२ कोरिन्थी 7
7
1है जैद ङानैं ङामेंर, गे परमेस्वरए निताव ओय़ाकार गेदैवए गेक्याँ गेपुरूसलाई झुथो जैज़्यावरानी चोखोइसिद परमेस्वरए उधूँल लिद सतलाव छैंव ओय़ेनदा बाव ताके।
पावलए उयुँ होलाँ ओताव
2गेलाई जेयुँल लिन्या पो जैद्याव ताके, तावैंसिच्यो। गे सुए याउपर्त ज़ मादान्या गेमादोए, सुलाई ब गेमाबले·चिए, सुलाई ब गेमाझुकैचिए। 3आव है ङादाचिज़्याव भरी जेलाई जेखतर सतैंद ङायाचिज़्याव ते माःक। ङ़ादाकिन है ङालिज़्याव मिताव जे गेस ज़ गेयुँल सिप ज़ जेलिज़्या। है जैद गे गेसिदी ब, गेलिदी ब, गेयुँनी तँदा तान्या जेमाले। 4जेलाई ङायुँ हुप्द ङासुनी च्याँःसिउ ज़ लिज़्या। है जैद जो मिताव ङादुखराल ब ङायुँर होलाँ ताद रेंव ज़ ङालिज़्या।
5माकेदोनिया गेकेसोत गेदुखराए सन्चस ल्यो गेमादैके। प़ाइँनी प़ाइँनी गेर्च्या सिद पाखाताव गेक्याँ ब उरूम्सिज़्याव, गेयुँल छ्यास वाज़ उलिज़्याव। 6हैदी ब यायुँ तेवरालाई यायुँ सझेंःद्याज़्याव परमेस्वरए तीतसलाई गेल्योक परींद्याद गेयुँर होलाँ जैद्यासिक्यो। 7नो होलाँ गेताव अइज़ गेदैसिउनी वाज़ माःक, जे नोलाई उयुँर होलाँ जैद जेयोनी गे गेयुँ ब होलाँ ओताव ची। जे ङालाई मामेंःद जेचेतैनाज़्याव, ङ़ादा मादान्या जेदोवत सोगो जेदोज़्याव, स़ोनो ङापाँत धुरिद्याद ङास जेजैसिज़्याव, नो पाँर जेल्योनी हुव तीतसए ओयाःनी ङाथैक ङायुँर झेंःद झन ज़ ङारेंके।
8आवकिन नो ङ़ादाङाव परींद ङायाचिउ चिथील जेय़ेनए जेयुँर जाँ माचाव जैद ङायाचिउनी, छींनी ‘नो यायुँर माचाव जैद्यान्या चिथी ङामापरींदी ब तान्या ओल्यो,’ है ब ङालिके। खाली ङापरींव पाथ ज़ ताके, नो जेयुँर माचाव जैद ङायाचिउ छ्यावाए जूँनी वाज़ ओताव ओल्यो लिन्या ङासैंके। 9नो ङारेंज़्याव, जेयुँर माचाव जैद ङायाचिउनी माःक, जेयुँ माचाव जैद परमेस्वरए ल्योदा जेयुँ जेफर्कैवनी ङारेंज़्याव ची। माचाव जेय़ेनत जेयुँ माचाव जेजैव परमेस्वरए उयुँलाव मिताव ज़ ताके। नै ओतावए गेल्योनी ब जेलाई कै मै ज़ माताके। 10परमेस्वरए ल्योनिकाव ताज़्याव सोगोए युँलाई त़ोद्याद ओल्योदा लाँव दोज़्याव। हाःकिन नो सुए ल्योदा ब मागोइसिए। आव मानुवाताव ताज़्याव सोगोए ते सिन्या म़ान्यादा लाँव दोज़्याव। 11खाली जेलाई ते परमेस्वरए ल्योनिकाव ताज़्याव सोगोए काता नाः परमेस्वरए ल्योदा कलँ लिन्यार ओजैचिउ। नो सोगोए ङ़ादाङाव जेय़ेन भरिनी छेसिन्या ब जैचिक्यो, मादान्या जेदोवत हार मानिउ ब परींचिक्यो, सजानी छे·न्या ब जैचिक्यो, ङास खैन्या युँ ब जैद्याचिक्यो, चाव य़ेनत जेर्सा ब पले·द्याचिक्यो, जेलाई सतस दान्या युँ जैद्याचिक्यो। है जैद आव भरिनी जेखत माल्योर जेथ॰रिके। 12नो ङ़ादाङाव जेखार्लाव मादान्या य़ेन दोवए उजूँनी ङापरींव चिथी होए उजूँनी स़ोनो जेलाई जेयुँ सुहुर्द ओयाचिउराए जूँनी वाज़ माःक। बुरू परमेस्वरए ओङ़ाक गेल्योदा जेयुँ थू जेजैज़्याव ओरैंःक लिद ङासर्के। 13ननी गे गेस॰र ब होलाँ ताके।
गेस॰र होलाँ ओताव नाः वाज़ माःक, जेल्योनी उयुँर होलाँ ताद रेंद हुव तीतसस गेदैसिक झन ज़ गेयुँर झेंःद गेस॰र होलाँ ताके। 14ङ़ादा तीतस जेल्योङ ओमाहुद नोस जेजूँनी जेलाई सघ्योःद ङापाँव पाँ भरी अऩाकलाव माताके। किताव जेलाई गेसथैचिउ परमेस्वरए ओपाँ भरी थ॰रिउ पाँ ज़ ओताव, हिताव ज़ जेजूँनी तीतसलाई है ङादोव भरी ब जेक्याँत ज़ थ॰रिउ ताके। 15तीतसए जेलाई मामेंःचिउ। जेल्योङ उहुक बनै मानस जेनैवए, ‘आवर ते परमेस्वरए ओपाँ दान्याकावर ज़ ताद यालिज़्याव ओल्यो’ लिन्या चेतैद जेलाई झन मया दाचिज़्याव। 16है जैद जे प़ाइँनी प़ाइँनी ङायुँ हुबोर जेतावए ङा रेंव ज़ ङालिज़्या।
Currently Selected:
२ कोरिन्थी 7: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
