EZEKIEL 16

Jerusalem Muantak Ngawlnak

1 Topa in ka lakah, hi bangin hilhleh hi: 2“Mihing pa, Ezekiel aw,” Jerusalem in thil nawngkai a bawl cu phano hilhin: 3Ihempoh tithei Topa in, a lakah ka hilhmi cu hilh ciangin hi. Maw Jerusalem, Kanaan ngam pen a suakmi hi ci. Na pa cu Amor mi hi a, na nu cu Hit#16:3 Amor mi le Hit mi cu Israel miten milim bia le numei pha ngawl phunin, a ngaihsut haw mi hi. mi hi. 4Na suah laihin kuamah in, na lai tansak haw ma, kuamah in som haw ma; ci tuah hei in, nawt haw ma, puan tuah vangin tuam haw ma. 5Kuamah in, na humah hehpihnak nei in, hi bangin a bawlsaktu um haw ma. Na suah laihin deihtu hei nei ma ci. Hampa lakah vawkthongmi hi ci.

6“Mahten na elah ka hawh ten na thisan lakah na pel lih mu ing. Thi in tuam khawng naven na thih tuk cu phal mang. 7A dam zetmi thingkung bangin khangtik ing. Khangto in, tha nei zetin khanglai hi ci. Na samsau in, na nawibawk a, mahnaven thacangin um ci.

8“Na elah ka hawhleh ten pasal na neih hun toh si, thacangin, na um cu! tin ka angkicual khuh ing a, nangmah imtu hi tukin thutiam ing. Nangmah tuah huaidunnak thutiam bawlin kata in suak ci,” ti hi. Hiti bangin Ihempoh tithei Topa in hilh hi.

9“Mahten tui la ing a, na thi cu nawtciang sakin, na vun cu olif thau noih ing. 10Coihmi puan tuah tuam ing a, saphaw phabel tuah bawlmi kedam pia ing; lu tuamnak puan pa dildelno le pu angkicual vang pia ing. 11Numei na a himi cau le khi nguite vang lei sak ing. 12Naalkhaih, bengbette le sui lukhu mawizet pia ing. 13Sui le ngun, na manphate nei in, puancoih le pu puansilh leleng ci. Maida phabel tuah bawlmi cangho, khuaitui le olif thau ei ci. Mawizet ci a, kumpinu in suak ci. 14Sonbang ngawlin na mawi hangin ngam tihkimah na minthang hi; hiti bang lawlawm deih awhin, a bawltu cu keimah ing.” Hiti bangin Ihempoh tithei Topa in ti hi.

15“Mahnaven na mawinak le na minthannak cu uangthuannakin, na lakah a hungmi hempoh tuah zaukawm pepel uh ci. 16Na biaknak mun mawitiknak tukin na puan khenkhat cu mangin numei pha ngawlte bangin na tawhmi hempoh tei lakah na taksa pia ci. Hiti bangin hi tukmi kha ma hi. 17Ka piakmi sui le ngun na manphate cu panote zolnakah mangin, amah tuah sual uh ci. 18Ka piakmi puan coihte cu milimte khunnakah mangin, nangma ca ka tihmi olif thau le namtuite cu milim tei lakah pia ci. 19Eih tuk an ukbel sangvut, olif thau le khuai hum pia ing; mahnaven milimte lemnak tuk biakpiaknakin, mang khawng ci,” ti hi. Hitih bangin Ihempoh tithei Topa in ti hi.

20“Mahten canu le capa na hinsakmite cu la in, milim lakah biakpiaknakin mang ci. Ka ca in muantak ngawlin na um hi nasezet zo toh ma maw? 21Itakaw ka canote cu laksakin, milim lakah biakpiaknak tuk na piak? 22Numei pha ngawl ningdelhhuai in, na um lih sungin thacangin thisan lakah na pel lih laih ngaisung awng cim? tin,” ti hi.

