JEREMIAH 51
51
Babilon Humah Thukhennak Dang
1 Topa in, “Babilon le a mihing tei humah siatsuahtu huihpi#51:1 Siatsuahtu huihpi tih hi siatsuahtu hawvang tih tuah bangten hi. hengtik ing. 2Babilon mutvawktu tukin huihpi hah tung, mah siatsuahnak ni a hen ten muntihkim pen do in, a ngam haw cu kolh khawngin, a bawl nung haw ten zamvawk haw tuk hi. 3A ngalkap tei thalcang kahnak tuk hun pia pahsuh un. A thik angki silhnak tuk hun vang pia pahsuh un. Tangval hi tin kuamah khawih pahsuh un. A ngalkapte venghawngin that khawng un. 4Maliam haw tuk a, khuapi lamtuanah thi haw tuk hi. 5Israel tei mi thiangtho keima humah sual zo haw naven Topa Cungnungbel Pathian keimah in Israel le Judah mite cu nunghek ma laih ing. 6Babilon pen suakca tukin taitul un. Babilon sualnak hangin thihnak tawk nuam pahsuh un. A humah phula in, a thuak tuk zahin bawlsia ing. 7Babilon cu ka khut sung a, sui khuathai, leihum buppi a nguitiktu bang hi. Ngamdang ten a zu cu in haw a, lungmu cawvol khawng zo haw hi.#Mang 17:2-4; 18:3; 8Babilon cu thakhat thu in, caksukin siatsuah khawng hi zo. Kah pih leilui un. A meima noih tukin si zeisak un. Damleh hei hi thei. 9Mahlai a ummi ngamdang ten, ‘Babilon bawm tum nave ung, khuanu leita zo hi. Hawhsan nung inna, a ngam uh le a khua uhah pin nung. Pathian in, a ngilnak hempoh tuah Babilon cu dantatin siatsuah khawng zo ti haw hi.’ ”#Mang 18:5;
10 Topa in, “Ka mihing ten, Topa in, thuman a hihnak langtik zo. Hawh nung inna, Topa a Pathian uh i bawlmi cu Jerusalem mitei lakah hilh nung,” tin au haw ti hi.
11 Topa in, Babilon siatsuah a tum hangin Media kumpite cu tokpil hi. A Biakinn a siattik haw hangin mahti bangin phu lak a tumnak hi. Ngalkapte hotu ngalbawi in, “Na thalcang uh tat hiam un! Na lumphaw uh keng unna, mansa lengin um un. 12Babilon khua kulhtian do tukin theihtiknak pia in, ngalviltu hah bet un. A cingtu vang koih unna, ngal pangtu tuk hah un!” ti hi.
Topa in, Babilon mitei humah bawl tung a tihmi cu bawl zo hi. 13Hi ngamah lui le sumpai tampi um naven a hun umleh ma toh hi; a nunnak khau cu satcat hi zo toh hi.#Mang 17:1; 14Cungnungbel Topa in, Babilon do tuk mihing tamzet hunpih tung a, ngalnehnak tuah au haw tuk hi, tin ama nunnak salin thutiam zo hi.
Pathian Thangphatnak La
15 Topa in, leipi hi a huham
tuah bawl;
A cihnakin leipi semsuahin,
van vang phalh hi.
16Ama thupiak tuah vanhumah
tui thum hi.
Vanmawk deng pen meingo hunpih.
Nguah lakah khuaphelep hahin,
a na koihnak inn pen huih kuat hi.
17Mah amuh haw ten mihingte cu,
imah thei ngawl
misil bang haw hi.
Milim a bawltute cu,
lungbing le khawngai in
um haw hi.
Itahim titale a bawl haw mi milimte cu,
nunnak nei ngawl milim hi.
18Nemcuamnak imah nei ngawl
hi haw in,
zotsak tak hihim haw hi.
Topa hungin,
a siatsuah ten!
Selal khawng haw tuk hi.
19Jakob i Pathian cu mahti bang
kha thawthong ma.
Amah cu ihempoh bawltu hi.
Israel mite cu
Ama bulta tukin teng.
Ama min cu
Cungnungbel Topa hi.
Topa i Sobul
20 Topa in,
“Babilon, nang cu ka sobul le
ka ngaldonak hiamnam hi ci.
Miphun le uknak tampi
sukkehnak tukin mang ing.
21Cipuh le a khungtute suksiatnakin,
Cipuh leng le a mawngtute
sukkehnakin mang ing.
22Numei le pano thahnak tuk le
khangno le upa thahnak,
khanglai le tangval
thahnak tukin le
23tuucing le a tuute thahnak tuk,
lobung le a bial bawlnak
khuite thahnak tukin le
uktu le bawite thahnakin
mang tung,” ti hi.
