन्‍या पुरूस दैद नैं मेंरास खैद जेलिज़्‍याव ब नोए ओल्‍योनी ज़ गिन्‍थैके।

9है जैद नो पाँ गिन्‍थैव छ्यामकिन ज़ ‘परमेस्‍वरनी यादैव पुरूसनी याबुद्धीर छिप्‍नाद, परमेस्‍वरए ओपैंज़्‍यावलाई झन ज़ ओप़ाल्‍नारक’ लिद जेजूँनी परमेस्‍वरलाई पोंखारिउ ज़ गिन्‍नैज़्‍या। 10हो ताकिन ची जे गेप्रभुए उमिनतावरालाई ओरासहिज़्‍याव मितावर ताद, प़ाइँत ज़ उयुँलाव मितावर जेताज़्या, स़ोनो ओललाई झन ज़ सरेस्‍नाद चाव य़ेन दान्‍यात जेफाबिज़्या। 11जो मिताव दुखराल तादी ब थ॰रिउर, रेंद ज़ सहिधुन्‍यार जैन्‍याए जूँनी ओल परमेस्‍वरए ज़गै मगैव ओसक्तीनी जेयुँर सघ्योःद ओयाचिउक। 12प़ाइँत ज़ परमेस्‍वर गेबाबुलाई धन्‍याबाद ब चरैःच्‍यो। होए ज़ गेलाई उमींर जैद उमिनताव छैंवरास स्‍वर्गताव ओबताहा दैन्‍याकावर जैद नैसिउ। 13चुम चुमोलाव सैतानए ओराज्‍यानी हाइद उयुँलाव ओज़ाए ओराज्‍याल झाःसिक्‍यो। 14नो ओज़ाए ओल्‍योनी ज़ गेङ़ैताव रिन भरी फो·सिद गेदोव पापनी गेऱास्‍सिके।

ख्रीस प़ाइँए ङ़ैताव ज़

15नो ख्रीस, गेमारँःधुज़्‍याव परमेस्‍वरए उसुरूप ज़। जैसिउ भरिरानी ङ़ादाकिन ज़ उलिज़्याव। 16ताज़्‍याव भरी ओलनी ज़ ताहुकेर — नमतावर तादी ब, नामलावर तादी ब, रैंःज़्‍यावर तादी ब, मारैंःज़्‍यावर तादी ब, यासक्ती ल्‍योर तादी ब, घेप्‍पार तादी ब, ङ़ैतावर तादी ब, हक दैवर तादी ब, प़ाइँ ओलनी ज़ ओल उजूँनी ज़ ताकेर। 17उपुर काता ज़ ओमाताद ओल वाज़ उलिज़्‍याव। ओराजैव भरी ब ओलनी वाज़ रहिज़्‍यार। 18ओल मन्‍दलीए ङ़ैताव ज़, मन्‍दली फरी ओल ओक्‍याँ ज़। प़ाइँनी ज़ ङ़ात ताद सिद ओसैंसिउए अजम्‍बरी जुनी दैन्‍याराए याङ़ात ब ताके। है जैद जुनी तादी ब ओल ज़ प़ाइँए ङ़ैताव लिज़्‍या। 19ओगे भरी ख्रीसए ओक्‍याँत झाःद्यान्‍या परमेस्‍वरए ओल ओमाहाँनी ज़ जैक्‍यो। 20माखैज़्याव भरी ओल्‍योदा सखैन्‍या ब ख्रीसनी ज़ जैक्‍यो। ख्रीसए क्रुसत उजिउ झाःद उझी सोभोद नमतावर तादी ब, नामलावर तादी ब, प़ाइँलाई परमेस्‍वरस यासखैक्‍यो।

ख्रीसए परमेस्‍वरस ओसखैचिउ

21जे ङ़ादा माचाव य़ेनर माचाव बिचारर जेदोवए परमेस्‍वरकिन तादा ताद उसुतुरर जेल्‍यो। 22अब ते जे नितावरालाई ब परमेस्‍वरए ओङ़ाक छैंव जेखत माल्‍योर जैन्‍याए जूँनी ख्रीस मिँ मिन्‍सिद उजिउ झाःद्याद परमेस्‍वरस सखैद नैचिउ। 23जे दान्‍या भरी आव ज़ — परमेस्‍वरए ओपाँत ग्‍याल गिल माताद थ॰रिद लिच्‍यो। चाव थानिकाव जेदैव अजम्‍बरी जुनीए आस ब ताऱास्‍च्‍यो। नो पाँ संसार भरिल रा·सिद प़ाइँङ ज़ थास्‍द ले। ङा पावल आव पाँए ओसाची यान्‍यात ओनोकोर खतैसिउ ङालिज़्‍या।

साःरो पाँए जूँनी ङा ख्रीसए ओनोकोर

24परमेस्‍वरए ओय़ेनत जे जेजूँनी दुख सहिन्‍या ब खुसी ज़ ङालिज़्या। किताव ख्रीसए गेजूँनी कुधु दुखर सहिद ओयासिउ, हिताव ज़ ङा मनी जे ख्रीसए ओक्‍याँ, अथबा ओमन्‍दलीए जूँनी मादुम्‍ताव ख्रीसए उदुखर ङासुदुम्‍ज़्‍या। 25ङा परमेस्‍वरए ओल्‍योनी हक दैद जेजूँनी ओपाँ भरी सथैन्‍यात मन्‍दलीए ओसेवा दान्‍या खतैसिउ ङालिज़्‍या। 26नो पाँए ओअर्थ जुक जुक स़ोनो प़िरी पुस्‍ताकिन ज़ कप्‍सिउ ओल्‍यो। आज्‍याल ते ख्रीसए छैंव उमींरालाई फैसिउ लिज़्‍या। 27नो ङ़ादाकिनकाव कप्‍सिउ अचम्‍बलाव उगुन ल्‍यो पाँ प़ाइँ मिँराए जूँनी लिज़्या लिन्‍या परमेस्‍वरए जे छैंव उमींरालाई सतैंद्यान्‍या युँ दोक्‍यो। नो पाँ आव ज़ — ख्रीस जेस लिज़्या। ननी ज़ अजम्‍बरी जुनीए आस ताज़्‍या।

28है जैद प़ाइँ मिँरालाई ख्रीसए उजूँनी गेरासथैज़्‍या। नोरालाई प़ाइँनी ज़ सम्‍जैद चावस अर्थैद ख्रीसए ओल्‍योदा कातानी पाखो गेराजैके लिद गेरापैज़्‍या। 29ङा मनी नो य़ेनत ङाक्‍याँत लिज़्‍याव ख्रीसए ओसक्तीनी बनै धामास ङादोज़्‍या।

Currently Selected:

कलस्‍सी 1: NKham

Highlight

Copy

Compare