Jerusalem Cu Numei Pha Ngawl Bangin Nung

23Cungnungbel Topa in, “Lalthong cei, lalthong tatak ci! Thil pha ngawl hempoh na bawl khawng nungten, 24Lam el tihkimah milim biaknak mun bawl pepelin, numei pha ngawl nadek ci. 25Na mawinak cu cinciak lakah kai ci. A hungmi hempoh tei lakah na taksa pia in, a ni a ni-in, numei pha ngawl nadehah nim dedeuh ci. 26A huk zetmi na innnel uh Izipt mite cu na zaunakah zautik khawngin, numei pha ngawl na hihnakin ka thinuktik dedeuh hi.

27“Atu-in, nangmah bawlsia tukin le na covo lei ngam la kikleh tukin ka khut zak zo ing. Nangmah a huatu le na nungcang pha ngawl hangin a mitkemtu Filistin tei khut sungah pia zo ing.

28“Midang ten thincimin, a bawl theih haw ngawl hangin Assiria mite zuan ci. A numei pha ngawlin suak ci; mahnaven amuh vangin na thincimin, bawl thei cuang bok haw ma hi. 29Babilon mite, sumbawl thiam tei lak hei ah numei pha ngawl hi ci, mahnaven na thincim tukin bawl thei sap bok haw ma,” ti hi.

30Ihempoh tithei Topa in hi bangin ti hi. “Mi hawkdak hi sisi! Zahcaknak imah nei ngawl numei pha ngawlte bangin, hih na hempoh hi bawl khawng ci. 31Lampi tihkimah milim biaknak bawlin numei pha ngawl ci. Mahnaven numei pha ngawl dangte bangin sum le pai deihin vak ma ci. 32Mai pasal saw deih ngawlin mikhualte tuah phialdunin, sualnak a bawltu zi bang ci. 33Numei pha ngawlte cu thaman pia haw naven nang cu nangmah a deihtu hempoh laksawng pia ci a, mun le ngam tihkim pen hungin na lakah zaupih tukin nawhthuh pia pepel lalaih ci. 34Nang cu numei pha ngawl phun dang hi ci. Numei pha ngawl hi tukin kuamah in kun haw ma hi. Numei pha ngawl thaman ngah ma ci, nangmah saw in, a man pia lehlam sang ci. Hi zuh hi, miphun dang hihim ci,” ti hi.

Jerusalem Humah Pathian Thukhennak

35Jerusalem, numei pha ngawl nu! Topa i awn hi ngai hemin!

36Ihempoh tithei Topa in, hi bangin ti hi. “Numei pha ngawl dangte bangin tisa deihnak tuah nangmah a deihtu tei lakah na puansilh duk khawng ci a, ningdelhhuai na milimte bia ci, na canote thatin, milim biakpiaknak tukin mang ci. 37Hiti bangin na bawl hangin nangmah a nop pihtu hempoh cu na deihmi hihen, na huatmi hihen, munkhatah khawm tuk ci. Na elkimah nangmah a ngaltu tukte sam khawng tung a, na puansilhte duhsak khawng tung; thacangin, na um cu mu haw hen. 38Pano dang tuah angkawm sualnak a bawltu le mithattu numei cu a bawlsiat haw bangin midang tei thisan man cu na lakah sotleh tung hi. Ka thinuknak le ka thinsonak hangin nangmah dantat tung a, thi tuk ci. 39A khutsung hawah pia tung a, numei pha ngawl na dehnak mun le milim na biaknak munte cu phelet khawng haw tuk hi. Na puansilhte la haw tuk a, na manphate lonsakin, thacang hah haw tuk hi.

40“Suang tuah sep tukin mipite tokpilin, a ngalnam haw tuah nangmah sattan khawng haw tuk hi. 41Na innte mei tuah halkang haw tuk a, na thuaknak cu numei honpi zotik haw tuk hi. Numei pha ngawl dek tuk ngawltohin kham tung a, na mi ngaih lihte laksawng pia tuk ngawltohin, kham bok tung hi. 42Mahnung ten ka thinuknak cu dai in, pha tuk hi. Ka thinukin, cingleh tukma toh ing. 43Na neuno laihin, nangmah ka cinkhawinakte phawkngil khawng ci a, thil sual na bawlmi ten ka thin pulhangtik ci. Na humah a hengmite cu na thil bawlmite hangin ka thuklehnak hi. Ita ningdelhhuai na tampi na bawl i humah hawkdaknakte bet pepel nge cim?” tin ti hi. Ihempoh tithei Topa in hilh zo hi.

