SUAHTULNAK 19

Israel Mite Sinai Mual Humah

1Israel mite cu Izipt ngam pen a suahtul sawng ha thumnak ni khat ni-in, Sinai phillawnah heng haw hi. 2Refidim pen tullehin Sinai phillawn a hen haw ten Sinai Mual bulah ngiahbuk sam haw a, 3Moses cu Pathian tawk tukin mual humah kai hi.

Topa in, Moses samin, a lakah Jakob i casuan, Israel tei lakah hi bangin hilhin ti hi. 4“Izipt mitei hum a, ka bawlmi cu mu uh ci a, noh cu muvanlai in, a ha hum a, cano a thiak bangin ka lakah thiak ing hi, tih na muh zo uh bangin ka lakah henpih zo ing. 5Atu-in ka thu ngai in, ka thukham na zui uh tale, noh cu keima mihing hi tuk uh ci. Leihum buppi hi keimata hi, mahnaven nohte cu keima ten mi, ka mihing hi tuk uh ci.#Daan 4:20; 7:6; 14:2; 26:18; Tit 2:14;#1Pet 2:9; 6Noh cu keima thiampi nadeh ka dehtikmi miphun le miphun thiangtho hi tuk uh ci. Israel tei lakah hilhin,” ti hi.#Mang 1:6; 5:10; 7Mah hangin Moses cu hawh a, Israel puitu samkhawmin Topa i thupiakmi hempoh cu a lak hawah hilh hi. 8Mipi ten, “Topa i hilh bangin bawl khawng tuk ung,” tin don ten haw a, Moses in mipi tei donlehnak cu Topa lakah theilehtik hi.

9 Topa in Moses lakah, “Nangma lak a, thu ka hilh ten, mipi ten zain, a muan haw hangin, meingo sahzet sung pen hung tung,” ti hi.

Moses in, mipi tei donlehnak cu Topa i lakah hilhleh hi. 10Topa in, Moses lakah, “Mipi tei lakah hawh inna Topa bia tukin tuni le zing cu mansa haw hen hi. A puan haw sawp haw henna, 11zinglawi ten a mansa in um un hi. Mah ni ten mi hempoh muh tukin Sinai Mualah tolh tung hi. 12‘Sinai Mual kimsuakin mipi tei ca in, ngamngi bawl inna, mual humah kai tuk ngawlin le mualbul zen tuk ngawlin ngalling un hi. Mi pa kha khatin, a zen ahi tale mahpa cu thah hi tuk hi. #Heb 12:18-20; 13Amah cu kuamah i zen ngawlin suang tuah seh hup hi tuk hi, ahimata thalcang tuah kah hup hi tuk hi. Mihing hihen, ngamsa hihen thah hi tuk hi,’ tin hilhin hi. Tuucangki a tum haw bek ten mipi cu mualah kai haw hen,” ti hi.

14Moses cu mualhum pen tolhsukin, Pathian bia tukin mipi cu mansatik hi. Mah hangin a puan haw sawpin, 15Moses in, “Zinglawi ten mansa in um unna; numei lak heiah zau pahsuh un,” ti hi.

16A ni thumnak zinglamin mualhum pen vanthumin khuaphelep zawzok hi. Meingo sahzet umin, tuucangki ngingzet tummi aw nging hi. Ngiahbuk a, ummi hempoh cu a thinsu haw in can tawtok haw hi. #Mang 4:5; 17Moses in mipite cu Pathian tawk tukin a ngiahbuk haw pen tulpihin mualbulah ding haw hi. 18Sinai Mual hempoh cu meikhu in tuam khawng hi; itahim titale Topa cu mual humah mei alhin hung hi. Meikhu cu calubuak haal meikhu bangin vanah kai in Sinai Mual cu a venghawngin hing dudut hi. #Daan 4:11-12; 19Tuucangki tummi cu nging dedeuh hi. Moses a ot ten Pathian in van thum tuah donleh hi. 20Topa cu Sinai Mual humah a tolh ten Topa in Moses cu muallekah samin, a sam bangin hawh hi. 21Topa in Moses lakah, “Hawh inna keimah zo nuamin ngamngi kal tuk ngawlin mipi ngallinnak na pia in hi. Mahma tale mi tampi thi haw tuk hi. 22Ka lak a hengmi thiampi hei a thianthoh haw kul tuk hi, mahma tale cawh tung,” ti hi.

23Moses in Topa i lakah, “Mipi cu hung thei haw tukma hi. Itahim titale hi mual cu ngamngi bawl unna, mual thiangtho in koih un hi, nangmah in ngallinnak pia zo ci,” ti hi.

24 Topa in, “Hawhsuk inna, na lakah Aaron pui in hi. Mahnaven thiampi le mipi ten ngamngi kal hihim haw pahsuh hen. Mahma tale bawlsia tung,” ti hi. 25Mah hangin Moses cu tolhsukin mipi tei lakah hilh hi.

Currently Selected:

SUAHTULNAK 19: NBF1

Highlight

Copy

Compare