SUAHTULNAK 28

Thiampi Tei Puan

(Suah 39:1-7)

1“Keima thiampi dek tukin Israel mipi lak pen a dangno in, na u Aaron le a capa Nadab, Abihu, Eleazar le Ithamar na lakah samin hi. 2Na u Aaron cu minthannak le mitei zohsannak a co theihnak tukin thiampi puan thiangtho bawlsakin hi. 3Ka thiampi na thiangtho a deh theihnak tukin le Aaron i thiampi puan bawlhamtik tukin, thiamnak ka piak, khutzung thiam samin hi. 4A bawl haw tukmi puan cu awmbelh #28:4 Awmbelh tihmi hi letmah kuah zalin, letmah kuah sau hi; thiampi ten a awm hawah, Ephod tihmi humah a belh haw mi hi. pa khat, awmkhaih #28:4 Awmkhaih tihmi hi Thiampi Sang awm a khaihmi hi. pa khat, angki cual pa khat, mawi zetin coihmi angki pualam silh pa khat, lupawng pa khat le taikhap pa khat hi tuk hi. Na u Aaron le a capa ten ka thiampi a dehnak haw tukin khutzung thiam ten mah puan thiangtho bawl haw tuk tih hilhin hi. 5Mahti bangin a bawl haw ten sui hihen, mepian le sandupmi, a sanmi tuumul le puan mantam hihen mang haw tuk hi.

6“Awmkhaih angki cu, sui le mepian, a san le sandup, tuumul le phanmi puan mantam le mawi zetin coih mi puan tuah bawl haw tuk hi. 7A ko ah kennak tukin khau pa nih um tuk a, a siklam veveah kencih hi tuk hi. 8Mawi zetin takmi taikhap cu a kennak khau pa nih tuah pehdun haw tuk a, a bawl daan haw vang bangten khawng tuk hi. Taikhap cu sui le mepian, sandup le a san mi tuumul le phanmi puan manpha leleng tuah bawlmi hi tuk hi. 9Suang manpha a sanmi pa nih la inna, a humah Jakob i capa sawm le pa nih min a kuatin, na ngan un hi. 10A kum haw zui in, a sasangin suang manpha san pa khatah mi pa luk i min, a dang humah a dang min luk na ngan un hi. 11Suang manpha lam a, khutzung thiam mi le minkhetnak a bawl thiamtu tei bopnak tuah Jakob i capa sawm le pa nih tei min cu suang manpha pa nih humah kuatin ngan unna, suang manpha cu sui tuah a mawkkhup un hi. 12Israel miphun sawm le pa nih theih lelengnak tukin sungsilh angki kobah khau tei humah suang manpha cu belh un hi. A nim haw cu Aaron in, a ko humah pua tuk a, Topa in, amuh cu ciing leleng tuk hi. 13Sui mawkkhup pa nih le, 14khau bangin melhmi sui khauhual pa nih bawl unna, sui khauhual cu sui mawkkhupah vial un hi.

Thiampi Sang Awmbelh

(Suah 39:8-21)

15“Pathian i deihnak theih zawhnak tukin awmbelh bawl un hi. Thiampi puan bawl bang lengin phano in bawl un hi. Sui le mepian sandup le a san mi tuumul le a phanmi puan manpha tuah bawl un hi. 16Bok kuah zal le bok kuah sau, a tung le a vang a canvemi hi tuk a, heh nihin hehmi hi tuk hi. 17A humah Suang manpha thuang li in belh un hi; thuang khatnakah a san, mepian le sandup belh un hi. 18Thuang nihnakah tangphaw, a pawlmi le daimon suangval manpha, 19thuang thumnakah sandup, a san le a aile suang manpha; 20thuang linakah tangphaw, sandup le a ngo mi suang manpha belh un hi. Hi suang manpha cu sui tuah a kimsuakin tuam un hi. 21Suang manpha sawm le pa nih koih unna, Jakob capa tei min a humah khen un hi. Mah a min haw cu ciangno in khen unna, pa khat humah Israel miphun min pa khat ten ngan un hi. 22Awmbelh tukin khauhual bangin hualmi sui ngek tuahin sui lawngawh bawl un hi. 23Awmbelh humlam kil veveah belh tukin suikual pa nih bawl unna, 24mah sui khauhual pa nih cu suikual pa nih humah khih un hi. 25Mah sui khauhual i langlam mawk pa nih cu suang manpha belhmi humah khih un hi. Mah bangin sungsilh angki i mailam kobah humah na khih un hi. 26suikual pa nih bawl unna, awmbelh i nuailam a kil, awmkhaih sangtu a sunglam mawkah khih veve un hi. 27Suikual dang pa nih bawl hih unna, awmkhaih angki i mailam kobah nuailamah na khih un, pha zetin takmi, taikhap i humah na khih un hi. 28Awmbelh kual cu awmkhaih kual tuah mepian khauhual tuah ken khawm unna, mahten awmbelh cu taikhap humah vawk lualuah tuk ngawlin kopdun tuk hi.