A Nu Bangmi Canu

44 Topa in, ‘Jerusalem, na humah mipi ten, A nu bang canu,’ tin thu tehkipnak mang haw tuk hi. 45Nang hi na nu sun tatak ci. Na nu in, a pasal le a canote cu lem viang ma hi. Pasal le cate a huatu na unaute bang ci. Nang le na unau tei nu cu Hit mi hi, na pa uh cu Amor mi hi.

46Na unu upabel cu a canute tuah saklam a um Samaria hi. Na naunu cu a canute tuah hanglamah a um Sodom mi hi. 47Amu thu cungin ningdelhhuai a bawl haw bang bawl bokin a um haw hi na lungkimpih leng poh cim? Kim leng ma ci; ihempoh na bawlmi ah, a ngei ngawlin amuh sangin luai saw tuk ci.

48“A nungmi Pathian ka hihnak min salin, Cungnungbel Topa in hilh ing. Nangmah le na khuano tei bawlmi thilpha ngawlte hi, na naunu Sodom le a khuanote hei in, a bawl awng haw ngawlmi hi. 49Amah le a canute cu eih tuk tui le an tampi nei in, lungmuang le thindapno a um haw hangin pualthau haw naven mi ca-ngah le mi nautate cu imah simsial haw ma. 50Tuangkhawngin, le a lunglian haw a, ka huatmi a bawl haw hangin na theih bangin siatsuah khawng ing.

51“Sualnak na bawlmi a lang hei Samaria in bawl ma hi. A bawl awngmi sangin ningdelhhuai saw bawl ci. Na nawngkai daan hi na unau numei tei nawngkainak tuah tehkip ten amuh cu mi thiangtho tihtak haw hi. 52Mualpho le zahcaknak na thuak lih cu kul hi. Na siatnak hi tam leita zo a, na elkim a um na unau numeite cu mi mawh ngawl bang haw hi. Na suahpih numeite mi thiangtho bangin na suahtik hangin tu cu na mitmai sanin, na zahcaknak hi pua in, ti hi.

Sodom le Samaria Khangto Haw Tuk

53 Topa in, Jerusalem lakah, “Sodom le Samaria tei canute cu khangto lehtik tung. Hi zuh hi, nangmah vang khangtotik bok tung hi. 54Na nuncan theidun cawm inna, zakca tuk ci, na mualphonak hangin na suahpih numeite cu midikin suaktik tuk hi. 55Khangtoleh khawng haw tuk a, nangmah le na khuanote vang nungleh tuk uh ci. 56Na pualthau laih le thil sual na bawlmite phuantul a hih laklawh, 57Sodom cu cekpan bawlnakin mangmek ci mei? Atu-in Sodom bangin suak zo ci: Edom mi, Filistin mi le midang nangmah a huatu na ngam innnel tei cekpan bawlnakin suak zo ci. 58Thil mawi ngawl le ningdelhhuai na bawl hangin thuak tuk ci,” ti hi. Topa in hilh zo hi.

Kumkhua A Khomi Thutepnak

59Cungnungbel Topa in, “Na thaman cu pia tung, na bawl bangin na humah bawlbok tung, itahim titale na thutepnak cu imah simsial ngawlin siatsuah ci. 60Mahnaven na neu laihin thu ka tepmi cu khotik tung. Nangmah tuah kumkhua phat thutepnak bawl tung. 61Iti bang thil bawl hing ngim tih cu cing tuk ci, na suahpih numei, upa le nauta hihen, na kihpih ten na thil bawlmi humah na zakca lehzet tuk ci. Ka thutepmi sungah tel ma naven na suahpih numeite cu na canu bangin bawl tung. 62Na lakah ka thutepmi cu thaklehtik tung a, mahten Topa ka hihlam cu thei tuk ci. 63Na bawl sualmi hempoh ngaidam tuk naveng nangin cing leleng tuk ci a, na zakca in, na kam hei kau ngam tukma ci,” ti hi. Ihempoh tithei Topa in hilh zo hi.

Currently Selected:

EZEKIEL 16: NBF1

Highlight

Copy

Compare