MATTHAI 3
3
Tuiphum Johan i Nadehnak
1Mah hun hawngin, tuiphum Johan cu Judea ngamkhing munah hengin thuhilh hi. 2“Vancung Uknak naizet zo toh hangin, na lungmu uh thek unna, na sualnak uh sik un,” ti hi.#Mt 4:17; Mk 1:15; 3Profet Isaiah in:
“Mi pa khat cu ngamkhing lakah au in;
‘Topa i hawhnak
lampi sial un;
A hawhnak tuk lampi khi
camtik un,’ ti hi,” tin
a hilh nuammi cu Johan hi.#Isa 40:3;
4Johan i puan cu kalauk mul tuah tahmi hi, a taikhap cu savun tuah bawlmi hi in, a an cu khaau le hampa lak a khuaitui hi.#2Kum 1:8; 5Jerusalem pepan, Judea ngam khua hempoh pen hihen, Jordan ngunmawk hempoh pen hihen ama lakah mi tampi hung haw hi. 6A sualnak haw phuangin, Jordan ngunah tuiphum haw hi.
7Johan in Farasi mite le Sadusi mitei lakah tuiphum tukin a lakah a hun haw amuh ten, amu lakah, “Maw ngul cikhaih, mi awklawlte, Pathian i bawlsiatnak a heng tukmi sung pen luat thei tuk uh ci, tin, akua in hilh him?#Mt 12:34; 23:33; 8Na sual sihnak uh cu na nunzia uh tuah langtik un. 9‘Abraham cu keimuh cikhaihtu ka pu uh hi,’ ti thahleng sihin, bawlsiatnak mun pen luat tuk ung, tin ngaisung pahsuh un. Thungai in hilh ing. Pathian in hi suangte hei hi, Abraham casuanin bawl thei hi.#Jn 8:33; 10Thingkungte phuhnak tukin a bulah heipi koihin um zo hi. Ngah pha a ngah ngawlmi thingkung hempoh cu phuh hi haw tuk a, mei sungah vawk hi tuk hi.#Mt 7:19; 11Sualnak pen sikleh uh ci tih theihnakin, kei in tui tuah tuiphumnak pia ing. Mahnaven keima nung pen a hung tukmi pa in, Hawvang Thiangtho le mei tuah hinthaknak pia tuk hi. Amah cu kei sangin a thawm ngeng saw hi; kei cu a kedam cawitu tuk hei in tak mang. 12A khut sungah cangkhepnak lawhphek cawi hi. An cang cu beem sungah khumin, a sivaite cu a mit awng ngawl mei sungah haal tuk hi.”
Jesuh Tuiphumnak
(Mk 1:9-11; Lk 3:21-22)
13Mah hunin, Jesuh cu Galilee pen Jordan ngunah Johan i tuiphumnak piak tukin heng hi. 14Mahnaven Johan in, a nelah, “Keimah saw hi nangma tuiphumnak piak tumi hi saw sing, itin kaw nangmah lehlam ka lakah na hun?” tin dong hi.
15Jesuh in, “Tu hi cu hitih bangin bawl hihen. Itahim titale Pathian in deh tukin a tiikmi cu mah hun ten kimtik khawng tukmi hi,” tin ti hi. A tihnak bangin Johan vang a lungkim hi.
16Jesuh cu tui a phum ceng bek ten tuisung pen a thawhtoh laih takin van cu hong hi. Pathian i Hawvang cu khulo bangin kumsukin, a humah a kopsuk mu hi. 17Mahten van pen aw pa khatin, “Hi pa hi ka ihbelmi ka Capa hi, a humah ka lungdamzet ing,” tin ti hi.#Pian 22:2; Saam 2:7; Isa 42:1; Mt 12:18; 17:5; Mk 1:11; Lk 9:35;
Currently Selected:
MATTHAI 3: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.