29“Aaron cu Mun Thiangtho a tum ten Israel miphun tei min cu a awm humah a ummi thu soncatnak awmbelh humah a kopdun tuk hangin Topa keimah in, amuh cu cing leleng tung hi. Mah awmbelh cu Aaron i a lung zawnkekah um tuk hi. 30Urim le Thummim #28:30 Urim le Thummim tih cu suang tuah bawlmi thil pa nih hi in, Thiampi Sangin a awmbelh hum a, angki dip sungah koih a, Pathian deihnak zeinakin, a maanmi hi tihmi suang thiangtho cu thusonnak awmbelh sungah koih unna, Aaron cu Topa i maiah a tum ten a awmah um haw tuk hi. Mahtibang hun ten a awmbelh cu silh leleng tuk a mahten Israel miphun ca in ka deih sakmi cu theithei tuk hi.#Mipum 27:21; Daan 33:8; Ezr 2:63; Neh 7:65;

Thiampi Van Dangte

(Suah 39:22-31)

31“Sungsilh angki pualeu a silhmi angki cualpi cu tuumul mepian tuah ngeh bawl un hi. 32Angki cualpi i laizangah lu holhnak tukin a awng bawl un hi. Mah a awng i kimsuak cu savun angki na bawl uh bangin bal tuk ngawlin a mawk hep un hi. 33Mah angki i nuailam mawk cu tuumul mepian, sandup le a san, tale ngah cuangin coih un hi. Angki kimsuakin mahti bangin coih unna, na coih uhmi i laklawhah sui khingte khaih un hi. 34Mahti bangin angki cualpi i nuailam mawk kimsuakin, tale ngah zuk coihmi le sui khingte khaihmi um khawng haw tuk hi. 35Aaron cu thiampi na a deh sial ten mah angki cu silh leleng tuk a, a thih khak ngawlnak tukin, Topa i mai, Mun Thiangtho sungah a tum le a tul sial ten khing nging seselno cu zak hi tuk hi.

36“Sui ngekin bawlmi calbelh bawl unna, a humah, “Topa i ca in, a thiangmi,” tin kuatin ngan un hi. 37Mah calbelh cu lupawng mailamah mepian khau tuah khaih un hi. 38Aaron in, a calah belh tuk a, mahti bangin Israel miten Topa i lak a, a piakmi haw humah soiselnak um tukma hi. A piak haw mite cu Topa i santak a hihnak tukin mah calbelh cu Aaron in, a calah belh leleng tuk hi.

39“Nim manpha tuah Aaron i angki le a lupawng cu tak unna, a taikhap cu puancoih mawi, puan manpha tuah tak un hi.

40“Aaron i capa tei ca tukin mawinak le mi zohsannak a conak haw tukin angki, taikennak le lukhuh na bawlsak un hi. 41Mah puan cu Aaron le a capate silhtik un. Mahceng ten ka nadektu thiampi hi tukin pumpiaknak le Pathian lak apnak tuah Sathau na thih unna, mahten thiampi hi haw tuk hi. 42A taksa haw lang tuk ngawlin, a tai le a kawng haw hup thei tukin bawngbi com na khui sak un hi. 43Aaron le a capa ten thiampi nadek tukin Mun Thiangtho Sung a tum haw ten hihen, tawhdun khawmnak buk sung a, biaklandawh a zot haw hei ten hihen, a zahmawh haw lang tuk ngawlin le thihtik a hih haw ngawlnak tukin mah bawngbi comno cu ceng haw hen hi. Hihi Aaron le a casuan tei ca in, a zui leleng haw tukmi daan hi.

Currently Selected:

SUAHTULNAK 28: NBF1

Highlight

Copy

Compare