THIAMPI NADEHNAK 13

Phaaknat Cungcang Zui Tuk Daan

1Moses le Aaron nelah hi daan hi Topa in pia hi. 2Mi pa kha khatin vunah mei ma a nei tale, a bolmi le a phaakmi meima ahi vangin mi lawh thei phaaknatin, a suah theih hangin amah cu Aaron hin thiampi pa kha khat lakah hawhpih hi tuk hi. 3Amah cu thiampi in zo tuk a, meima sung a, multe ngo in, a meima cu elkim a vun sangin a thuk dedeuh tale phaaknat hi. Thiampi in, a zoh celh ten amah cu mi thiangtho ngawl hi tin than tuk hi. 4Mahnaven a vun a phaakmi cu ngo in, a elkim vun sangin thuk deuh cuang ngawlin, a sung a, multe a ngo ma tale amah cu thiampi in ni salih sung a dangno in koih tuk hi. 5Ni salih ni ten thiampi in zo lehin, a muhnak pen a meima cu a banglengin, a luai cuang ma tale, ni salih sung a dangno in koih lehleu tuk hi. 6Ni salih ngei ten thiampi in zo lehleu tuk a, meima cu luai dedeuh ngawlin a dam deuh tale amah cu thiangtho hi tin than tuk hi. A meima cu meima thawthong hi. A puante sawp khawngin mi thiangtho hi tuk hi. 7Mahnaven thiampi in zo in thiangtho hi a tih nungten a meima a luaileh tale, thiampi nelah hawhleh tuk hi. 8Thiampi in zoleh tuk a, meima a luai dedeuh tale, phaaknat a hih hangin mi thiangtho ngawl hi tin than tuk hi.

9Mi pa kha khatin phaaknat a neih ten amah cu thiampi nelah hawhpih hi tuk a, 10thiampi in zo tuk hi. A vun meima cu ngo in, a meima sung a, mul vang ngo in, a nai a um ahi tale, 11a dam thei ngawlmi phaak nat hi. Thiampi in mi thiangtho ngawl hi tin than tuk hi. Mi thiangtho ngawl a hih zo hangin a dangno koihin, zoh kul lehma toh hi. 12A meima cu zalh dedeuhin, a taksa pumpi a dim khawng ahi tale, 13thiampi in zoleh tuk hi. A taksa pumpi dim khawng ngangai hi tih na mu tale, mi thiangtho hi, tin tituk hi. A vun a venghawngin, a ngo khawng hangin mi thiangtho hi. 14Mahnaven a taksa ngangai a meima tale, mahtih bangin a meima bekin amah cu mithiang ngawl hi. 15Thiampi in zoleh tuk a, taksa meima mi amu ngangai tale amah cu mi thiangtho ngawl hi tin than tuk hi. A taksa tianin meima ahi tale phaaknat a hih hangin, amah cu mi thiangtho ngawl, mi phaak hi. 16Mahnaven a taksa meima damin, a ngo thawthong bek tale thiampi nelah hawhin, 17Thiampi in amah cu zo tuk hi. A taksa meima cu ngoleh tale thiampi in mi thiangtho hi, tin than tuk a, mi thiangtho in suak tuk hi.

18Mi pa kha khat uilut meima vei in, a dam nungten 19A damnak mun pen bumin, a ngo in maw, ahimata a san le ngo in, a bol a suakleh tale thiampi nelah lakleh tuk hi. 20Thiampi in zo tuk a, meima cu a el a, vun sangin thuk deuhin, a meima sung a, mul le a ngo a hih tak mi thiangtho ngawl, tin thiampi in than tuk hi. Uilut meima in pan naven phaaknat hi. 21Mahnaven thiampi, a meima cu thuksap ngawlin, a ngo thah tale thiampi in amah cu a dangno in, ni salih sung koih tuk hi. 22A meima a zalh dedeuh tale thiampi in, mi thiangtho ngawl, tin than tuk hi. 23Mahnaven meima cu amah leng, umin, a zalh cuang ma tale, uilut meima pawn bek tang a hih hangin amah cu mi thiangtho hi, tin thiampi in than tuk hi.

24Mahma tale, mi pa khat cu mei in kangin, a taksa a ngo in maw, ahimata a san le a ngo cokhelin, a um tale, 25thiampi in zo tuk a, meima sung a, multe ngo in, a elkim vun sangin a thuk deuh tale meikangnak pen a piangmi phaaknat hi in, thiampi in, a thiangtho ngawl, tin than tuk hi. 26Mahnaven a meima sung mul ngo ngawlin le elkim vun sangin thuk saw deuh ngawlin a pianzia a ngo thim tale, thiampi in amah cu ni salih sung adangno in koih tuk hi. 27Ni salih a kim ten thiampi in zoleh tuk a, meima cu a zalh pepel tale, phaaknat a hih hangin thiampi in mi thiangtho ngawl, tin than tuk hi. 28Mahnaven a meima cu zalh ngawlin a pianzia cu a ngo thah thim tale, phaaknat kha ma hi, a bum thong hi tuk hi. Mah hangin amah cu thiampi in mi thiangtho hi, tin than tuk hi; itahim titale meikang mapawn bek hi.

