२ तिमोथी 1

1ङा पावल, येसु ख्रीसए ओक्‍याँत अजम्‍बरी जुनीलाव य़ाका लिज़्‍या है लिन्‍या पाँत ओसाची ङालिज़्‍या। नो य़ेनत ओल परमेस्‍वरए ज़ खतैद नैनाव। 2ङा ङाल्‍योनी आव चिथी नँ ङायुँलाव ङाज़ा तिमोथीलाई परींद ङाईंज़्‍या। परमेस्‍वर गेबाबु स़ोनो गेप्रभु येसु ख्रीसनी निल्‍योनी नियुँ ओय़ाल्‍क, नियुँ ओगराँक, नँ नयुँ ब होलाँ जैद उईंनिक।

ङ़ादाकिन नदोहुव मिताव ज़ दोनायो

3ङासाखा पुर्खाराकिन ज़ ओसेवा यादोहुज़्‍याव परमेस्‍वरलाई ङा ब छैंव युँस ज़ ओसेवा दाद नँलाई चेतैद नजूँनी लाकनी रील परमेस्वरलाई पोंखारिद धन्‍याबाद चरैःव ज़ ङानैज़्‍या। 4गिन्‍भाःसिज़्‍याकाव नऱास्‍ज़्‍याव प़िलर ङाचेतैक नँस खर्क दैसिद गिनयुँ होलाँ गिन्‍जैके लिद ङायुँ थू दोज़्‍याव। 5हाः बेलाक परमेस्‍वरए ओपाँत साचो युँस ज़ नलिज़्‍याव ङाचेतैज़्या। निताव युँ ङ़ादाकिन नबुज्‍यु लोइसस ब उलिज़्‍याव, नआमा युनिसस ब उलिज़्‍याव। आःपै नँस मनी लिज़्‍याखेहो लिद ङायुँ हुबो ज़ लिज़्‍या। 6है जैद ङा नँलाई तोबो पाँत ङासम्‍जैनिज़्‍या, नो नक्‍याँत ङाकुइ नैद असिक ङाईंज़्‍याकाव परमेस्‍वरनिकाव नदैव बरदानलाई पाथस जोगोइद नैयो। 7परमेस्वरए गेलाई छे·न्‍या युँ ओयासिउ माःक, नोए ओयासिउ युँ ते घ्योःव, अर्काए ल्‍योदा य़ालो, तहस लिन्‍या लिज़्‍या। 8है जैद गेप्रभुए ओसाची यान्‍यात नलाज ताहुक। परमेस्वरए ओय़ेनत कैतल लिज़्‍यावए ङाजूँनी ब नलाज ताहुक। बुरू परमेस्‍वरए चाव ओथा सथैन्‍यात ओल ओसक्तीनी ज़ दुखर ङासहिज़्‍याव मिताव नँ ब सहियो। 9ओल परमेस्वरए ज़ गेलाई अजम्‍बरी जुनी दैन्‍या असिक याद उमिनत छैंव य़ेन दान्‍या खतैसिक्‍यो। नो भरी गेनी गेदोव य़ेननी ओयासिउ ते माःक, ओल उयुँ गराँद उयुँ स्‍यानी ज़ ओयासिउ ची। है जैद आव नाम नम ओमाजैद ङ़ादाकिन ज़ येसु ख्रीसनी गेलाई यान्‍या थ·रैद ओनैज़्याव। 10नो असिक आज्‍याल गेलाई बाँचैज़्याव येसु ख्रीस उहुवनी ज़ गेल्‍योदा परमेस्वरए उयुँ ओय़ालो छर्लङ्ग ज़ रैंःज़्‍या। नोए गेजूँनी सिन्‍याए उमिन ज़ सम़ैद्याद खर्क ज़ मासिन्‍या जुनी दैन्‍या येम चाव थानी ज़ सतैंद्यासिक्‍यो। 11ङा पावल नो चाव था सथैद मिँरालाई पैन्‍यात ओसाची खतैसिउ ङालिज़्‍या। 12नो य़ेननी ज़ इताव दुखर ब दैद ङानै। हैदी ब ङालाज माहुइ, ङायुँ हुबोलाई ङासरेस्‍ज़्‍या। है जैद ओल उहुन्‍या छ्यामए जूँनी ओपासल ङानैव भरी ओल ज़ पाथस नैद्यान्‍या ले लिद ङायुँ हुप्‍द ले। 13नँ ब येसु ख्रीसलाई नयुँ हुप्‍द ओल्‍योदा नयुँ थू जैद ङाल्‍योनी नपैसिउ साचो पाँ भरी नङ़ाक थाँसिउ मिताव ज़ नैयो। 14गेयुँलाव बास दाद नैज़्‍याव छैंव पुरूसए ओसक्तीनी नपासल नैसिउ परमेस्वरए ओपाँलाई बनै पाथस नैयो।

ओनेसिफोरसए उगुनर

15नँ ज़ नसैंज़्‍याखेहो, एसियालाव गेसकाव लिज़्‍यावराए ङालाई प़ाइँए ज़ ऱास्‍नाकेर। नोरानी फुगेलस स़ोनो हर्मोगेनसनी ब निल्‍यो। 16नो बेलाक ङा झ्‍यालखानाल लिज़्‍यावलाई रँःद ओलाज माहुद समारिज़्‍याव ओनेसिफरस वाज़ ओल्‍यो। है जैद नोए उझ़िमलावराए ल्‍योदा प्रभु बनै ज़ दाइनो ओताक। 17नो मिँ रोमल उहुत ङालाई बनै धामास खिम्‍द दैनाक्‍यो। 18नो मिँए एफिससल ङालिज़्याक बनै चावस ङासेवा दाद ओसघैनाज़्‍याव नँ ब नसैंज़्‍या। है जैद गेप्रभु फरी उहुन्‍या छ्याम नोए ल्‍योदा परमेस्‍वरए उयुँ ओय़ाल्‍क।

Currently Selected:

२ तिमोथी 1: NKham

Highlight

Copy

Compare