SUAHTULNAK 20

Thukham Sawm

(Daan 5:1-21)

1Pathian in, a lak hawah hi bangin hilh hi; 2“Keimah cu sal na tannak uh Izipt ngam pen a suahtultu Topa na Pathian uh ing.

3“Keimah sial ngawl pathian dang bia pahsuh un.

4“Vancungah hihen, leihumah hihen, leinuai tuisungah hihen a ummi tei mellim cuangin, na ca uhin, milim bawl pahsuh un hi. #Suah 34:17; Thiam 19:4; 26:1; Daan 4:15-18; 17:15; 5Milim bia pahsuh un; a maiah na lu uh hei kun pahsuh un, itahim titale keimah cu Topa na Pathian uh ing hi a, micing thei Pathian ing. Keimah a haw tu tei humah a sualnak haw hangin dantat tung a, a casuan tei khan, khang thum khang li tian dantatnak hengtik tung hi. #Suah 34:6-7; Mipum 14:18; Daan 7:9-10; 6Mahnaven keimah a deihtu le ka thukham a zuitu i humah ka ihnak cu khang thawng tampi tianin lak tung.

7 Topa na Pathian uh i min cu a thawthongin sal pahsuh un; itahim titale Topa Keimah in ka min mahti bangin a mangsualtu cu dantat tung hi. #Thiam 19:12;

8“Sabbath ni thiangno in cang un. #Suah 16:23-30; 31:12-14; 9Ni luk sungin na hempoh dek un, #Suah 23:12; 31:15; 34:21; 35:2; Thiam 23:3; 10ni salih ni cu Sabbath ni a hih hangin Topa na Pathian uhta hi. Mah ni-in nadek pahsuh un hi, nangmuh hihen, na cano uh hihen, na sal, na ngan le na khuasung a, um miphun dangte vang hihen nadek pahsuh un hi. 11Ni luk sung Topa in van le leipi, tuipi le a sungum hempoh bawlin a ni salih ni-in cawl hi. Mah hangin Topa in Sabbath cu muicu pia a, ama ca in thiangtik hi. #Pian 2:1-3; Suah 31:17;

12“Na nu le na pa upat un; mahten Topa na Pathian uh i ka piakmi ngamah in khansau in nung tuk uh ci. #Daan 27:16; Mt 15:4; 19:19; Mk 7:10; 10:19; Lk 18:20; Efe 6:2, 3;

13“Mi that pahsuh un.#Pian 9:6; Thiam 24:17; Mt 5:21; 19:18; Mk 10:19; Lk 18:20; Rom 13:9; James 2:11;

14“Nupa sualnak bawl pahsuh un.#Thiam 20:10; Mt 5:27; 19:18; Mk 10:19; Lk 18:20; Rom 13:9; James 2:11;

15“Nguca pahsuh un.#Thiam 19:11; Mt 19:18; Mk 10:19; Lk 18:20; Rom 13:9;

16“Na innnel tei humah theihpihtu man ngawl hi pahsuh un.#Suah 23:1; Mt 19:18; Mk 10:19; Lk 18:20;

17“Mi thil hawza pahsuh un. Mi inn hihen, mi zi le pasal hihen, a khui, a cipuh le midang tei neihmi hempoh hawza pahsuh un hi,” tin ti hi. #Rom 7:7; 13:9;

Israel Mite Lau Haw

(Daan 5:22-33)

18Israel miten vanthum le tuucangki tummi thawm za haw in, khuaphelep zawzok le meikhu tul lualuangmi mual amuh haw ten, lau leita in can tawtok haw a, khawlapi ah ding haw hi. #Heb 12:18-19; 19Moses lakah, “Nangmah in keimu lakah awn inna, ngai tuk ung hi; Pathian keimu lakah a awn ahi tale thi ngangai tuk ung hi,” tin ti haw hi. 20Moses in, a lak hawah, “Lau pahsuh un! Itahim titale Pathian cu amah kihca in, na sual ngawlnak tuk uhin, nangmuh sualloih tuk bekin hung hi, tin ti hi. 21Pathian umnak meikhu lamah Moses a hawh ten Israel mite cu lam khawlapiah ding haw hi.”

Biaklandawh Ca Daante

22 Topa in, Moses lakah Israel tei lakah hi bangin na hilhin hi, “Van pen nangmuh ka otpihnak mu zo toh uh ci. 23Noh ten keimah tuah na biak kop tuk uhin sui le ngun pathian bawl pahsuh un. 24Lei tuah bawlmi biaklandawh ka ca in bawl unna, a humah halkang biakpiaknak le pawlkom biakpiaknakin, na tuu le na khui tuah bawl un hi. Keimah bia tukin ka hilhnak mun tihkimah nangmu lakah hung tung a, muicu pia tung hi. 25Ka ca in suang biaklandawh na bawl uhten cikut mangin khen pahsuh un hi, itahim titale nawngkaitik sual kawn uh ci. #Daan 27:5-7; Josh 8:31; 26Ka biaklandawh na sak uhten a hum kainak tuk tin kailawn thuah sa pahsuh un; na bawl uh tale na kai uhten na zahmawh uh langtik sual tuk uh ci, tin, hilhin hi,” ti hi.

Currently Selected:

SUAHTULNAK 20: NBF1

Highlight

Copy

Compare