JEREMIAH 52

Jerusalem Caksuknak

(2Kum 24:18-25:7; 2Khang 36:11-16)

1Zedekiah cu Judah kumpi a deh ten kum sawm nih le kum khat kimin, Jerusalem pen kum sawm le kum khat uk hi. A nu i min cu Hamutal hi in, Libnah khua um Jeremiah i canu hi. 2Kumpi Jehoiakim bang lengin kumpi Zedekiah vang Topa i humah sual hi. 3Topa cu Jerusalem mi le Judah mitei humah a thinuk zetin, a mitmuh ngawlnakah hawlvawk hi.

Babilon kumpi Nebuchadnezzar do nuamin, Zedekiah cu ngaltho hi. 4Nebuchadnezzar cu a ngalkapte tuah hawhin, Zedekiah kumpi a dehnak kum kuah kum, ha sawm ha, ni sawm ni-in, Jerusalem do hi. Khuapi pualeu lamah ngiahbuk bawlin, a kimin lei tiang haw hi.#Ezk 24:2; 5Zedekiah kumpi a deh kum sawm le kum khat tiang kil haw hi. 6Mah kum sawm le kum khat kum, ha li ha, ni kuah ni-in, paam a nase leita hangin khuasung mite eih tuk imah neileh haw ma toh. 7khua kulhtian pheletin, Babilon ngalkap ten Jerusalem khuapi cu kil tiptep khawng haw hi. Kumpipa i huan sung pen hawhin, kulhtian pa nih a pehduntu kongkhah lampi tawnin, hawh haw a, Jordan Munlawn lamah tai haw hi.#Ezk 33:21; 8Mahnaven Babilon ngalkap ten kumpi Zedekiah hil haw a, Jerikho khua el munlawn pen man ngah lengin, a ngalkap ten taisan khawng haw hi. 9Zedekiah cu kumpi Nebuchadnezzar lakah hawhpihin, Nebuchadnezzar cu Hamath ngam Riblah khua ah umin, Zedekiah i thu cu soncat sak hi. 10Riblah ah Zedekiah i capa pa khat cu a pa i mitmuh cilcelah thatin, Judah bawi dangte vang that hi. 11Mah nungten Zedekiah i mitcang pholhin, thik taicin tuah a khih nungten Babilon ah kuat hi. Babilon ah Zedekiah cu a thih ni tian thawnginn sungah um hi.#Ezk 12:13;

Jerusalem Biakinn Siatnak

(2Kum 25:8-17; 2Khang 36:17-21; Jer 39:8-10)

12Nebuchadnezzar i Babilon kumpi a deh kum sawm le kum kuah kum, ha nga ha, ni sawm ni-in, kumpi lakah ngaihsutnak piatu le a ngalkap hotu ngalbawi Nebuzaradan cu Jerusalem khua sungah tumin, 13Biakinn, kumpi inn le Jerusalem khuasung bawi upa tei inn hempoh mei tuah haal khawng hi.#1Kum 9:8; 14A ngalkap ten khuapi kulhtiante phelet khawng haw hi. 15Nebuzaradan in Jerusalem ah a tangcalam hempoh cu Babilon ah hawhpih khawng hi. 16Mahnaven Judah ngamah mi ca-ngahbelte le imah nei ngawlte cu zamin, lo nadek tukin le sabit huan bungtu tukin koih hi.

17Babilon miten Biakinn sung a um, daal tuah bawlmi khuamte le lengte cu sepkeh khawngin, daal tui kuang ngengpi vang siatsuah khawng haw hi. Daal hempoh cu Babilon ah pua khawng haw hi.#1Kum 7:15-47; 18lei suahnak phailai le biaklandawh thiantik ten manmi vut khawlnak kuangte, mei vakmi mei-inn le a nate, biakpiaknak bawl ten sathi donnak maihumte, namtui haal ten manmi kuang kumte le Biakinn sung manmi daal na hempoh la khawng haw hi. 19Sui le ngun tuah bawlmi na hempoh vang la khawng haw; kuang kumte, meiling laknak kuangte, biakpiak ten sathi khawlnak maihumte, vut koihnak kuangte, mei-inn khuamte, namtui halnak kuangte le sabittui biakpiaknak bawl ten sabittui koihnak maihumte vang la khawng haw hi. 20Kumpi Solomon in daal tuah a bawlmi nate: khuam pa nih, leng, tuikuang ngengpi le tuikuang dotu khuicang sawm le pa nihte cu cuai hei teh theih ngawlin ngit haw hi. 21Khuam pa nih cu bangve hi, pa khat cu pi sawm nih le pi salih sangin, pi sawm le pi liat sung huam hi, a sunglam thik kua cu pi thum sah hi. 22Khuam lekah daal tuah bawlmi lu bawk umin, pi salih le lang sang hi, a kimkotah taleti ngah cuangin, mawitiknak bawlmi um hi. A venghawngin daal tuah bawlmi hi. 23Mahti bangin ceimawinak tuk bawlmi taleti ngah cu khuam kimkotah za khat ten umin, mah sung pen sawm kuah le pa luk cu lei pen muh theihmi hi.

Judah Mi Babilon Ah Pui

(2Kum 25:18-21, 27-30)

24Mah i hum pen Babilon ngalkap hotu ngalbawi Nebuzaradan in, Thiampi Sang Seraiah, a sangtu thiampi Zefeniah le Biakinn a bawi ngengpi pa thumte cu thawnginn sungah khum tukin puivawk hi. 25Khuapi sung a ngalkap hotu ngalbawi pa khat, khuapi sungah a tang laihmi kumpi ngaihsutnak piatu sung pen, mihing salih, ngalkap zung cazin lentu le ngalbawi sangtu pa khat, upa sawm lukte vang hawhpih hi. 26Nebuzaradan in Hamath ngam, Riblah khua a um, 27Babilon kumpi lakah pui hi. Mahlai munah Babilon kumpi in vattikin, thattik hi.

Mah hangin Judah mite cu a ngam haw pen saltannak ngamah hawhpih haw hi. 28Nebuchadnezzar in, sal tukin a pui mi mihing cazin cu a nuailam bangin hi. Kumpi a dehnak kum salih kumin, mihing thawng thum le sawm nih le pa thum, 29A kum sawm le kum liat kumin, Jerusalem pen mihing za liat le sawm thum le pa nih, 30Kum sawm nih le kum thum kumin, mihing za salih le sawm li le pa nga, a venghawngin mihing thawng li le za luk cu Nebuchadnezzar in pui hi.

31Evilmerodak cu Babilon kumpi a deh kumin, Judah kumpi Jehoiakhin humah hehpih lainatnak a neih hangin thawnginn pen suah hi. Mahti bangin a suah cu Jehoiakhin thawng khia tukin a pui nung, kum sawm thum le kum salih kum, ha sawm le ha nih ha, ni sawm nih le ni nga ni-in hi. 32Evilmerodak in Jehoiakhin cu phano zo in, Babilon ah thawngta bokmi kumpi dadang lakah upatnak a piakmi sangin tam saw in upatnak pia hi. 33Mah hangin Jehoiakhin cu phano zo in, a thawnginn khunnak vante thektikin, a nunsung hempoh kumpi cabuai ah, an eitik bok hi. 34Nisial a man tukin Babilon kumpi in Jehoiakhin cu a nunsungin, a kulmi hempoh pia leleng hi.

Currently Selected:

JEREMIAH 52: NBF1

Highlight

Copy

Compare