१ पत्रुस 5
5
परमेस्वरए ओबगाललाव पाँ
1जे मन्दलीलाव स़ेरर, ङा मनी जेसकाव स़ेर मिताव जैसिद ङापाँज़्या। ख्रीसए ओदैव दुखर आव ङामीए ज़ ङारँःके। ङा मनी छींनी ओसतैंरिज़्याव ओज़गै मगै जेस सिप ज़ ङादैरिज़्या। है जैद ङा जेलाई है ङादाचिज़्या, 2जेपासल लिज़्याव परमेस्वरए ओबगाललावरालाई पाथस यारानैच्यो। सुवाराए करकापनी माःक, परमेस्वरए ओपैंज़्याव मिताव जेयुँ स्यानी ज़ दोच्यो। धनए लोभनी ब माःक, सेवा दान्या युँस दोच्यो। 3जेधूँलावराए याङ़ैत अखत्यासो ब ताजैसिच्यो। बुरू बगालए ओङ़ाक चाव य़ेनत सतैंद नैसिउ मिताव ताच्यो। 4हो ताकिन ची जेर्गे गावला फरी ओसरैंःसिहुक जेलाई घ्योःव मान याद एकम्न्या ज़ तह महौ नैचिरिज़्याव।
5जे धापाज़ाकावर, सेरोराए यापाँ धूँल लिच्यो।#5:5 छुत बुझिन्या — मन्दलीलाव लोम्बाराए यापाँ धूँल लिच्यो। स़ोनो जे प़ाइँ मास॰द सज़िम्सिद जे जेल चिऊसिचिके। काराव ल्यो ताकिन धर्मसास्त्रल मनी इताव सर्सिउ लिज़्या,
“स॰द सघ्योःसिज़्यावरानी परमेस्वर तँदा ज़ लिज़्या,
सज़िम्सिज़्यावराए ल्योदा ते उयुँ य़ाल्ज़्या।”#हितो ३:३४
6है जैद परमेस्वरए उधूँल लिद मास॰द जेसज़िम्सिकिन तछा सघ्योःचिरिज़्याव। 7व़ीनी फुइ मालिद, परमेस्वरए ओक्याँत ख्यासिद लिचिके। होए ज़ जेलाई चिऊचिज़्याव।
8जेतहस लिद सैंसिद लिच्यो। जेसुतुर सैतान गर्जिज़्याव ला माँःती ‘सुलाई ङाकैके’ लिद पेमे पेमे खिम्चिज़्याव। 9जे परमेस्वरए ओपाँत जेयुँ सुहुप्द जेर्सा ल्यो ताद सैतानए ओङ़ाक थाँसिचिके। ‘गेलाई वाज़ माःक, संसार भरिलाव गेदाज्यु भाइराए मनी आव दुखर दैव ज़ नैज़्यार’ लिद य़ाका दोच्यो। 10जे जाँवा पै आव दुखर जेसहिउत नो दुखरानी प़ाइँल गराँव गोव परमेस्वरए जेलाई जेयुँर होलाँ जैद्याद, जेर्सार हाइद्याद, ग्याल गिल माताद थ॰रिउर जैचिरिज़्याव। होए ज़ जेलाई ख्रीससकाव खर्क ज़ माखेम्न्या ओज़गै मगैवल सिप ज़ लिन्या खुल्द नैचिउ। 11होलाई खर्क ज़ माखेम्न्या राज्या उकुइत ओताक। आमेन।
तुपैन्या पाँर
12परमेस्वरए ओपाँताव उयुँ हुबो गेभाइ सिलासए उकुइत आव तूइँज़ा चिथी सर्द परींद ङानै। आव चिथील ‘परमेस्वरए उयुँ गेल्योदा इताव ज़ लिज़्या’ लिद जेयुँ सझेंःद्याद सर्द ङानै। नत ज़ जेयुँर थ·रैद लिच्यो। 13बेबिलोनल लिज़्याव जेस सिप छाँतिसिउ परमेस्वरए उमिनतावराए याल्योनी जेरो है दाचिज़्यार। ङाज़ा मिताव मर्कूसए मनी जेरो है दाचिज़्याव। 14जे जेल मयास#5:14 रोम १६:१६ चिऊन्या। जेरो दासिच्यो।
ख्रीसए उमिनत लिज़्याव भरिरालाई जेयुँ होलाँ ओताक।
Currently Selected:
१ पत्रुस 5: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
