SUAHTULNAK 9

Ngante Thi

1 Topa in Moses nelah, “Kumpi lakah hawh inna, hi tin hilhin, Topa, Hebru mitei Pathian in, ka mihing ten keimah a biak theihnak haw tukin hahin, ti hi. 2Na hah nuam ma tale, 3nase zetin cawh tung a, na ngan, na cipuh le na laak, na kalauk le na khuihon, na tuuhon le na keel tei humah natnak pha ngawl heng tuk hi. 4Israel tei ngan le Izipt mitei ngan cu deidan tung a, Israel tei ngan cu pa khat hei thi tukma hi. 5Keimah, Topa in hun ciangtan zo ing, zingten hengtik tuk,” tin ti hi.

6A zingten Topa i hilh hamsa bangin Izipt mitei ngan hempoh cu pul khawng haw naven Israel tei ngan cu pa khat hei thi ma hi. 7Kumpi in mah thu cu dongkanin Israel tei ngan cu pa khat hei thi ma hi tih cu thei hi. Mahnaven Kumpi i lungmu cu khoh lelengin Israel mi hawhtik ma hi.

Uilut Meima

8Mah nungten Topa in Moses le Aaron lakah, “Thukaam sung a, vut cu pham nih thumin la unna, Moses in kumpi i maiah mah vut cu vanah theh hen. 9Izipt ngamsung hempoh ah leivul bangin khenkhek khawng tuk a, mun hempoh ah uilut meima suaktik tuk hi. Mihing le ngamsa cu meima nei cuculh haw tuk,” ti hi. 10Vut cu thukaamta la in, kumpi maiah ding haw hi. Moses in vut cu vanah a theh ten, mihing le ngamsa humah uilut suakin meima vei haw hi.#Mang 16:2; 11Izipt ngam a, mitzial thiamte cu Moses maiah hung thei haw ma hi; itahim titale a dang Izipt mite bang lengin, amuh vang uilut vei khawng haw hi. 12Mahnaven Topa in kumpi i lungmu cu khohtik leng hi. Moses lakah Topa i hilh hamnak bangin Israel mite cu hawhtik nuam ma hi.

Nial

13 Topa in Moses lakah, “Zingtungno in hawh inna Kumpi na tawkin hi. A lakah, ‘Hebru mitei Pathian, Topa in, na lakah, Ka mihing ten keimah a biak theihnak haw tukin hahin hi. 14Tu tum cu nangma bulpak humah le na khutnuai bawi le na mihing tei humah hei hihen, leihumah keimah bang kuamah umma hi tih na theihnak tuk uhin nase zetin bawlsia tung hi. 15Nangmah le na mihing tei humah ka khutzaakin natnak ka hengtik tale nang cu siatsuah dikdek hi zo tuk toh ci. 16Mahnaven leihum hempoh ah ka minthannak a tangzal theihnak tukin ka ngilnak lakin, na nunnak khawih hih ing.#Rom 9:17; 17Ka mihingte hah nuam ngawlin na lunglianzet leng ci. 18Zingten tih hunin, Izipt ngam tangthuah zak awng ngawl nial nase zetin zutik tung. 19Atu-in ngan le thildang hempoh hihen a pua leu lam a, ummi hempoh khum khawng tukin thupia in hi. Nial nase zetin zutuk toh a, a pualam a, um mihing le ngante, innsung a, khum ngawlmi hempoh cu thi khawng haw tuk hi,’ tin hilhin,” ti hi. 20Topa i otmi cu a theih haw ten kumpi i khutnuai bawi upa khenkhat cu thinsuzet haw in, a sal le a ngan haw cu innah khum khawng haw hi. 21A khenkhat ten Topa i awn cu simsial ngawlin a sal le a ngan haw cu pualeu lamah zam khawng haw hi.

22 Topa in Moses lakah, “Na khut vanah zak inna, Izipt ngamsung hempoh a, mihing hihen, ngan hihen, lo sung ankung hum tianin ngialzu tuk,” ti hi. 23Mah hangin Moses in, a thiangkhut cu vanah zakto a, Topa in khuaphelep le vanthumtikin, nialcak tawtoktik hi. Topa in nial cu Izipt ngamah zutik hi. 24A nase zetmi nial a hih hangin khuaphelep cu mun tihkimah de zawzok hi. Izipt ngam tangthuah a nasebelmi huihsia hi.#Mang 8:7; 16:21; 25Izipt ngamsung hempoh cu pualeu lam a, ummi mihing hihen, ngan hihen ngialin siatsuah khawng hi. Lo sung ankung hempoh tu khawngin, ngam lak a, thingkung hempoh ek khawng hi. 26Goshen ngam Israel tei umnak bek himin, nial umma hi.

27Kumpi in Moses le Aaron samin, “Tu tum cu Keimah sual ing; Topa cu thuman hi. Keimah le ka mihingte mawh ung hi. 28Topa i lakah thungen unna, hi vanthum le nial cu thuak zo ma toh ung. Tul loli tuk uh ci, tin thutiam ing. Ngei na um tuk uh kul lehma toh,” ti hi.

29Moses in kumpi lakah, “Hi khuapi sung pen ka tul bek ten Topa i lakah ka baanzakin thungen tung. Vanthum cawl tuk a, nial um tukma toh hi. Leipi cu Topa tahi tih thei tuk uh ci. 30Mahnaven nangmah le na khutnuai bawi ten Topa Pathian cu kihca ma laih uh ci tih thei ing.” ti hi.

31Thangkhau kung le barli sangvutte siat khawng hi. Itahim titale thangkhau kung cu lak hun laihtak hi a, barli sangvut vang a ngah laihtak hi. 32Mahnaven sangvut le cangtol cu sia ma hi. Itahim titale lak hun ma laih hi.

33Moses in kumpi cu zamin, khuapi pualam pen Topa i lakah a baanphalhin thungen hi. Mah bek ten vanthum le ngialzu cu cawl hi. Nguah vang kam hi. 34Kumpipa in nguahkam in, ngialzu lehma toh, vanthum vang cawl hi tih amuh ten sual leleu in, a khutnuai bawi tei lakah tang leleu hi. 35Topa in Moses lakah a hilh hamsa bangin kumpi i lungmu cu khoh sesemin Israel mite cu hah nuam ma hi.

Currently Selected:

SUAHTULNAK 9: NBF1

Highlight

Copy

Compare