Babilon Dantatnak
24 Topa in, “Jerusalem humah thil sual a bawl haw hangin Babilon le a mihing tei lakah phu ka lak cu mu tuk uh ci. 25Babilon nang cu lei buppi a siatsuahtu mual sangpi bang hi ci; mahnaven Topa keimah hi na ngal hi ing. Hencip tung a, lei ah vawkin, vut ka cantik nungten zamsan tung hi. 26Buakseh khawmmi suakin, na suang pa khatno hei inn saknak tukin manleh hi tukma toh hi. Kum khua in phillawnah cang tuk ci. Keimah, Topa in, hilh zo ing.
27“Ngaldo tukin theitik un! Miphun hempoh tei zak tukin pengkul tum un. Babilon do tukin hiamnamte tuangtim un. Ngaldo tukin Ararat ngam, Minni ngam le Ashkenaz ngamte hilh un. Ngaldo hotu tukin ngalbawi pa khat teng un. Khaau hon tamzet bangin ngaldonak cipuhte hunpih un. 28Babilon do tukin miphun hempohin tuangtim un Media kumpite, a hotu le a bawite, a ngalkapte le a uk haw mi ngam hempoh vang sam khawng un. 29Leihum buppi cu cantawtokin, hing tetek hi. Itahim titale Babilon ngam cu phillawn suaktik tukin Topa in, a tuptahnak bawl zo hi. 30Babilon ngalkapte cu ngaldo ngawltohin, a sihsan khualnak kulhtian sungah cawl haw hi. A tha nau in, numei bang hi zo haw hi. Khuapi kongkhahte cu phiatlet khawng hi zo a, innte cu mei in kang hi. 31Babilon khuapi cu mun tihkim pen sia pepel zo, tih thu Babilon kumpi hilh tukin thuthantu pa khat nung pa khat tai haw hi. 32Ngal ten ngun a tannak haw mun cu la zo haw a, kulhtiante cu mei tuah haal haw hi. Babilon ngalkapte cu uk theih hileh haw ma toh, suk le to ah vakvai khawng haw zo. 33Ngeican ngawlin ngal ten satvawk haw tuk a, cangcilnak mun a cang a cil haw bangin lei ah sihpek hi haw tuk hi. Keimah, Cungnungbel Topa, Israel i Pathian in hilh zo ing,” ti hi.
34Babilon kumpipa in,
Jerusalem cu sattanin ei hi.
Tui koihnak beel bangin
bua lei khawng hi.
Saam bangin thon khawngin,
A deihmi bek la in,
a dang cu vawk hi.
35Zion miten, “Ka thisan uh
a luantik haw hangin,
Babilon miten thuak bok
haw hen.”
Jerusalem miten, “Haksatnak
ka thuak uh hangin
Babilon mite cawh hihen,
ti haw hen hi.”
Topa In Israel Bawm Tuk
36Mah hangin, Topa in, Jerusalem mitei lakah, “Na thu uh dinpih tung a, na hum uh a thilpha ngawl a bawl haw mi hangin, na ngal uhte cawh tung. Babilon ngam a, tuinakte kotik khawng tung a, luite kangtik khawng tung hi. 37Mah ngam cu buaksehnakin suaktik tung a, ngamsa umnak bekin suak tuk hi. Zoh ngam ngawlmi munah suakin, amutu hempoh ten mullingzet haw tuk hi. 38Babilon mite cu kiosa bangin kio haw tuk a, pawpino bangin ham haw tuk hi. 39Mi huamhap theite hi haw maw? An eih puai bawl tung a, zukham le lungdamin um haw tuk hi. Hihbu haw tuk a, khangloleh haw tukma toh hi. 40Tuuno, keel le tuucang a ngawh haw bangin thah tukin puivawk tung. Keimah, Topa in, hilh zo ing,” ti hi.
Babilon i Mailam Hun
41 Topa in, Babilon cungcangah hi bangin awn hi: “Leihum buppi i phatsonmi khuapi cu ngal ten la zo haw hi. Miphun hempoh tei mai ah Babilon cu mullinghah zetin suak zo. 42Tuipi in, Babilon khuhin, tuicawkpi cu a humah thum dudum li hi. 43Khua dangte cu zoh nah ngawlmi khua suakin, kuamah i um nuam ngawlnak, cawlh vut tuk hei nuam ngawlmi, phillawn ngamko in suakta hi. 44Babilon a, Bel pathian cu dantat tung a, a ngukmi nate kiklehtik khawng tung hi. Miphun hempoh ten bialeh haw tukma toh hi.
