२ तिमोथी 2
2
ख्रीसए ओय़ेनत चाव सिपाईं मिताव जैसिन्या
1है जैद नँ ङाज़ा तिमोथी, येसु ख्रीसए उयुँ नल्योदा ओय़ालोए बनै थ॰रिद ज़ लिनी। 2परमेस्वरए उमिनतावराए याङ़ाक ङा नँलाई आव य़ेनत ङाखतैनिउ बेलाक ङाल्योनिकाव नथैव भरी नँ मनी छुत नयुँ हुबो मिँरालाई नो पाँर सथैद याखतैयो। नोराए मनी हितावनी ज़ छुतरालाई ब ओरापैरक। 3येसु ख्रीसए ओसेवा दान्यात चाव सिपाईं मिताव जैसिद ङा ङासहिज़्याव मिताव दुखर नँ ब सहियो। 4फौजीलाव सिपाईंए मनी कमान्दरलाई सरेंन्याए जूँनी ओल ओय़ेन दान्यादा लन्था ज़ मादोव। 5हो मिताव ज़ खेलल दाँजिसिज़्याव मिँए मनी रैःसिउ परिन्यानी ओरैःसिकिन वाज़ बाजी दैन्याकाव ताज़्या। 6स़ोनो, एँःलाव य़ेन दोज़्यावरानी जोए कोसै धामा दोज़्याव, होए ज़ प़ाइँरानी ङ़ाताव सै दैज़्याव। 7आव है ङादींज़्याव पाँरालाई नयुँल खामिद य़ाका नदोकिन परमेस्वरए नँलाई प़ाइँल ज़ तीधुन्या जैन्या ले।
8ङा ङारासथैज़्याव दाऊद राजाए ओथोलाव, सिउनी सोव येसु ख्रीसलाई नयुँल नैयो। 9नो चाव था सथैन्यानी ज़ दुखर दैद ङानै। अपराधी मिताव साँगलए किद झ्यालखानाल थुनैद नैनार। हैदी ब परमेस्वरए ओपाँलाई ते सुर्द मानैधुर। 10है जैद परमेस्वरए ओराछाँतिउराए येसु ख्रीसनिकाव ज़गै मगैवलाव अजम्बरी जुनी यादैकिन ताखेहो लिद नोराए जूँनी प़ाइँ दुखर ङासहिज़्या। 11आव बनै थ॰रिउ युँ हुबो पाँ ज़ लिज़्या —
ख्रीसस गेसिउ मिताव गेताकिन,
साःरो जुनील मनी ओलस ज़ तान्या गेले।
12उमिनताव दुखर गेसहिकिन,
ओलस ज़ राज्या चलैन्या गेले।
ओललाई, ‘गेमासरेसे’ है गेदोकिन,
ओल मनी ‘ङामासरेस्चिए’ है दान्या ले।
13खाली गे ओसतत गेमालिदी ब
ओल ते गेसतत ज़ लिज़्या।
ओल ते असत खर्क ज़ मादोव।
परमेस्वरए ओय़ेनत स्याबास दैन्या
14आव पाँ भरी प़ाइँलाई ज़ सम्जैव ताके, स़ोनो ‘अऩाकलाव पाँत ताखर्लेसिच्यो’ लिद परमेस्वरए उमिननी अर्थैव ताके। निताव पाँ थैज़्यावर बलेस्ज़्यार। 15नँ परमेस्वरए साचो ओपाँलाई चावस पलास्द यापैयो। किताव बाहोर्याए ओघरपतीए ओय़ेन चावस ओदोकिन ओलाज हुन्या माले, हिताव ज़ नँ मनी परमेस्वरए उयुँलाव मिताव ताद, ओय़ेनत कलँ ल्यो ताके। 16ओअर्थ माल्यो अऩाकलाव पाँकिन तँङ ल्यो ताके। निताव पाँए परमेस्वरकिन झन तँदा ज़ लाँव दोज़्याव। 17बिसिउ घाइए स्यालाई ओक्वाज़्याव मिताव नो पाँए ब झन ज़ माचाव जैज़्याव। निताव माचाहिउ पाँ ससैज़्यावरानी हुमेनियस स़ोनो फिलेतसनी ब लिज़्यानी। 18नोनी साचो पाँकिन तँदा बाद, ‘परमेस्वरए उमींरालाई सिउनी सोचोइन्या ओय़ेन ते ताधुके,’ है दाद ख्वारालाई यायुँ काता माँःती जैद याराएज़्यार। 19हैदी ब परमेस्वरए ओपाँ ते घेप्पा गजलाव लुँ स्यासो थ॰रिउ लिज़्या। नो लुँत इताव ऩेब्लो पाँ ब आनी हुनी सर्सिउ लिज़्या — ‘परमेस्वरए उमींरालाई यासरेस्ज़्याव,’ स़ोनो, ‘परमेस्वरए उमिन हाइज़्याव भरी पापल झाःज़्याव पाँनी अछतङ उलिरक।’#गन्ती १६:५
20यो·व मिँए उझ़िमल सुन चाँदीए जार वाज़ मालेर। गमे जार, सींए जार ब लिज़्यार। ख्वार बनै याएः ल्योर लिज़्यार, ख्वार याएः माल्योर मनी लिज़्यार। 21है जैद जोए इताव माचाहिउ पाँरानी छेसिद उलिकिन नो मिँ चाव ओय़ेन भरित ओसाहुए ओङ़ाक बनै ओमान ल्यो, उगुन ल्यो चोखो जा स्यासो ज़ तान्या ले।
परमेस्वरए ओपाँ पैज़्यावए ओबानी
22भर्ज़ाकावरालाई माचावल पारैज़्याव भरिनी नँ ते जोगोइसिद लिनी। बुरू छैंव युँनी परमेस्वरए उमिनतावरास नँ परमेस्वरए ओसतत लिद, ओपाँत नयुँ सुहुप्द, नैं मेंए ल्योदा नयुँ थू जैद, प़ाइँस खैन्यादा कलँ ल्यो ताके। 23अऩाकलाव ओर्घांताव पाँर ताथैयो। ननी ते इ़सिन्या वाज़ ताज़्या। 24प्रभुए ओय़ेन दाज़्याव मिँ ते इताव इ़सिन्या स्यासो ताताक। बुरू नो मिँ ओदया ल्यो, परमेस्वरए ओपाँ पैधुन्या, माचाव पाँलाई गाल्द नैन्या, 25स़ोनो परमेस्वरए ओपाँकिन तँदाङावरालाई तहस सुधारैन्या ब ओताक। कसा परमेस्वरए यायुँ फर्कैद्याद साचो पाँत मारारैव। 26इतावनी नोर याचेतर फर्किद सैतानए ओजालनी कसा पुलुस्द माहुर। नल सैतानए ओय़ेन दान्याए जूँनी क्योःद यानैव।
Currently Selected:
२ तिमोथी 2: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
