EZEKIEL 3

1Pathian in, “Mihing pa, Ezekiel aw, hi laizial cu na eih ceng ten hawh inna, Israel mi hempoh thu hilhin,” ti hi.#Mang 10:9-10;

2Ka kamka ing a, mah laizial cu eih tukin pia hi. 3“Mihing pa, Ezekiel aw hi laizial ka piakmi cu na vonvahzet tukin ei in,” ti hi. Ka ei le khuaitui bangin hum hi.

4Pathian in, “Mihing pa, Ezekiel aw, Israel tei lakah hawh inna, ka hilhtikmi hempoh cu hilhin hi. 5A haksami awn phundang mang miphun tei lakah hah mang, Israel tei lakah hah ing. 6A awn haw na theih haksa a mangtu miphun ngengpi tei lakah ka hah ahi tale na hilhmi ngai haw tuk hi. 7Mahnaven Israel mi kuamah in ngai ngawlin keima thu tian ngai haw tukma hi. A venghawng haw in, mi lunglian le mi pualthau ngeh haw hi. 8Amuhte bangin mi lungkhoh le mi thinlianin bawlbok tung. 9Suang bangin khimtik tung a, daimon suang bangin cangtik tung. Hi langpang thei miphunte cu lau pahsun,” ti hi.

10Mah i humah Pathian in, “Mihing pa, Ezekiel aw, ka hilhmi hempoh hi phano ngai inna, cing lelengin hi. 11saltannak munah a um na unau tei lakah hawh inna, a ngai vang, ngai haw ngawl vangin Cungnungbel Topa keimah in, a lak hawah ka otmi hi hilhin,” ti hi.

12Pathian hawvangin cawi a, ka nunglam pen aw nging za ing. Mah aw in, “Vancungah Topa i sunloihnak cu thangphat un,” ti hi. 13Nganhing nungten huih lakah a ha khen lih haw thawm le lengke thawm cu hiinhing thawm bangin za ing. 14Topa i cahnak huham cu ka lakah nasezet hengin, hawvangin, a thiak ceng ten thinso le thinuk zetin um ing. 15saltang tei umnak Khebar Ngunpi Tel Abib ah heng ing a, ni salih sung um ing. Ka muhmi le ka theihmi ten ka lungbingtik hi.

Topa In Cingkhawitu Tukin Bawl

(Ezk 33:1-9)

16Ni salih nungten Topa in ka lakah, 17“Mihing pa, Ezekiel aw, Israel miphunte cingkhawitu in bawl tung. Ngallinnak ka piakmi hi, a lak hawah than pepelin hi. 18Mipha ngawl pa khat cu thi tuk hi, tin ka tih nungten a nuncan thekin, a nunnak hup tukin ngallinnak na pia ma ahi tale, misualin thi leleng tuk naven a thisan man cu na lakah sotleh tung. 19Mipha ngawl pa khat lakah ngallinnak hilh navecin a sualnak a cawl cuang ma tale, misualin thi leleng tuk naven na nunnak cu khawih hi tuk ci.

20“Mi phazet pa khatin, thil sual bawlin a lauhuai mun a, ka hentik ten ngallinnak na pia ma tale thi tuk hi. A sualnak hangin thi tuk a, thilpha a bawlmi cu cing tuk mang. A thisan man cu na humah sot tung. 21Mi phazet pa khat ngallinnak pia inna, na thu ngai in, sualnak a bawl ngawl ngangai ahi tale nung tuk a, na nunnak vang khawih hi tuk,” ti hi.

Ezekiel Awn Thei Ma

22 Topa i khut cu ka lakah um hi tih thei ing. Topa in ka lakah, “Tho inna, munlawnah hawhin hi. Mahlai pen na lakah thu hilh tung,” ti hi.

23Mah hangin munlawnah hawh ing a, mahlai ah Topa i sunloihnak cu Khebar Ngunpi el a, ka muh zo bangin ka muh leleu ten lei ah bok ing. 24Pathian i hawvang cu ka sungah tumin dingtik hi. Topa in “Innah hawh inna, inn sungah kongkhah khumin umin hi. 25Khau tuah ken hi tuk ci, mihing pa, mipi mai ah tul thei tukma ci. 26Na lei cu kenmi tuah bangten tuk a, awn thei ngawlin langpang mihingte cu ngallinnak pia thei tukma ci. 27Na lakah thu hilhleh tung a, ot theihnak ka piakleh ten Cungnungbel Topa in ka hilhmi cu a lak hawah hilhin hi. Mi khenkhatin ngai haw tuk naven khenkhat ten imah simsial haw tukma hi, itahim titale langpang miphun haw,” ti hi.

Currently Selected:

EZEKIEL 3: NBF1

Highlight

Copy

Compare