KAH LA 3
3
Dantatnak, Sihkiknak le Muansannak
1Pathian bawlsiatnak a haksa dan,
A thinuknak a lauhuai lam,
a theitu ing.
2Vaknak um ngawl khuathim sungah,
thuk dedeuhin dok hi.
3Hehpihnak um ngawlin,
sun thaleng cawl ngawlin vat hi.
4Ka taksa balin,
ka nguhte vang ek khawng.
5Haksat le vansannak
thawnginn sungah khum hi.
6Thihnak khuathim namsia lakah
ka nuam ngawl zal umtik hi.
7Thik taicin tuah khihin, luat tung tih
muansan tuk nei ngawlin
thawngta ing.
8Pathian nelah bopnak ngenin,
au ing,
Mahnaven ka aunak
za nuam ma.
9Hoi thah li in, hawh ing a,
ka heknak hempoh ah
suang kulhtianin khak hi.
10Vom bangin pangin,
kiosa bangin dawk hi.
11Lampi pen hilvawkin,
botbal khawngin taisan hi.
12A thal khau sai in,
a muibahmi in bawl hi.
13A thal tuah kapin,
ka lung sungah thukpi tum.
14Mipi ten sun nilui nuihsan haw hi.
A ca haw in cekpan bawlnakin
cang ing.
15Ka nuam ngawl zalin tuikha intik a,
a kha mi thuaknak cu
an bangin eitik hi.
16Ka mai cu lei tuah nawt ci a,
suang humah ka ha
ekbulh khawng.
17Damnak, lemdaihnak le
lungnopnak ten hawhsan haw.
Lungdamnak cu iti bangta hi a,
tih hei cingleh ma toh ing.
18Ngei nung tukma toh ing.
Topa lak pen
ka muansannak bo zo.
19Inn le lo nei ngawlin
ka thuak lih hi
ka ngaihsut ten ka ca in,
a kha mi thihsi bang hi.
20Mahmi cu cawlngawlin
ngaisung ing a,
ka thinnau susuk hi.
21Mahnaven hih thil pa khat
ka zak ten muansannak
heng kikleh hi.
22A kho mi Topa i itnak cu
itik hei ten cat awng ma hi;
A hehpihnak cu tawp ni nei ma hi.
23Zing khuavak bangin thak leleng.
Muantak a hihnak cu nasezet hi.
24Ka covo cu Topa bek hi;
Mah hangin ka muansannak
a nelah koih tung.
25 Topa cu amah a muangtu
tei ca in pha hi.
26Thinsau zetin ngak hih tuk cu
ka ca in phabel hi.
27Mah thinsaunak cu
khangno laihin
cung ahin phabel.
28Haksatnak a thuak uhten,
thinsau le dai zihziahin
khung tukmi hung hi.
29Niamkhiatnak tuah
lu kun tukmi hung hi;
Itahim titale muansannak
um kha thei laih hi.
30Zotsakmi le vahmi ahi uh hei in,
thuak kawko khawng tukmi
poh hung hi.
31 Topa cu mi hehpihtu hi in,
Kumkhua in eimuh lawl tukma.
32Thasiatnak a pia hei in,
a lainatnak cu lang tuk hi;
A itnak cu muantak hi.
33Ka khaw-ngaihnak le
ka thuaknak hangin
a lungdam viang ma hi.
34 Topa in,
ka lungmu thawnginnah
lei ah cilpek ka hihlam
thei khawng hi.
35Ama piakmi covo a ngah ngawl uhten
amah in thei khawng hi.
36Thukhennak mun a thuman
a dinpih haw ngawl ten
amah in thei khawng hi.
37 Topa i tumtahnak tel ngawlin,
imah bawlsuak theih awng ma hi.
38Cungnungbel thupiakmi bangin,
a sia le pha co ten haw hi.
39A sual haw hangin bawlsiatmi
a hih haw ten itakaw mihingte
a phuciak lih haw?
40A nuncan uhte hi zo kikin,
Topa nelah kikleh un hi.
41Vancung Pathian nelah
a khut uh bek hi ngawlin
a lungmu uh vang pia nung hi.
Hi bangin thungen nung:
42“Topa aw, na mai ah
sualin langpang zo ung;
mahnaven ngaidam ma ci.”
43Na thinuknak tuah thuamdun ci;
Hehpihnak nei ngawlin
hilin that ci.
44Na thin pulhangnak meinim cu
ka thungetnak uhin
paihlet vawk thei ma.
45Nangmah in, leihum buppi
miphun tei mai ah
ningdelhhuai buakin bawl ci.
46“Ka ngal uh hempoh ten zotsak
nautatnak awnkam tuah
cek haw hi.
47Siatsuahnak le bolalnak tawk zo ung;
Lauthawngnak le
lauhuainak sungah um ung.
48Ka mihingte siatlalnak
a tawh haw hangin
ma hitui cu lui bangin luang hi.”
49Ka hitui cu ciktui bangin
catngawl put leleng.
50 Topa in vancung pen zo in,
amuh laklawh cawl awng ma.
51Khuapi sung unau tei humah
a hengmi thil hangin
ka thinna leita thong.
52Vano bangin thang tuah awk haw,
thu la um ngawlin
a huatu ka ngalin hi.
53A nung lengin khuk sungah
keimah khiasukin,
suang tuah sinta zam haw hi.
54Tui in, a dim tutuh ten
thi pal tung tin
ngaisung ing.
55Maw, Topa,
khuk sung a tawbel pen
nangmah sam ing.
56Ka aunak ngai tukin ka kut ten
theihsak ci.
57Ka aunak aw cu donleh ci a,
‘Lau pahsun,’ ti ci.
58 Topa aw, keimah pan tukin
hung ci a,
ka nunnak cu pan ngah zo ci.
59Ka humah a phatngawl dante
na theihsa khawng
a hih hangin ka thu cu cel zetin
khensak zalin hi.
60Ka ngal ten a mitkem haw dan le
a bawlsiat haw dante cu
thei khawng leng ci.
Maw Topa nangmah in,
a zotsaknak le a bawlsiatnak
haw hempoh
thei khawng leng ci.
61 Topa in, zotsaknak le
a bawlsiatnak haw hempoh
za khawng leng ci.
62Sun thalengin keima thu bek
son haw a,
keima siat theihnak tuk
bebek ngaisung haw hi.
63A khun haw ten hihen,
a din haw ten hihen
cekpan bawlnakin
mang li thong haw hi.
64“Topa hiti bang
a bawl haw hangin
cawh inna, dantatin hi.
65Siatcam inna, lungkhamnak tuah
dim haw tahen.
66Na thinuknak tuah
zei tul zal inna,
leihum pen bolaltik khawngin hi.”
Currently Selected:
KAH LA 3: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
