THIAMPI NADEHNAK 17
17
Thisan Thiangtho Biakpiaknak
1 Topa in Moses nelah, 2Aaron, a capate le Israel mi hempoh tei nelah a nuailam daan hilh tukin, thupia hi. 3-4Israel mi pa kha khatin khui hihen, tuu le keel hihen Topa i nelah biakpiaknak a bawl ten, Topa i umnak kongka sial ngawl, mundangah a ngo tale daan palcattu hi. Thisan a tultik hangin amah cu Pathian i hinnamah sialcih tuk kha ma toh hi. 5Hi thupiakmi i tihnuam mi cu Israel miten mun dadangah a ngawh mek haw mi, ngan cu Topa i nelah hunpih khawng kul tihnak hi. Puanbuk kongka a, ummi cu thiampi nelah hunpih haw tuk a, lemnak biakpiaknak tukin ngo haw tuk hi. 6Puanbuk kongka el a, ummi biaklandawh kimsuakin thiampi in mah thi cu theh tuk hi. A thau cu Topa i ca in, a namtui hi tukin haal tuk hi. 7Israel miten a ngan haw cu mun dadangah ngo in keel khawhuai tei lakah biakpiaknak a bawl haw hangin, Topa i mai ah numei pha ngawl bangin suak haw naven, mah ti bang cu hi haw tukma toh hi. Hi daan cu Israel miten a zui leleng haw tukmi hi.
8Israel mi pa kha khat ahimata Israel tei lak a, ummi ngamdangmi pa kha khatin halkang biakpiaknak le biakpiaknak dang hihen, 9Topa i nelah a piak ten Puanbuk tumnak kongka ah hi ngawlin, mundangah a pia tale amah cu Pathian miphunin sialcih hi tukma toh hi.
10Israel mi pa kha khat ahimata Israel tei lak a, um nam dangmi pa kha khatin sathi a ei tale, Topa i mitmai pha ngah tukma hi. A hinnam sung hei pen suah hi tuk hi.#Pian 9:4; Thiam 7:26-27; 19:26; Daan 12:16, 23; 15:23; 11Iti bang ngamsa ahi vangin a nunnak cu a thi sungah um hi. Mah hangin thi hempoh cu mihing tei sualhahnak tukin biaklandawh humah leih un hi, tin Topa in thu a piaknak hi. Nunnak ahi mi thisanin sual thiangtik hi.#Heb 9:22; 12Mah hangin Israel mi le ngamdangmi hihen sathi ei pahsuh un tin, Topa in, a tihnak hi.
13Israel mi pa kha khat, ahimata a lak haw a, ummi ngamdangmi pa kha khatin eih thiangmi ngamsa le vano hihen a man tale, a thi cu leihumah lei henna, leivul tuah khuh hen hi. 14Itahim titale ngamsa i nunnak cu a thisan sungah um hi; mah hangin sathi ei pahsuh un. Sathi a eitu cu a miphun sung pen suah hihen tin, Topa in Israel mite a tihnak hi.
15Israel mi hihen, hinnam dang hihen, a mahno a thi cawm mi ngamsa, ahimata sahang i matmi cik a ei tale, a puansawp khawng hen hi. Tuibual tuk a, mah ni taklam tian mithiang ngawl hi tuk hi. 16Mahti bangin a bawl ma tale, a mawhnak cu amah in thuak tuk hi.
Currently Selected:
THIAMPI NADEHNAK 17: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