29Pano hihen, numei hihen, a lu ah ahi mata a kha ah, meima a nei tale, 30thiampi in zo tuk hi. A meima cu a elkim vun sangin thuk deuhin, a sung a mul aile in, a neuno tale phaaknat hi a, thiampi in mi thiangtho ngawl, tin than tuk hi. 31Thiampi in, a zoh ten meima cu a elkim vun sangin thuk saw ma naven, a meima sung mul cu mul dang bang, ahimata thiampi in, ni salih sung a dangno in koih tuk hi. 32Ni salih ni-in thiampi in zoleh tuk a, meima cu zalh ngawlin a meima sungmul cu aile ngawlin le a elkim a vun sangin, a thuk saw ma tale, 33a meima mawk a, mul cu met tuk hi. Thiampi in ni salih sung a dangno in koihleh hih tuk hi. 34Ni salihnak ni ah thiampi in zoleh tuk a, meima cu zalh ngawlin a mawk a, vun sangin a thuk saw bokma tale thiampi in amah cu mi thiangtho, tin than tuk hi. Mahpa cu a puan sawp tuk a, mi thiangtho in suak tuk hi. 35Mahnaven mi thiangtho, tin tih a hih nungten a meima cu a zalhleh tale, 36thiampi in zoleh tuk hi. A meima a zalh ngangai tale, a mul aile le aile ngawl vang zoh kul lehma toh hi; mi thiangtho ngawl hi. 37Mahnaven thiampi i muhnak bangin a meima cu zalh ngawlin a meima sungah mul phano in, a po tale, a meima cu a dam tuk a, thiampi in mi thiangtho, tin than tuk hi.

38Pano hihen, numei hihen a vun humah a ngo phelhphulh a um tale 39thiampi in zo tuk hi. A ngo in, a can mite cu ngo diakduak tale, a vun humah a ngo a piang thawthong a hih tak mi thiangtho hi.

40-41Mi pa kha khat i sam cu a mailam hihen, a nunglam hihen a zuk hei in, mi thiangtho ngawl hi kha ma hi. Lukolh thawthong hi. 42Mahnaven a lukolh humah a san le ngo helin meima a um tale phaaknat hi. 43Thiampi in amah cu zo tuk a, san le ngo cokhel mi meima a um ngangai tale, 44thiampi in mi thiangtho ngawl, tin than tuk hi. Itahim titale, a lu ah mi lawh thei meima nei hi.

45Kua hei hihen phaaknat a neitu cu puansia silh tuk hi, a sam kiat ngawlin hah tuk a, muk hupin, “Mi thiangtho ngawl ing hi, mi thiangtho ngawl ing hi,” tin au tuk hi. 46Hi nat a neih sung hempoh cu mi thiangtho ngawl hi leleng tuk a, khuahialah amah bekin um tuk hi.

Baalbute A Um Ten Bawl Tukmi

47Tuumul puan hihen, pat puan hihen, puan a baalbu tale, 48ahimata tuumul puan hihen, pat puan hihen, puan hum mun kha khatah baalbu demno a um tale, mahma tale savun humah hihen, savun tuah bawlmi na pa kha khat humah baalbu a um tale, 49a pianzia tangphaw bang thim, a san thim tale, a zalh thei mi baalbu a hih hangin thiampi nelah lak tuk hi. 50Thiampi in zo tuk a, ni salih sung mah thil cu a dangno in koih tuk hi. 51Ni salih ni ten zoleh tuk a, baalbu mi cu a zalh ahi tale, mah na cu a thiangtho ngawl hi. 52Thiampi in mei tuah haal tuk hi, itahim titale a zalh thei mi baalbu a hih hangin mei tuah haal tuk hi.

53Mahnaven thiampi in, a zoh ten a baalbu cu mah thil humah a zalh ma ahi tale, 54mah na cu sawptik tuk a, ni salih sung koih hih tuk hi. 55Mah nungten zoleh tuk a, zalh ma naven baalbu lengin, a pianzia adang cuang ma tale, a thiangtho ngawl leleng hi tuk hi. A baalbu cu nunglam ahi vang, mailam ahi vangin, mah na cu haal un hi. 56Mahnaven thiampi in, a zohleh ten a baalbu cu a pai zo ahi tale, puan ahi mata savun i baalbutiknak mun bebekno botkek tuk hi. 57baalbu leleu in, a zalh pepel tale, a nei atu-in, a na cu haal tuk hi. 58A na cu sawpin, a baalbunak a pai thei tale, a sawpleh nungten a thiangtho in suak tuk hi.

59Hihi cu tuumul puan hihen, pat puan hihen, puan a baalbu ten ahimata, pat puan hihen, tuumul puan hum mun kha khatah hihen, savun tuah bawlmi na pa kha khat i humah hihen, bawl tukmi daan hi.

Currently Selected:

THIAMPI NADEHNAK 13: NBF1

Highlight

Copy

Compare