THIAMPI NADEHNAK 11

Eihpha Ngamsate

(Daan 14:3-21)

1 Topa in Israel mi nam tei ca in, a nuailam a daan cu 2Moses le Aaron i nelah pia hi. Leihum ngamsa 3Ketin kakmi le an hemsa thai lehmi hempoh ei un hi. 4-6Mahnaven, kalauk, meican le sabek cu ei pahsuh un. Hi ngamsate cu ngamsa thiang ngawl mite hi; itahim titale an hemsa thaileh haw ma naven ketin kak nei haw ma hi. 7Vokcik ei pahsuh un hi, ketin kak nei haw naven an hemsa thaileh haw ma hi. 8Hi ngamsa cu ei pahsuh un; a luang hei zen pahsuh un, a thiangtho ngawlmi hi.

9Teh le lip a neimi ngasa hempoh cu ei thei uh ci. 10Mahnaven tui sung a, teh le lip a nei ngawl mite cu ei hihim pahsuh un. 11Cik thiangtho ngawlmi hi. Hi cu ei pahsuh un, a luang hei zen pahsuh un hi. 12Tui sung a, ummi teh le lip a nei ngawlmi hempoh ei hihim pahsuh un hi.

13A nuailam a, vano hi ei pahsuh un; muvanlai, simbu, muthi, 14mupi, muhaang, 15langta, va-ak, 16kalauk vano, pengpelep, simbu nam hempoh, 17sam ak, baihaang, 18cikdawt, ngasa man, 19vaca, lih ak, cempu le baak hi.

20A dawktohnak haw tuk ke mang neimi sial ngawl, 21ha le ke li nei lungsivai hempoh cu eih thiang ma hi. 22Khaau, khuangbai le khaauhingte cu eih thiang hi. 23Mahnaven a dang lungsivai, ha mei mi le a vak mite hempoh cu eih thiang ngawlmi hi.

24Kua hei hihen a nuailam a, ngamsa tei luang a zentu cu taklam tian mithiang ngawl hi haw tuk hi. 25Kua hei hihen hi tei luang a latu cu a puan haw sawp henna, taklam tian mithiang ngawl hi haw tuk hi.

26-28Ketin kak nei in an hemsa thaileh ngamsa sial ngawl, ketin kak ngawl ngamsa thiang ngawl hi. Kua hei hihen hi ngamsa tei luang a zentu cu a zen ni haw taklam tian mithiang ngawlin suak haw tuk hi: kua hei in ngamsa tei luang a puatu cu a puak laihin, a silhmi puan sawp khawng hen hi. Mahnung hei ten taklam tian mithiang ngawl hi leleng tuk hi.

29-30Huan, ngam nam, inn nam, thangkawng, nuzel, a phunkim le thankik cu eih thiang ngawl tihmi hi.

31Kua hei hihen a hum a nate a zentu le a luang a zentu cu mah ni taklam tian mithiang ngawl hi haw tuk hi. 32A luang haw thil pa kha khat humah a cak kha tale mah thil cu a thiang ngawlin ngak hi tuk hi. Thing hihen, puan hihen, savun hihen, dip hihen, itih bang a, man mi ahi hei in, a thiang ngawlmiah koih hi tuk hi. Hi thil cu tui sungah nip hi tuk a; mahnaven taklam tian a thiang ngawlmi hi leleng tuk hi. 33a luang cu beelnu sungah a cak haw tale mah beel sung a, ummi hempoh cu a thiang ngawlmi hi tuk a, mah beelnu cu sukeh un hi. 34Mah beel sung a, tui i leih kha mi an hempoh cu a thiangtho ngawlmi hi. Mahti bang beel sung a, in pha hempoh cu in pha ngawlin suak tuk hi. 35Hi saluang tei khiakmi hempoh cu a thiang ngawlmi haw hi. Taklei tuah bawlmi thuangthu ahi tale sukeh khawng un. 36Hi saluang tei a tot khakmi hempoh cu a thiang ngawl mi hi; mahnaven tui naak le tui kuang cu a thiangin sial hi tuk hi. 37Saluang pa kha khat cu cin tukmi anci humah a cak kha hei in, mah anci cu a thiang hi leng tuk hi. 38Mahnaven tui sung a, diahmi anci humah a cak kha sual tale, mah anci cu a thiang ngawlmi hi.

39Eih thiangmi ngamsa pa kha khat thi in, mah saluang a zentu cu taklam tian a thiang ngawl hi tuk hi. 40Kua hei hihen hi cik a ei ahi tale, a puan sawp khawng hen hi; mahnaven mah ni taklam tian mithiang ngawl hi leleng tuk hi. Kua hei hihen saluang a puatu cu a puan sawp khawng hen; mahnaven mah ni taklam tian mithiang ngawl hi leleng tuk hi.

41Leihumah a vak susuih mi ngamsa, 42a pum lei phiatin, a vakmi ngamsa hihen, ke li tuah a vakmi le ke tampi a neimi hihen ei hihim pahsuh un. 43Hite cu ei in, nangmuh le nangmuh mi thiangtho ngawlin bawl copdun pahsuh un hi. 44Keimah cu Topa na Pathian uh ing hi, keimah ka thianthoh hangin, nohte vang thiangtho bok un hi.#Thiam 19:2; 1Pet 1:16; 45Keimah cu na Pathian uh hi tukin, Izipt ngam pen a suahtultu Topa ing. Keimah cu a thiangthomi ka hih hangin nohte vang thiangtho bok un.

46Hite hi, ngamsa, vano le tuisung a ummi hempoh le leihum a vakmi ngamsa hempoh tuah pehdunmi daan cu hite hi. 47Sonbang ngawl le sonbang hihen, ngamsa eih thiang le eih thiang ngawl hihen, deidan thiam tukin ngalling un hi.

Currently Selected:

THIAMPI NADEHNAK 11: NBF1

Highlight

Copy

Compare