KAH LA 2
2
Topa In Jerusalem Dantat
1 Topa cu a thinuk hangin
Zion cu thimnak tuah khuh hi;
A sunloihnak cu van pen lei ah
khesuk hi.
A thinuk ni ten, a Biakinn tian
nunghek hi.
2Judah ngam khuano hempoh,
siatsuah khawng hi.
Ngaihsut saknak imah um ngawlin
a ngal kulhtiante phelet khawng.
A ngam haw hupin,
panmun a khualnak haw,
ngal kulhtiante cu zahcak mualphonak
hengtik hi.
A uktu tei humah le a uknak
haw ah in.
3A thinuknak tuah Israel i ngilnak cu
sat tawng khawng hi.
A baan zaksa cu dok kiklehin,
ngal tei a do haw ten
mei alh bangin
ka humah alh dudumin,
na hempoh siatsuah khawng hi.
4Ngalte bang bokin
a thalcang tuah
keimah kapin, ka min phatnak
hempoh uh cu amah in
susia khawng hi.
Hi Jerusalem khuapi sungah,
a thinuknak mei alh bangin
thuak ung.
5 Topa in, ngalte bangin
Israel bawlsia khawng zo.
A khua kulhtian haw le
a kumpi innte cu
buakseh bangin suaktik zo.
Judah mipi tei humah
a bo thei ngawl
thasiatnak hengtik zo hi.
6Amah ka biaknak uh Biakinn pi cu
keh bilhbelhin sepkeh khawng hi.
Ka can uhmi nite, Sabbath ni le
ni thiangthote cu
susia khawng zo hi.
Kumpi le thiampite vangin
a nase zetmi
a thinuknak cu thuak haw hi.
7 Topa in, a biaklandawh le
a biakinn thiangtho nangawnin
zamsanin, biakinn kulhtiante cu
ngalte phelettik khawng hi.
Pathian ka biaknak uh munah
ngal nehnak aupih het haw hi.
8 Topa in, Zion kulhtiante cu
siatik loli tukin a tumtah hamsa
khawng hi.
Taitan dawhmi innte le
a kulhtiante cu sia bilhbelh
khawng zo hi.
9A kongkate cu buaksehmi sungah
khuh khawngin um hi.
A kongholhte vang ek khawng.
Kumpi le bawi upate cu
sal matmi thawngkhiaknakah
heng khawng zo haw hi.
Topa i lak pen profet ten
muhnak neileh ngawltohin,
Daan cu kuamah in
zilh haw ma toh hi.
10Jerusalem putekte cu, lei ah
dap diudeu in khungthong haw hi.
A lu ah vutzakin, a pumpi hawah
thangkhau puan khuh haw hi.
Jerusalem khanglaite cu
lei tawngkha tianin,
a lu kun haw hi.
11Ka kahnak hangin
ka mit kha khawng.
Ka lungmu tamnakin
ka lungbing khawng;
Ka mihingte bawngsiatnak
a tawh haw hangin
ka thasia leita in,
pel li thong ing.
Naupang le naumomte,
khuapi lampi lakah
lum haw hi.
12Dangdum le ngilkialin,
nu aw, tin kap haw hi.
Lampi humah maliam thuak bangin,
lum haw a, dem hehetno in,
a nu le pa tei ang humah,
a nunnak haw bo hi.
13Maw, Jerusalem,
deih awh zetmi Jerusalem,
ikaw ka otleh tuk toh?
Itih bangin kaw
ka hehnem theih tuk?
Nang bangin a thuaktu
um awng haw ma hi.
Na meima hi
tuipi thuanthum bangin
thuk a hih ten akua kaw
a damtik thei tuk?
14Na profet ten zolthu a son haw
tih ngawl hilh tuk
nei dang haw ma!
Zolthu bek a hilh haw hangin,
na sualnak le phuang awng
sih haw ma!
Thuman ngawl a hilh haw hangin,
sihkiknak kul ngawlin ngaisung ci.
15Na el a hawhtu ten,
zawnsak nautatnak tuah
zo haw hi.
A lu haw thingin,
Jerusalem siatlalnak cu
nuihcip haw hi.
“Hihi maw khuapi mawibel
a tih haw mi cu?
Leihum buppi i uangthuan
pih zetmi cu na hi maw?”
tin ti haw hi.
16Na ngal ten nautatin,
huatnak mit tuah zo haw hi.
A muk haw cipin, nuihcip haw a,
siatsuah khawng zo ung.
Ka ngahhelh uhmi ni cu hihi, hi,’
tin ti haw hi.
17 Topa in, bawl tung hi
a tih leleng bangin
bawlsuak ngangai zo hi.
Ngallinnak a piak hamsa bangin,
hehpihnak nei ngawlin
bawlsia khawng zo.
Ka ngal tei lakah, nehnak pia hi.
Ka siatlal khawng uh hangin
amuhte cu lungdamtik hi.
18Maw Jerusalem, na kulhtian ten
au haw henna, na hitui cu
sun le zanin, nguntui bang luang hen.
Na ca in colh ni um ngawlin
na hitui vang hul ni nei ma hen.
19Zankhua tho lelem inna,
Topa cu sam lelemin hi.
Topa i mai ah
na lungmu natnak cu
tui bangin luangtik inna,
lamkawi tihkimah
a thi awn tohmi
na canote,
an ngawlin a thi khawng awn
tohmi na cano tei ca in
baanzakin hehpihnak ngenin hi.
20Maw Topa!
Zo hemin,
na bawlsiat lihmite hi zo hemin hi.
Numei ten a ihzet haw mi
a cano tei cik cu ei haw hi.
Thiampi le profette cu
Biakinn pi sung loli pen
that haw hi.
21Khangno le upa ti ngawlin
thi haw a, khuapi lampi ah
khanglai le tangvalte vang
thi haw hi.
Hehpihnak nei ngawl tei
ngalnam tuah that ci.
22Ka ngalte cu puaisim tuk bangin
khua tihkim pen zawm ci.
Na thinuk ni ten a luat theitu
kuamah um haw ma.
Ka ihzetmi ka canote
thah sak khawng haw hi.
Currently Selected:
KAH LA 2: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
