EZEKIEL 12

Ngaltai Profet Ezekiel

1 Topa in ka lakah, 2“Mihing pa, Ezekiel aw, langpang nuam mihing tei lakah um ci. Mit nei haw naven imah mu haw ma; beng nei haw naven imah za haw ma; itahim titale langpang mihingte haw hi.#Isa 6:9-10; Jer 5:21; Mk 8:18;

3“Mah hangin, mihing capa, ngaltaimi bangin na puan zial inna, khuathim laih ngawlin hawhin hi. Tul inna, mundangah na hawhmi cu mi hempoh ten mu khawng haw hen. Hi ngalthote ten mu in, ngalthomi a hih haw lam a theih hawnak hei hi kha thei. 4Khuavak laihah na puan zial inna, mu haw tuk hi, taklam ten saltang bangin na hawh khi zo haw hen. 5A zoh haw laihin, na inn pangah awng pa khat vit inna, mah awng pen na thil tom cu suahin hi. 6Na ko ah na thil tom cu pua in, na mit hup inna, ilai lam hawh ing tih thei ngawlin khuathim lakah hawh bangin na hawh cu zo haw hen. Mahti bangin na bawlmi cu Israel tei ca in, ngallin piaknak hi tuk,” ti hi.

7 Topa i hilh bangkekin, bawl khawng ing. Mah ni-in ngaltai bangin ka puan cu tom ing a, taklam khuathim tuk ten ka inn pang cu ka khut tuah phialet ing a, mah awng pen tul ing. Mipi tei muh cilcelin, ka puantom cu ka ko ah pua thahin hawh ing.

8A zingten Topa in 9“Mihing pa, Ezekiel aw, na bawlmi thu cu Israel ngalthomi ten a dong haw tale, 10Cungnungbel Topa in, a lak hawah ka otmi hi hilhin; hi thu cu Jerusalem a, mi uktu lal le mahlai a um mipi tei theih tukin hi. 11Hiti bangin na bawlmi hi a hum hawah a heng tukmi lak hamnak hi tih hilh inna, ngaltaimi le ngalmatmi hi haw tuk hi. 12Amuh uktu lal pa khat cu pang awng a bawlsak haw mi pen tai tuk a, puantom pua thahin, khuathim lakah hawh tuk hi. A mit hupdun tuk a, ilai lamah hawh ing tih hei mu tukma hi. 13Mahnaven ka suukvawk nangin awk tung. Babilon khuapi ah pui tung a, mah khuapi mu ngahta ngawlin thi tuk hi.#2Kum 25:7; Jer 52:11; 14A innkuate, amah ngaihsutnak piatute le a cingtute cu khua tihkimah khen khek khawng tung a, thah tukin miten zei li haw tuk hi.

15“Ngam dadang le miphun dadang tei lakah ka khenkhek khawng ten Topa ka hihlam thei haw tuk hi. 16Amuh tei lak pen mi demno cu ngaldonak, paam le natnak a phunkim lak pen luattik tung, ngamdangmi tei lak pen a bawl haw mi iti zahin ningdelhhuai him tih a theih nung haw ten, keimah cu Topa ka hihlam thei haw tuk,” ti hi.

A Can Limi Profet

17 Topa in ka lakah, 18“Maw mihing capa, can dedel li thahin, ei inna, thinsu thahin inna, cantawtokin hi. 19A khuapi haw Jerusalem ah a um laihmi tei lakah Cungnungbel Topa i thu cu hi bangin hi tin ngam buppi ah thanin hi. An ei thahin can li haw tuk, tui in thahin thinsu in can tawtok haw tuk hi. Ngam sungmi hempoh cu daan siatsuahtu a hih khawng haw hangin a ngam haw siatlal khawng tuk hi. 20Mihing tamzet a umnak khuapi haw cu siatsuah khawngin, a ngampi haw cu ngamkhingah suak tuk hi. Keimah cu Topa ka hihlam thei haw tuk,” ti hi.

Thupaucapnak le Thucah

21 Topa in ka lakah, 22“Mihing pa, Ezekiel aw, itakaw Israel miten, ‘Hun can let pepel naven profet i hilhsami cu kim awng ma, tihmi thu tehkipnak hi a son lelem haw?’ 23Keimah Cungnungbel Topa in ka hilhmi cu amuh tei lakah hilhin hi. Mah thu tehkipnak cu botik tung. Israel ngam sungah sonleh haw tukma toh. Hun kim zo, profet tei a hilhsa haw mi cu kim pepel zo tin hilhin hi.”

24“Israel tei lak pen a man ngawlin muhnak le mi lamhuai sualtu hilhhamnak umleh tukma toh. 25Keimah Cungnungbel Topa in, a lak hawah thuhilh tung a, ka hilhmi cu cangkimno in bawl hi tuk hi. Ngei tukma toh hi. Ngalthote, na nunsung uhah bawl tung hi tin ngallinnak ka piakmi cu bawl ngangai tung hi. Keima in hilh zo ing hi,” tin, Cungnungbel Topa in ti hi.

26 Topa in ka lakah, 27“Mihing pa, Ezekiel aw, Israel miten muhnak na neihmi le na hilh ham mite cu mailam ngeipi ca in ngaisung haw hi. 28Cungnungbel Topa keima hilhmi hi hilh sawlawnin hi. Ngei tukma toh. Ka hilhmi cu bawlsuak hi tuk hi. Cungnungbel Topa keimah in hilh zo ing,” ti hi.

Currently Selected:

EZEKIEL 12: NBF1

Highlight

Copy

Compare