२ पत्रुस 1
1
1ङा सिमोन पत्रुस येसु ख्रीसए ओनोकोर स़ोनो ओसाचीए ङाल्योनी आव चिथी जे, गे माँःती, उगुन ल्यो युँ हुबो पाँ दैवराए जूँनी परींद ङायाचिज़्या। आव पाँ गेपरमेस्वर स़ोनो गेलाई बाँचैज़्याव येसु ख्रीसए गेजूँनी सतस ओदोज़्यावनी ज़ गेदैके। 2जे गेप्रभु येसु ख्रीसए ओपाँ सैंद परमेस्वरए ल्योदा जेखैज़्यावए ओल मनी जेल्योदा उयुँ गराँद जेयुँ होलाँ जैद ओयाचिउक।
परमेस्वरए ओगेर उबुद्धीर क्याँए मीं जैन्या
3गेलाई परमेस्वरए ओल उगुन स़ोनो ज़गै मगैव ओगेनी खुल्द नैसिउ। गे ओललाई चावस गेसरेसोए परमेस्वरए गेलाई ओल ओसक्तीनी साःरो ताद ओगे रैन्याए जूँनी प़ाइँ जोरैद नैद्यासिउ। 4निताव जोरैद ओयासिउनी फरी गेलाई बनै घेप्पा ओचाहित ल्यो य़ाकार याद नैसिउ। नो परमेस्वरए ओयासिउ य़ाकारानी गे आव जुकलाव माचाव चेतैन्यानी हुज़्याव फ्या·न्या म़ान्यानी पुलुस्द परमेस्वरए ओगे रैन्यार गेताज़्या।
5है जैद जे ओल ओगे रैन्या ताकिन परमेस्वरए ओपाँत जेयुँ सुहुप्द धर्मदा कलँ लिच्यो। धर्मर दाद ओपाँर झन ज़ प़ाल्च्यो। 6ओपाँर थ·रैद, तहस लिद, झन ज़ थ॰रिद, परमेस्वरए उयुँलाव मिताव जैसिच्यो। 7ओल उयुँलाव मिताव जैसिद नैं मेंए ल्योदा युँ गराँव जैद, तोबोए तोबोलाई मया दासिच्यो। 8आव गुनर चावस रैद जेयुँल जेसबा·किन जे कान्ल ज़ काम मालागिउ अऩाकलावर तान्या जेमाले। बुरू गेप्रभु येसु ख्रीसए साचो उबुद्धी भरी जे ज़ रैन्या जेले। 9खाली जोस आव मिताव गुनर माले, नो मिँ तादाङ मारँःधुन्या मुन्दुक्यासो मिताव ताज़्या। ङ़ादाङाव ओपापर परमेस्वरए क्याल्द ओयो ब माचेतैव।
10है जैद जे ङानैं ङामेंर, परमेस्वरए ङ़ादा ज़ थ·रैद थामिद ओरानैज़्यावल ‘गे ब नल ज़ गेताक’ लिद जोर दोच्यो। इताव जेदोकिन जेयुँ हुबो पाँलाई खर्क ज़ माऱास्द, 11गेलाई बाँचैज़्याव गेप्रभु येसु ख्रीसए ओराज्याल त़ाल त़ोल माताद ज़ पसिउ दैन्या जेले। नो राज्या खर्क ज़ खेम्न्या माले।
य़ाका जैद नैद ङायाचिए
12जे इताव पाँर ङ़ादाकिन ज़ दैद जेसैंवए ओसतत थ॰रिद जेले लिन्या ङासैंज़्या। हैदी ब ङा जेलाई सम्जैन्यात एकम्न्या झाःसिद ङाले। 13ङा आव मानुवात ङालेवा भरी इताव पाँरानी परमेस्वरए ओय़ेनत जेर्सा हाइद्यान्या ङाय़ेन ज़ लिज़्या। 14काराव ल्यो ताकिन ङा आव मानुवानी बान्या बेला हुद ले लिन्या ङासैंज़्या। नो ङ़ादा गेप्रभु येसु ख्रीसए ज़ है ओदाँव। 15है जैद आव पाँर ङा ङासिउ छींनी घमामेंःरक लिद य़ाका जैद नैद ङायाचिए।
ख्रीसए ओसक्तीर गेमीए ज़ गेरँःके
16गे गेप्रभु येसु ख्रीस बनै सक्तीस फरी ब हुरिज़्या लिन्या पाँर जेलाई गेसथैचिक गेनी ससैद माचाहिउ घर्ती बिन्तीरानी गेसथैचिज़्याव ते माःक, ओल ओसक्तीर ओज़गैर आव गेमीए ज़ रँःद गेनै। 17हो गेरँःव छ्याम ज़ ओबाबु परमेस्वरए येसुलाई ओमानर याद ज़गैव ब जैक्यो। हो बेलाक ज़ फरी स्वर्गताव माहान परमेस्वरए ल्योनी तोबो गा अइ लिद हुके, “आव ङायुँलाव ङाज़ा ज़, आवलाई रँःद ङायुँ होलाँ ताज़्या।” 18आव स्वर्गतिन हुव पाँ भरी गे ओलस लिज़्यावराए नो चोखो दाँदात गेलिज़्याक आव गेर्नाए ज़ गेथैके।#मत्ती १७:१-५
19है जैद ङ़ादा ख्रीसए उजूँनी अगमबक्ताराए यापाँ भरित गेयुँ झन ज़ हुप्ज़्या। जे मनी नो पाँत बनै धिद ज़ लिच्यो। ख्रीस फरी ओमाहुवा पै नो पाँ चुम चुमोल मेंः तैंःसिउ मिताव ज़ लिज़्या। ओल उहुवत फरी छकाल्न्याकाव सोम्पा जेयुँल ज़गै ओताव मिताव ज़ तारिज़्या। 20आव ब सैंच्यो, धर्मसास्त्रलाव पाँ मिँए सिर्जैद सर्सिउ ब माःक, 21नो पाँ मिँए युँ स्यानी हुव ब माःक। छैंव पुरूस मिँराए यायाःत च़ुसिद परमेस्वरनी ज़ पाँकेर।
Currently Selected:
२ पत्रुस 1: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
