EZEKIEL 11

Jerusalem Cu Lawlmi Khuapi Hi

1Pathian hawvangin, keimah cawi in, Biakinn nisuahnak lam kongkhahah koih hi. Mahlai ah mihing sawm nih le pa nga mu ing, a ngam haw hotu upa pa nih Azzur capa Jaazaniah le Benaiah i capa Pelatiah tel haw hi.

2Pathian in, “Mihing pa, Ezekiel aw, hi mihing ten thupha ngawl vaisiamin, hi khuapi sungah ngaihsutnak pha ngawl hengtik haw hi. 3Amuh ten, ‘Innte sak pal thei hih tukma ung. Hi khuapi cu an huannak beel bang hi, kohte cu beel sung a, cik bang ung ti haw hi.’ 4Mah hangin mihing capa, tu pepan a phat haw ngawlnak thu hilhin,” ti hi.

5 Topa hawvangin, keimah zialin, Topa i thu cu hi bang hilhtik hi. “Maw Israel mite, na ot uhmi le na vaihawm uhmi hempoh thei khawng ing. 6Hi khuapi sungah mi tampi thatin, khuasung lampi cu miluang dimtik zo uh ci.

7“Mah hangin, Cungnungbel Topa keimah in, na lak uhah hilh ing. Na tih uh bangin hi khuapi cu an huannak beel cu hi naven beel sung a, cik cu i kaw? Na thah uhmi miluang hi ma maw? Mah hangin hilai ah um tukma uh ci, khuapi sung pen vawk tul tung. 8Na laubel uhmi cu ngalnam hi maw? Nangmuh do tukin ngalnam tuah ngalte pui tung. 9Khuapi sung pen hawlvawk tung a, ngamdangmi tei khut sungah hengtik tung hi. Thi tukin na thu uh soncat zo toh ing, 10na ngamsung uh a, ngaldonak pen thi tuk uh ci. Mi hempoh ten Topa ka hihlam cu thei haw tuk hi. 11Beel in, beel sung a, cik a hup bangin hi khuapi in noh cu hup tukma hi. Israel ngamsung ilai mun hei ah na um uh hei in, bawlsia leleng tung. 12Keimah cu Topa ka hihlam thei tuk uh ci; na elkim miphun tei daan zui nave uhcin ka daan saw cu siatsuahin, ka thupiakmite cu el uh ci,” ti hi.

13Profet awn tuah thu ka phuan lih laihtakin, Pelatiah cu lumin thi hi. Lei ah bokkhupin ngingzet au hi; “Maw Cungnungbel Topa! Israel ngam sungah a tangmi hempoh thah khawng tum cim?” tin au ing.

Saltang Tei Lakah Pathian Thutiamnak

14 Topa in ka lakah, 15“Mihing pa, Ezekiel aw, Jerusalem khua sung a, ummi ten saltannak a ummi nangmah le na unau tei thu cu son leilui haw hi. Saltangte cu Pathian bia thei tukin khawla leita haw hi. Hi ngam cu keimu ta hi tukin Pathian in pia zo ti haw hi.”

16“Na sal tanpihte cu ka otmi hi hilhin hi. Ngam khawlapi miphun tei lakah um tukin a kuattu le ngam dadangah thehkehtu cu keimah leng ing. Mahnaven hun comno sung cu a hawhnak ngam amu lakah um tung.

17“Mah hangin keimah Cungnungbel Topa i ka otmi hi hilhin hi. Ka thehkehnak ngam pen khawmleh tung a, Israel ngam cu a khutsung hawah pialeh tung. 18A kihleh haw ten thil ningdelhhuai le a nawngkaimi milimte vawk khawng haw tuk hi. 19Amu humah lungmu thak le ngaihsutnak thak pia tung. Suang bangin a cangmi a lungmu haw cu lawl tung a, taksa bangin a nemmi lungmu pia tung hi.#Ezk 36:26-28; 20ka daante cu zui haw tuk a, ka thupiakmite cu komzetno in bawl haw tuk hi. A muhte cu ka mihing hi haw tuk a, keimah cu a Pathian haw hi tung. 21Mahnaven ningdelhhuai le a nawngkaimi milim a bia nuamte cu dantat tung hi. A milim bawl haw mi hangin dantat tung,” ti hi. Cungnungbel Topa in hilh zo hi.

Pathian Sunloihnakin Jerusalem Zamsan

22Ngamsa nung cherubim cu leng haw a, lengkete vang tel bok haw hi. Israel Pathian umpihnak a de zawzokmi cu a hum hawah um hi. 23Mah nungten a de zawzokmi cu Jerusalem khuapi pen tulin ni suahnak lam mualhumah thawn hi.#Ezk 43:2-5; 24Mah ka muhnakah Pathian hawvangin cawi a, Babilon ngam saltang tei lakah koihleh hi. Muhnak cu pai in, 25Topa i lakmi hempoh cu saltang tei lakah hilh khawng ing.

Currently Selected:

EZEKIEL 11: NBF1

Highlight

Copy

Compare