SUAHTULNAK 14
14
Tuipi San Tan Haw
1 Topa in Moses lakah, 2Israel mite cu nungkik tukin le Pihahiroth mai, Migdol le Tuipi laklawhah Baalzefon lam hekin, ngiak tukin hilhin hi. Mahlai mun Tuipi San mawkah ngiak haw hen. 3Kumpipa in, “Israel mite cu vakvai amthongin phillawnah tang haw, tin ngaisung tuk hi. 4Kumpipa i lungmu cu khohtik tung a, na nung uh pen hilleh tuk hi. Ka minthangtiktu tukin kumpi le a ngalkap cu neh tung hi. Mahmi cu Izipt miten Topa ka hihlam thei haw tuk,” ti hi. A hilh bangin Israel miten bawl haw hi.
5Israel mite luat zo haw hi tih Izipt kumpi a hilh haw ten, amah le a khutnuai bawi cu a lungmu thekleh haw in, “I heng a bawl uh hi? Ita Israel mite sal a hihnak haw pen a tultik uh?” tin ti haw hi. 6Kumpi in, a ngaldonak cipuhleng tuangtimtikin a ngalkap hawhpih hi. 7A cipuhleng lak pen a phabel mi cipuhleng za luk le a humah ngalbawi pa khat ten khungin, a dang Izipt tei cipuhleng tuah hil haw hi. 8Topa in Kumpi lungmu a khohtik hangin, ngalpha zetin#14:8 Ngalpha zetin tih hi Topa i cinkhawinak sungah tihvang hi thei a hawh tulmi Israel mite cu hil hi. 9Izipt miten a cipuh haw hempoh tuah kumpi i cipuhleng, a mawngtu le a ngalkap tuah Israel mite cu hil haw in, Baalzefon mai Pihahiroth el Tuipi San mawk, a ngiahnak munah pha haw hi.
10Israel miten amuh hilin, kumpi in nek pepel tih amuh haw ten lauzet haw a Topa i lakah bopnak ngenin au haw hi. 11Moses lakah, “Izipt ngamah khaan a um ngawl hangin maw, hilai phillawnah thi tukin na pui? Izipt ngam pen puitulin, na bawlmi hi zo hemin! 12Izipt ngam a um uh laihin, hi ti bang tuk hi tih cu hilh hamsa ma ung maw? ‘Kohte dondak li nuam toh pahsun hi; Izipt mitei lakah salin um tuk poh ung,’ ti ma ung maw? Hi phillawn sung a, thih sangin, salin um cu keimu ca in pha saw hi,” tin ti susuih haw hi.
13Moses in Israel tei lakah, “Lau him pahsuh un, kho zetin ding unna, tuni in nangmuh pan tukin Topa i bawl tukmi na zo un. Tuni a, na muh uhmi Izipt mite muleh tukma toh uh ci. 14Topa in nangmu do ai-in dosak tuk hi. Noh tei bawl tuk imah kulma hi. Lungmuang zetin um poh un,” ti hi.
15 Topa in Moses lakah, “Itakaw ka lakah na kah lih uh? Israel mite cu mailam nawt tukin hilhin hi. 16Na thiangkhut dangto inna, tuipi humah na baanphalhin hi. Tui cu khendun tuk a, Israel mite cu leiko humah hawh thei haw tuk hi. 17Izipt mitei lungmu khohzettik tung a, nangmuh hilin, hung haw tuk hi. Kumpi le a ngalkap tei cipuhleng le a cipuhleng mawngtu cu neh tung a, mahmi in ka min cu sunglawitik tuk hi. 18Kumpi le a cipuhleng le cipuhleng mawngtu ka neh hangin minthannak ka ngah ceng ten, Izipt miten Topa ka hihlam thei haw tuk,” ti hi.
19Israel ngalkap honpi maiah a hawhtu Pathian i vancungmi in, nunglam pen khol hi. A mailam haw a, ummi meingo zial cu nunglamah thawn pelin, 20Izipt ngalkap le Israel mi honpi tei laklawhah thawnta hi. Meingo a um hangin Izipt ngalkap tei ca in khuathim hi; mahnaven Israel tei ca in, a vak hangin zankhua nekdun thei ngawl veve in, Izipt ngalkap le Israel mipi cu um haw hi.
21Moses in tuipi humah a baan a zak ten, “Topa in nisuahnak lam huih cu nase zetin theutikin, zankhua a theu nungten tuipi tawphah a, leiko lang hi. Tui cu khendunin, 22Israel mite cu tuipi sung a, leiko humah hawh haw in, a pang lang le langah tui cu pang bangin tiang hi.#1Kor 10:1-2; Heb 11:29; 23Izipt miten Kumpi i cipuh hempoh, a cipuhleng le a mawngtu cu tuipi sungah hil tul leng haw hi. 24Zinglam mualpi ni al#14:24 Mualpi Ni al tihmi cu Thingketau, Vak memial tihnak hi. ten Topa in, mei alh zial le meingo zial hum pen Izipt ngalkap cu zo a, amthongin bawl hi. 25A cipuhleng kete cu pawntikin pei haksa zetin thawn thei cacangin bawl hi. Izipt ngalkap ten, ‘Topa in Israel tei lamah tangin, ohte cu do hi,’ tai nung,” tin ti haw hi.
26 Topa in Moses lakah, “Izipt mitei cipuhleng le a cipuhleng mawngtu tei humah tui cu kiklehin nimtik khawng tukin tuipi humah na baantha ngil cu zaaklehin,” ti hi. 27Moses in, a baan cu tuipi humah zak a, khua a vak ten tui cu kiklehin, amasa bangin umleh hi. Izipt mite tai suak tumin tui cu nawk li haw naven Topa in tui sungah nimtik khawng hi. 28Tui cu kiklehin, Israel mi a hiltu, a cipuhleng le a mawngtu le kumpi i ngalkap hempoh khuh khawng hi. Pa khat hei suakca haw ma hi. 29Mahnaven Israel mite cu a lang le langah tui cu pangtian bangin tiangin tuipi sung a, leiko hum pen hawh vawk haw hi.
30Mah ni-in Izipt mitei khutsung pen Israel mite cu Topa in nunpanin Izipt mitei luang cu Israel miten tui mawkah mu haw hi. 31Israel miten Topa in, a huham ngengnak tuah Izipt mite do hi tih cu ciangno in, amuh haw hangin Topa cu lau haw in; Topa le a salpa Moses humah muannak nei haw hi.
Currently Selected:
SUAHTULNAK 14: NBF1
Highlight
Copy
Compare
Share
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