“Babilon khua kulhtiante cim zo. 45Israel mite, tai khawng un. 46Thawmnging na zak uh hangin lau pahsuh un. Na lungmu uh vang nau pahsuh hen. Kumsialin ngam sungah thahdunnak le kumpi pa khat le pa khat dodun haw tih thu dadang thang hi. 47Mah hangin Babilon ka siatsuah hun heng tuk hi. Ngam buppi cu zakca le mualpho in koih hi tuk a, mihingte cu thah hi haw tuk hi. 48Saklam pen siatsuah tukin a hungtu mihing tei khut sungah Babilon a caksuk ten, lei le van a ummi hempoh cu lungdamin au leilui haw tuk hi.#Mang 18:20; 49Leihum buppi ah mi tampi ten Babilon in thitik hi; atu-in Babilon cu Israel mi tampi a thihtik hangin amah vang caksuk bok tuk hi. Keimah, Topa in, hilh zo ing,” ti hi.#Mang 18:24;
Babilon Um Israel Tei Lakah Topa Thucahmi
50 Topa in, Babilon mitei lakah, “Thihnak pen suakca zo uh ci! Atu-in tul un! Imah ngak pahsuh un! Na khua uh le na ngam uh cu khawlazet naven Topa keimah thei unna, Jerusalem vang cing un. 51Noh ten, ‘Zakca le mualpho in um zo ung. Ngamdangmi ten Biakinn sung mun thiangthote cu la khawng zo haw, tih theihmi imah nei ma ung,’ ti uh ci. 52Mah hangin nohte cu hilh ing. A hun heng tuk a, Babilon milimte siatsuah khawng tung. Maliamte cu ngam sungah tau in kio haw tuk hi. 53Babilon cu vanah kaito thei in, a kho zetmi ngal kulhtian a bawlthei hei in, mahmi siatsuah tukin, mi hah leleng tung. Keimah, Topa in hilh zo ing,” ti hi.
Babilon Siatsuahnak Tuk
54 Topa in,
“Babilon pen kahnak aw le,
ngamsung siatsuahnak hangin
khawngaih kahnak thawm cu
ngai un.
55Babilon cu siatsuah ing a,
a thawm neihmi cu vatvawk ing.
Ngalkap ten a thum dudummi
tuicawk bangin
zuan tutup haw in, ngingzet au thahin
do haw hi.
56Babilon siatsuah tukin hung hi;
a ngalkapte man haw;
A thalcangte ektuah khawng haw;
mipha ngawl bawlsiatu cu
Pathian keimah ing.
Babilon humah
phuba la tung hi.
57A ngam uktute, a micipte,
a hotute le a ngalkapte
zukhamtik tung.
Hihbu haw tuk a, khangloleh
haw tukma toh hi.
Keimah kumpi in hilh zo ing.
Keimah cu Cungnungbel
Topa ing.
58A nase zetmi Babilon kulhtiante cu,
leihumah cim khawng tuk hi.
A sang zetmi kongkhahte cu,
mei in kang khawng tuk hi.
Miphun hempoh tei nadehte cu
imah tukma hi.
A cimkhamnak hempoh cu,
mei i kanglal tuk bek hi.
Cungnungbel Topa in
hilh zo ing,” ti hi.
Jeremiah Thucahmi Babilon Ah Kuat
59Kumpi Zedekiah bawmtu pa khat cu Seraiah hi. Seraiah cu Neriah capa, Mahseiah i tupa hi. Zedekiah cu Judah kumpi a deh sawng kum linakin Babilon ah a hawh ten Seraiah in zui bok hi. Seraiah lakah thucah ing. 60Babilon humah hihen, Babilon cungcang dadangah hei hihen, laibu sungah ngan ing. Siatsuahnak a heng tukmi hempoh ngan khawng ing. 61Seraiah lakah, “Babilon na hen ten, hih laingat hempoh hi mipi tei lakah sial loli in hi. 62Topa i lakah thungenin, ‘Topa, hih mun hi siatsuah tung a, kumkhua in phillawnah suakin, nunnak a nei hempoh, mihing hihen, ngamsa hihen, um haw tukma, tin hilh zo ci ti hi.’ 63Seraiah, hih laingat hi mipi tei lakah na sial ceng ten nangmah hihimin suang tuah kencih inna, Eufrates ngun sungah vawkin hi.#Mang 18:21; 64Na vawk ten, ‘Hiti bangin Babilon humah kim tuk hi. Itahim titale Topa in, siatsuahnak cu Babilon humah hengtik tuk tin,’ ti in hi.”
Jeremiah thusonmi cu hitihzah hi.
Currently Selected:
JEREMIAH 51: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
