SUAHTULNAK 10

Khaau

1 Topa in Moses lakah, “Kumpi lakah hawh inna tawkin hi. Hiti bang nalamdang ka bawl theihnak tukin amah le a khutnuai bawi tei lungmu cu khohtik zo ing. 2Amu lakah hiti bang nalamdang bawlin, Izipt mite cekpan bawlnakin ka man hi, na tu le ca tei lakah na hilh tukmi hi. Topa ka hihlam na venghawng uhin theileh tuk uh ci,” ti hi.

3Mah hangin Moses le Aaron cu Kumpi lakah hawh haw in, a lakah, “Hebru mitei Pathian, Topa i a hilhmi cu; ‘ka maiah niamkhiat nuam ngawlin ituk tian kaw na um tuk? Keimah a biak theihnak haw tukin ka mihingte cu hawh haw hen. 4Ka mihingte hah tuk na el leleng ahi tale zingten na ngam sungah khaau hah tung hi. 5Kuamah in Lei neuno hei mu thei ngawl tianin dim haw tuk hi. Nial i siatsuah ngawlmi hempoh ei haw tuk a, na ngamsung a, thingkung hempoh ei khawng haw tuk hi. 6Na kumpi inn, na khutnuai bawi tei inn le na mihing hempoh tei inn vang dim khawng haw tuk hi. Na pu le pa, na cikhaihtu tei hi ngamah a hen sem haw laih pepanin, amuh awng haw ngawlmi thilpha ngawl hi tuk hi,’ tin,” ti hi. Moses cu hek kiklehin kumpi lak pen tul hi.

7Kumpipa i khutnuai bawi ten, “Ituk tian kaw hi pa in ohte cimnak a piak tuk? Topa a Pathian, a biak theihnak tukin panote cu hawh haw poh hen. Itahim titale Izipt ngam sia zo tih hi mu ma cim?” tin kumpi cu ti haw hi.

8Mah hangin Moses le Aaron cu samkik haw a, kumpi in, a lak hawah, “Hawhta unna, Topa na Pathian uh bia pah ni uh ci! Mahnaven akua zong hawh tuk nge uh cim?” ti hi.

9Moses in, “Ka venghawng uhin hawh tuk ung, ka casuante, ka pitek le putek tel haw tuk hi. Ka capa le canu, tuu, keel le khui tuah hawh tuk ung, itahim titale Topa biakpiaknak puai bawl tuk ung,” ti hi.

10Kumpipa in, “Topa in bawm henna, na canau le na numei cu hawhtik pahsuh un. Ka hum uhah haksatnak suaktik tukin suam li uh ci tih cu ciang hi. 11Hawh viang haw tukma! Pano bebek hawh unna, Topa cu bia un hi. Na nget uhmi cu mahmi si,” ti hi. Mahnung ten Moses le Aaron cu kumpi lak pen hawlvawk haw hi.

12 Topa in Moses lakah, “Izipt ngam sungah khaau a hennak tukin na baanphalhin hi. Thingkung, hamkung a nungmi hempoh le nial i siatsuah ngawlmi hempoh cu ei khawng haw tuk hi,” ti hi. 13Mah hangin Moses cu a thiangkhut tungto hi, Topa in nisuahnak lam pen huih theutikin sun nilui le zan khua theu hi. Zinglamah huihin khaau cu theu cih hi. 14Izipt ngam khua tihkimah hengin, a ngam buppiah dim hi. Hitih bang a tam zetmi khaau mu awng haw ma hi. Mailam heiah muleh haw tukma toh hi.#Mang 9:2-3; 15Lei lang ngawlvo in, a khuh khawng hangin lei cu hang menmun hi. Nial i siatsuah ngawlmi thingkung, hamkung le thingngah hempoh ei khawng haw hi. Izipt ngamsung hempoh ah thingkung le hamkung humah cehhing pa khat hei tang lehma toh hi.

16Mahten kumpi in Moses le Aaron manlangzet samin “Topa na Pathian uh mai le nangmu maiah sual zo ing. 17Atu vei khat cu ka sualnak ngaidam unna, ka tawh uhmi bawlsiatnak hi ka lak pen la kikleh tukin Topa na Pathian uh i lakah kut sak zal un” tin ti hi. 18Moses cu kumpi lak pen tulin Topa i lakah thungen hi. 19Mahceng ten Topa in nisuahnak lam huih cu nitumnak lam huih ngilzet tuah thek a, khaau cu Izipt ngam buppiah pa khat hei tang ngawltohin, Tuipi San sungah mutvawk khawng hi. 20Mahnaven Topa in kumpi i lungmu cu khohtik lengin, Israel mite cu hawhtik nuamcuang ma hi.

Thimzing Tung

21 Topa in Moses lakah, “A sahzet mi thimzingin Izipt ngamsung khuh khawng tuk a, na baan cu vanah zaakin hi,” ti hi. 22Moses in, a baan cu vanah zakin, Izipt ngam cu thimzing sah zetin ni thum sung khuh khawng hi.#Saam 105:28; Mang 16:10; 23Izipt cu pa khat le pa khat mudun thei ngawlin ni thum sung kuamah pualeu lamah tul thei haw ma hi. Mahnaven Israel tei umnak ngamah khuavak leleng hi.

24Kumpipa in Moses cu samin, “Topa bia tukin hawh unna, numei le na naupangte vang na lak uhah hawh haw hen hi. Mahnaven na tuu, keel le na khui cu zam un hi,” ti hi.

25Moses in, “Topa ka Pathian uh lakah, halkang biakpiaknak le biakpiaknak dang man tuk ngan cu nangmah in, na ngaihsutsak kul tuk hi. 26Mahma tale, a hawh haw khawng kul hi; pa khatno hei zam tukma ung hi. Topa ka Pathian biaknak a, ka man tuk uhmi ngan cu teng tuk ung a, mah mun ka hen laih ngawl uhin keimuh hei in, Topa ka biaknak tukin, i mang tuk ung kaw tih thei bokma laih ung hi,” ti hi.

27 Topa in kumpi lungmu a khohtik laih hangin Israel mite hawhtik nuam ma hi. 28Moses lakah, “Ka lak pen tai un! Ka muh tuk hei in kik toh pahsuh un. Ka muhleh ni cu na thih ni hi tuk hi,” ti hi.

29Moses in, “Na tih bangin hihen, ituk hei ten ka mai muleh tukma toh ci,” ti hi.

Currently Selected:

SUAHTULNAK 10: NBF1

Highlight

Copy

Compare