SUAHTULNAK 39

Thiampi Puan Bawl Haw

(Suah 28:1-14)

1Thiampi ten mun thiangtho sungah nadeh ten a silh haw tuk tuumul tuah mepian, sandup le a sanmi puan sunglawi bawl haw hi. Moses lak a Topa i thupiak bangin Aaron ca tukin puan thiangtho bawl haw hi.

2Awmkhaih angki thiangtho cu sui, mepian, sandup le sanmi tuumul le phanmi puan manpha tuah bawl haw hi. 3Sui cu a pekin, a phel nungten mepian, sandup le a sanmi nim lakah mawi zetin cancih theih tukin pa dildelno in atleh hi. 4Awmkhaih angki kilhnak tukin kobah khau bawlin, a pangah khih veve haw hi. 5Mawi zetin tahmi taikhap cu mah kobah khau pa nih tuah pehdun haw hi. Moses lakah Topa i thupiak bangin hi taikhap vang cu sui, mepian, sandup le a sanmi tuumul le phanmi puan manpha hi. 6A sanmi suang manpha cu tat haw in, a kimsuakin sui tuah khup haw hi. Suang humah mihing min a khet mek haw bangin Jakob capa sawm le pa nih tei min cu mah suang manpha humah kuatin ngan haw hi. 7Moses lak a, Topa i thupiaknak bangin Israel miphun sawm le pa nih theihlehnak suang manpha suak tukin kobah khau tei humah mah suang manphate cu belh haw hi.

Thiampi Sang Awmbelh

(Suah 28:15-30)

8Awmkhaih angki bangin mawi zetin canmi awmbelh cu bawl haw hi. Sui, mepian, sandup le a sanmi tuumul le phanmi puan manpha in bawl haw hi. 9A tung le a vang cu canve haw a, heh nihin hep haw hi; khutpi bok kuah a saumi le a zal mi hi. 10Mah awmbelh humah suang manpha thuang li belh haw hi, thuang khatnakah a san, mepian le sandupmi suang manpha belh haw hi. 11Thuang nihnakah tangphaw, a le daimon suangval belh haw hi. 12Thuang thumnakah sandup a sanmi le suang manpha belh haw hi. 13Thuang linakah tangphaw, sandup le a ngomi suang manpha belh haw hi. Hi suang manpha cu a kimsuakin sui tuah velh haw hi. 14Suang manpha sawm le pa nih belhin, a humah Jakob capa sawm le pa nih tei min kuatin ngan haw hi. Min khetmi bangin khenin suang manpha pa khat humah miphun pa khat min ten cu khen haw hi. 15Awmbelh tukin khauhual bangin a hualdun mi sui ngekin suikhi bawl haw hi. 16Sui mawk khupnak pa nih le suikual pa nih bawlin suikual pa nih cu awmbelh humlam kil veveah belh haw hi. 17Mah suikual pa nihah sui khau pa nih khih haw in, 18sui khau mawk langlam pa nih cu sui mawkkhup pa nihah khih haw hi. Awmkhaih angki mailam kobah humah sui mawk khupnak pa nih cu khaih haw hi. 19Adang suikual pa nih bawlin, awmbelh nuailam kil veveah a sunglam mawk awmkhaih angki sangtuah khih haw hi. 20Suikual pa nih bawl leleu haw in, tahmi taikhap humah khih haw hi. 21Awmbelh hum a, suikual pa nih cu awmkhaih angki i suikual tuah mepian khauhualin ken kawmin, mahti bangin a ken haw hangin awmbelh cu taikhap humah vawk lualuah ngawlin, Moses lak a, Topa i thupiakmi bang cikcekin awmbelh cu kop bikbekno in um hi.

Thiampi Puan A Dang Bawl Haw

(Suah 28:31-43)

22Awmkhaih angki nuai a, silhmi angki cualpi cu a mepianmi, tuumul ngekin tak haw hi. 23Angki cualpiah lu holhnak awng pa khat bawl haw hi. Mah a awng kimsuak cu a silh haw ten bal tuk ngawlin a mawk khui haw hi. 24Mah angki nuailam mawk cu mepian, sandup le a sanmi tuumul le puan mantam tuah tale ngah cuangin coih haw hi. 25Sui ngek tuah khingte bawl haw in, tale ngah laklawh nuailam mawk kimsuakah mah khingte cu khaih haw hi. 26Moses lak a, Topa i thupiakmi bangin thiampi na cu dek haw in, a silh haw mi angki cualpi nuai mawk kimsuakah tale ngah zuk canmi khingte khaihmi um hi.

27Aaron le a capa tei ca in puan manpha tuah tahmi angkite bawl haw hi; 28mahten lupawng le lukhuh vang puan manpha tuah bawl haw hi, bawngbi com cu phanmi puan manpha tuah bawl haw hi. 29Tai kennak cu Moses lak a, Topa i thupiakmi bangin phanmi puan manpha le mepian, sandup le a sanmi tuumul tuah bawlin mawi zetin coih haw hi. 30Sui ngek tuah calbelh thiangtho bawl haw a, laikhetnak hum a, laingat bangin a humah, “Topa i lakah a piakmi,” tin khen haw hi. 31Moses lak a, Topa i thupiakmi bangin mah calbelh pek cu a lupawng haw humah mepian khau tuah kencih haw hi.

Nadeh Ceng Haw

(Suah 35:10-19)

32 Topa i umnak inn Puanbuk cu ceng haw hi. Moses lak a Topa i thupiakmi bangin Israel miten bawl khawng haw hi. 33Topa i umnak inn Puanbuk le a na, puan khaihnak, pang le pangzawl, a khuam le tawdam; 34a humkhuh tukin tuucang phaw a san a buhmi, a khuh sintu in saphaw pha le a mawk khupnak tukin puan manphate; 35suangpeek pa nih a koihnak haw Thutiam Kuang le a sin le a zawnnak ngolh; 36cabuai le cabuai na le Pathian ca in luihmi cangho; 37sui ngek tuah bawlmi mei vaknak khuam, a mei vaknak, mei vakmi a tuan a, koih tukmi, na dadang le mei vaknak situi, 38sui tuah bawlmi biaklandawh, sathau thih tuk situi, zimui namtui, buk sung tumnak kongkhah puanzak, 39daal tuah bawlmi biaklandawh, khocang bang a, bawlmi daal pheng, a zawnnak ngolh le a na hempoh, khutsomnak kuang le a tawdam; 40upnak tuk puanzak, upnak khuam le a tawdam, tumnak puanzak, a khau le puanbuk ca in, na bahnak, Pathian Umnak Puanbuk sung a, nadeh ten a kulmi na hempoh, 41mun thiangtho sungah nadeh ten thiampi tei silhmi puan sunglawi, thiampi na a deh haw ten Aaron le a capa tei silh tukmi puan thiangtho cu Moses lakah hunpih haw hi. 42Moses lak a Topa i thupiak bangin Israel miten nadeh cu ceng haw hi. 43A bawl haw hempoh cu Moses in komno zohpih a, Topa i thupiak bangin pha zetin bawl haw hi, tih cu mu hi. Mah hangin Moses in mah nate muicu pia hi.

Currently Selected:

SUAHTULNAK 39: NBF1

Highlight

Copy

Compare