THIAMPI NADEHNAK 20
20
Thu Ngai Ngawlte Cawhnak
1Israel tei nelah than tukin, 2Topa in Moses nelah hi bangin hilh hi, “Nangmu nel le nangmu lak a ummi ngamdangmi tei lak pen hihen, Molek pathian biakpiaknakah a sungsuak a ca a piatu cu Israel mipi in, suang tuah seh hup hi tuk hi. 3Molek pathian nelah a ca pia a, ka Puanbuk nintikin, ka min thiangtho a nintik hangin amah cu lawl tung a, ka mihingin sial tukma toh ing. 4Mahnaven Israel mi nam pumpi in mahpa i bawlnak cu zamsan thongin, that ngawl a khawih haw tale, 5mahpa le a innkua pih hempoh cu lawl tung hi. Mah hum pen Molek pathian biakpiaknakin mahpa i lak a telmi, numei pha ngawl bangbok hempoh cu keimah hihimin lawl tung. Mahte cu ka mihingin ngaisung tukma toh ing.
6“Mi thi hawvang a samthiamtu mipol lakah kung a khaitu cu keimah in lawl tung a, ka hinnam sungah sialcihleh tukma toh ing. 7Thiangtho duncop un; itahim titale keimah cu Topa na Pathian uh ing. 8Ka daan zui un, itahim titale Topa hi ing a, nangmuh a thiangthotiktu cu keimah ing hi,” ti hi.
9Mah hum pen a nuailam a daan cu Topa in amu nelah pia hi. A nu le pa a tamtu cu thah hi tuk hi. A nu le pa a tamsiat hangin a sualman thisan cu ama lu humah heng hi.#Suah 21:17; Mt 15:4; Mk 7:10; 10Mi pa khatin midang zi a sualpih tale, a pa nihin, thah hi haw tuk hi.#Suah 20:14; Thiam 18:20; Daan 5:18; 11A pa i zi pa kha khat a sualpihtu cu a pa mualphotik a hih hangin, a pa nihin thah hi haw tuk hi. A mu sualnak hangin thi haw hi.#Thiam 18:8; Daan 22:30; 27:20; 12A capa i zi a sualpih tale, a sualpih mi numei tuah thah hi haw tuk hi. A nin mi nate a bawl haw hangin sualman thih lawh haw hi.#Thiam 18:15; 13Pano pa kha khat cu a dang pano pa khat tuah a phialdun haw tale ningdelhhuai na bawl a hih haw hangin, a pa nihin thah hi haw tuk hi. Amu sualnak hangin thi haw hi.#Thiam 18:22; 14Mi pa khatin zihuai in, a sungnu vang a huai bok tale, a ninmi na bawl a hih hangin, a pa thum haw in mei in halhup hi haw tuk hi. Hitih bang cu nangmu nelah umtik pahsuh un.#Thiam 18:17; Daan 27:23; 15Pano pa khatin ngamsa a sualpih tale amah le a ngamsa cu thah hi haw tuk hi.#Suah 22:19; Thiam 18:23; Daan 27:21; 16Numei pa khatin ngamsa sualpih tukin a zuam tale amah le a ngamsa vang thah hi haw tuk hi. A mu sualnak hangin thi haw hi.
17Pano pa khatin, a celnu, ahimata nu dang hin a celnu a huai tale mipi maiah zakca le mualpho in bawl a hih nung haw ten Israel mipi tei lak pen hawlvawk hi haw tuk hi. A celnu a sualpih hangin bawlsiatnak a thuak kul hi.#Thiam 18:9; Daan 27:22; 18Numei pa khat numei daan a neih laihin pano pa khatin, a zaupih tale, a thiangtho le thiangtho ngawl cungcangin daan ummi a pahcat haw hangin, Israel mipi lak pen a pa nih haw in hawlvawk hi haw tuk hi.#Thiam 18:19; 19Mi pa khatin, a ni a sual pih tale ningdelhhuai mi bawl a hih haw ten a pa nih haw in, bawlsiatnak thuak haw tuk hi.#Thiam 18:12-14; 20Mi pa khatin, a ni a sualpih tale, a pa i unau pa minsiatik a hih hangin bawlsiatnak thuak haw tuk a; ca nei ngawlin thi haw tuk hi. 21Mi pa khatin, a unau pa i zi a huai tale, lo le lam luahtu ca nei ngawlin thi haw tuk hi. A thiang ngawlmi bawlin, a unau pa a mai nintik hi.#Thiam 18:16;
22 Topa in, “Hi ka henpihnak ngamin, nohte a lawl ngawlnak tukin ka daan le ka thupiakmi hempoh zui un hi. 23Hi ngam na luah theihnak tuk uhin, hi ngam pen ka hawlvawkmi Pathian thei ngawl tei daan cu zui kha pahsuh un. A zui haw mi thilpha ngawlte ciatzet toh ing. 24Mahnaven hi ngam, khuinawi le khuaitui luannak ngamnop cu na luah tuk uhin, ka tepsa bangin nangmu nelah pia tung hi. Keimah cu Topa na Pathian uh ing. Mah hangin miphun dangte tuah cokhel ngawlin um tukin nohte cu a dangno in ka koihmi hi uh ci. 25Mah a hih hangin vano hihen, ngan hihen, a thiangthomi le a thiangtho ngawlmi cu kom zetin deidan na thiam uh kul hi. A thiangtho ngawlmi vano le nganei pahsuh un hi. Sa thiangtho ngawl ka tihsa a hih hangin, na ei uh tale mi thiangtho ngawl suak tuk uh ci. 26Mi thiangtho hi tuk uh ci a, keimah bekta hi un hi; itahim titale, keimah cu Topa, a thiangthomi ing. Keimah sung bekah na um theihnak tukin miphun dangte tuah cokhel ngawlin a dangno in ka koih mite uh ci.
27“Pano hihen, numei hihen, a thi mi hawvang a samtu cu suang tuah seh hup hi tuk hi; hiti bang a bawltu cu ama sualnak hangin thi hi,” ti hi.
Currently Selected:
THIAMPI NADEHNAK 20: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
