कलस्सी 2
2
कलस्सीराए जूँनी पावलए ओधामा
1ङा जेजूँनी बनै धामा ङादोज़्याव ब सैंच्यो। खाली जेलाई वाज़ माःक, जे मिताव ङामादैसिताव लाउदिकिया सहरलावर स़ोनो छुत छुत नाखारलावराए जूँनी ब ङादोज़्या। 2ङा जेस ङापैंज़्याव भरी आव ज़ — जे जेल खैद जेयुँर झेंःव ओताक, स़ोनो परमेस्वरए कप्सिउ ओपाँए ओअर्थ भरी तीद नो पाँत यायुँर झन ज़ उहुप्नाक है ङालिज़्या। नो पाँए ओअर्थ भरी ओल ख्रीस ज़। 3परमेस्वरए उबुद्धी स़ोनो ओग्यान भरी ख्रीसए ओक्याँत ज़ दैसिज़्या। 4है जैद फसङ्गैन्या पाँर जती मोहोन्यालो उलिदी ब जे सु ज़ नो पाँरानी ताझुकिच्यो लिद ङा है ङादाचिज़्या। 5ङा आव ङाक्याँ जेस ओमालिदी ब ङायुँ ते जेस ज़ लिज़्या। है जैद ख्रीसए ओपाँत मुइलिउर थ॰रिउर जेलिज़्याव थैद ङायुँ रेंव ज़ लिज़्या।
6है जैद किताव ख्रीस येसुलाई प्रभु ज़ लिद जेभैंःव हिताव ज़ दोनाच्यो। 7स़ोनो नो जेपैसिउ पाँत जेयुँ थ·रैद ख्रीसए ओक्याँत पाथ परिद जेयुँ झन ज़ सुहुप्नाद धन्याबाद चरैःव ज़ नैच्यो।
ससैसिउ पाँरानी ताझुकिच्यो
8जेलाई सुवाराए फसङ्गैन्या बुद्धीनिकाव पाँर यासथैचिकिन ननी ताझुकिच्यो। नो अऩाकलाव पाँर मिँराए याथितीनी ससैसिउर वाज़ लिज़्यार। नो पाँ ख्रीसए उजूँनी माःक, अइज़ सिर्जैसिउ पाँर वाज़ लिज़्यार। 9परमेस्वरए साचो ओगे भरी मिँ मिन्सिउ ख्रीसए ओक्याँत ज़ लिज़्या। 10नो ख्रीस प़ाइँ सक्तीर स़ोनो घेप्पाराए याङ़ैताव लिज़्या। होस तोबो ताद वाज़ जे मनी यो·वर ताद जेले।
ख्रीसस साःरो तावर
11जे मिँए उकुइनी क्याल्न्या सरेस जैसिउर माःक, ख्रीसनी जैसिउर ची। नो ख्रीसनिकाव सरेसनी ते पाप दाव परींज़्याव ङ़ादाकिनकाव जेक्याँनी फुर्सुल तावर जेलिज़्या। 12ख्रीसए उमिनत जेसछैंसिक नो ङ़ादाङाव जेक्याँलाई खादरल जेझाःके। ख्रीसलाई सिउनी सोचोइज़्यावए जेलाई मनी जेयुँ जेसुहुबोए साःरोल रैचिक्यो। 13जे ङ़ादा क्याल्न्या सरेस माजैसिज़्याव, मादान्या य़ेनर दोज़्याव छुत जातलाव मिँर जेतावए परमेस्वरनी सिउल गनिसिउर जेल्यो। हैदी ब ख्रीसस साःरो जुनील रैचिक्यो। परमेस्वरए गे प़ाइँए गेपाप क्याल्द्याद, 14नो ङ़ादाङाव मादान्या गेदोव गेङ़ैताव रिन भरी ख्रीसस क्रुसत तङ्गैद फो·द्यासिक्यो। 15नो क्रुसत ज़ सैतानलाई ओचाकर्यारास हारैद यासक्ती भरी हाइद्याद प़ाइँए रँःन्यात यापाहा झाःद याएक्यो।
कानुनलाव चलनर ख्रीसए ओसाँ ज़
16है जैद जेलाई ज़्यान्या ओन्याराए जूँनी स़ोनो बारिन्या बारर मानिन्या पर्बराए जूँनी जे जेखार्ल सुए सुलाई ज़ कर लैसिन्या ताताक। 17नो भाःकिनकाव चलनर हुन्या पाँए ओसाँए जूँनी वाज़ उलिज़्याव। नो साँए साचो ओक्याँ ख्रीस ज़। 18तँनिकाव यापाँरानी सुए ज़ जेलाई ख्रीसनिकाव जेदैव बाजीलाई चुकैव तादैरक। नोराए यापाँ आव ज़ — मुइलिउ मिताव जैसिन्या, नमताव चाकर्याराए यातपस दान्या स़ोनो झजल्किद कातार रँःन्या। ननी ज़ या ब सघ्योःसिद, 19प़ाइँराए ङ़ैताव ख्रीसलाई ऱास्ज़्यार। गे ओक्याँत लिज़्यावर ते ओल ख्रीसस जोरैसिद गेर्सा गेमिन भरी ननी ज़ ताद परमेस्वरए ओपैंज़्याव मिताव यादा ज़ गेतानाज़्या।
जेऱासो चलनदा फरी ताबाच्यो
20जे भाःकिनकाव थालिसिउ पाँर ऱास्द ख्रीसस सिप ज़ जेसिउ ताकिन कै जैद नो मानुवाताव मितावर ताद नो ऱास्सिउ चलनदा फरी बान्या? 21नलाव पाँर ते जम्मा ‘ताज़्युच्यो, ताछुच्यो, ताचलैच्यो’ है लिन्यार वाज़ लिज़्यार। 22नोर अइज़ चिद खेम्न्यार वाज़ लिज़्यार। भाःकिनकाव मिँराए यादोहुव चलन वाज़ लिज़्या। 23नो चलनर मानिज़्यावर धर्म-कर्म दाव ज़ लिज़्यार, मुइलिउ मिताव जैसिउ ज़ लिज़्यार स़ोनो याक्याँलाई दुख याव ज़ लिज़्यार। रँःक ते नो मिँर यागहक ल्यो स्यासोर ज़ रैंःज़्यार। खाली निताव चलनराए ते यायुँए ओपैंज़्याव माचाव पाँलाई मावैंधुवर।
Currently Selected:
कलस्सी 2: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
