२ कोरिन्थी 8
8
कुइ सघ्योःद यान्या
1ङानैं ङामेंर, आव ब सैंच्यो। माकेदोनियालाव मन्दलीराए याक्याँत परमेस्वरए उयुँ ओगराँवनी यादोव य़ेनए जूँनी है गेदाचिज़्या। 2नोराए याक्याँत धो सहिउ दुखर हुद उलिज़्यावत ब नोराए यायुँ मासतेद रेंद, माथैंव मायो·वल लिज़्यावत ब परमेस्वरलाई याकुइ सघ्योःद ज़ यान्यार ताकेर। 3ङा जेलाई साचो है ङादाचिज़्या, नोराए यायुँ स्यानी ज़ याधुवा भरी ज़ दोकेर, रँःक ते झन मादासिधुन्या मिताव य़ेन ब दोकेर। 4परमेस्वरए उमिनताव माथैंव मायो·वरालाई, ‘जुनी ब गेल्योनी गे गेजुँ ब लाँद्याव ज़ ताके’ लिद घलैनाकेर। 5गे है ल्यो गेपैंज़्यावकिन नोराए झन कोसै ज़ दोकेर। नोराए ङ़ादा ज़ प्रभुलाई याजिउ ज़ याचरैःवए परमेस्वरए उयुँलाव मिताव य़ेन ज़ दाद गेलाई ब याजिउ ज़ यासूँपिसिउ मिताव ज़ ताके। 6जे जेल्योङ मनी इताव चाव य़ेनर जे जेक्याँत ब घरैंःक लिद जेल्योङाव चाव य़ेनत थूसिद लिज़्याव तीतसलाई पुर्थस घुतुपैयो है गेदोज़्या। 7है जैद जे प़ाइँ य़ेनत, युँ हुप्न्यात तादी ब, पाँन्यात तादी ब, सैंन्यात तादी ब, नो भरित कलँ लिद गेल्योदा जेयुँ थू जेजैज़्याव मिताव पो पोङाव माथैंव मायो·वरालाई स्यो·द गेराएज़्याव य़ेनत जे मनी उहिल हाइव ताके।
8आव है ङालिज़्याव भरी जे मायाद माताए है ङादाचिज़्याव ते माःक, खाली छुतङावराए माथैंव मायो·वराए ल्योदा याजैज़्याव युँ स्यासो जे जेल्योङ ब मालिज़्या लिद ङासर्ज़्याव ची। 9गेप्रभु येसु ख्रीसए उयुँ गेल्योदा ओगराँव जे ब जेसैंज़्याखेहो। नो ङ़ादा प़ाइँनी प़ाइँनी यो·व उलिदी ब गे गेजूँनी काता ज़ माल्यो जैसिद हुके। गेलाई प़ाइँनी यो·वर जैन्याए जूँनी गेजूँनी नाःल्दिउ य़ेन दाद्यासिक्यो।
10ङा जेसकाव ङासल्ला इताव लिज़्या, नो ङासल्ला जेजूँनी ज़ लिज़्या। जे आःर्तानी निताव य़ेन दान्या भैंःन्यात तादी ब, यान्यात तादी ब, जे ज़ प़ाइँरानी ङ़ात जेल्यो। 11अब ते नो जेभैंःव य़ेनलाई सयो·व ज़ परिके। किताव ङ़ादा दान्या युँ जेदोव, हिताव ज़ जेधुवा भरी दाद नो जेपाँ सयो·व ज़ परिके। 12जे यान्या जेपैंकिन जेयुँ स्यानी याधुन्या वाज़ दोच्यो। परमेस्वरए नो जेदोधुज़्यावकिन कोसै मारैव। 13आव य़ेन जेलाई दुख याद छुतलाई थाँतस नैन्याए जूँनी माःक, प़ाइँलाई सम सम जैन्याए जूँनी ची। 14आज्याल जे प़ाइँनी यो·द धोल पोगोल ताद जेलिज़्यावए नो माथैंव मायो·वर ब यो·वर ताज़्यार। फरी नोर छींनी प़ाइँनी यो·द धोल पोगोल यातावत जे माथैंव मायो·वर जेताकिन जे मनी यो·वर ज़ तान्या जेले। है जैद प़ाइँस सम सम ओताक। 15हो ताकिन ची धर्मसास्त्रलाव सर्सिउ पाँ मिताव ज़ तान्या ले। नो सर्सिउ आव ज़,
“कुधु दुपोलाई अऩाकलाव तान्या माले।
फरी छ्या ल्योलाई मायो·व तान्या माले।”#प्रस १६:१८
तीतसलाई कोरिन्थीराए ल्योदा परींसिउ
16परमेस्वरलाई धन्याबाद लिज़्या। किताव जेल्योदा ङायुँ थू ओताज़्याव, हिताव ज़ परमेस्वरए तीतसलाई मनी जेल्योदा उयुँ थू जैन्या जैक्यो। 17नो मिँ जेल्योदा गे है गेदोवनी वाज़ उहुज़्याव माःक, जेल्योदा उयुँ थू जैद उयुँ स्यानी ज़ हुज़्या। 18नोस फरी परमेस्वरए ओय़ेन दान्यात प़ाइँ मन्दलीराए खार्ल उमिन थासो तोबो गेनैं ब गेपरींज़्या। 19नो गेनैं, माथैंव मायो·वरालाई स्यो·द्यान्याए जूँनी पो पोङाव मन्दलीराए ल्योनी आव य़ेनत गेस सिप ज़ खतैसिउ लिज़्या। गे आव गेदोज़्याव य़ेन माथैंव मायो·वरालाई कुधु सघैव गेपैंज़्या लिन्या सरैंःद्यान्याए जूँनी स़ोनो परमेस्वरए उमिनलाई सघ्योःद्यन्याए जूँनी लिज़्या। 20आव पो पोङाव गेस्यो·ज़्यावत कान्त ज़ गेखत तापुलुस्क लिद बनै पाथस प़ाइँए ङ़ाक ज़ गेदोज़्या। 21आव य़ेन परमेस्वरए ओङ़ाक वाज़ माःक, प़ाइँ मिँराए ङ़ाक ब ओमान ल्यो माम़ोंसिन्या य़ेन ज़ गेदोज़्या।#हितो ३:४
22नोनिस छुत गेभाइ ब जेल्योदा गेपरींज़्या। नो मिँ ब परमेस्वरए ओय़ेनत उयुँ सघ्योःद दोज़्याव मिँ ज़ गेरँःज़्या। आव य़ेनत फरी जेल्योङाव पाँर थैद उयुँ हुप्द चह चह ताद हुज़्या। 23तीतस ते ङास जेखार्ल सिप य़ेन दोज़्याव ङानैं ज़। नोस हुज़्याव गेभाइनी फरी, पो पोनिकाव मन्दलीराए खार्नी परींसिउ, ख्रीसए ओमान नैद्याज़्यावनी ज़। 24है जैद जे नो स़ोम्लोराए याङ़ाक माथैंव मायो·वराए ल्योदा जेयुँ उलिज़्याव सतैंद्याव ताके। हो ताकिन ची आङ जेल्योङाव सघ्योःद गेपाँव पाँ ब मन्दलीराए साचो थ·रैन्या लेर।
Currently Selected:
२ कोरिन्थी 8: NKham
Highlight
Copy
Compare
Share
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
