SUAHTULNAK 13

Pathian Nelah Catawntil Piaknak

1 Topa in Moses lakah, 2“Capa tawntil hempoh cu keima lakah pia tuk uh ci. Israel mi lak pen capa tawntil hempoh cu kata hi, ngan lak hei pen a pa tawntil hempoh kata,” ti hi.#Mipum 3:13; Lk 2:23;

Naman Hel Ngawl Cangho Puai

3Moses in Israel tei lakah, “Izipt ngam sal na tannak uh pen na tul ni uh, tuni hi cing leleng un; itahim titale Topa in, a baantha ngil tuah a suah ni hi. Naman helmi cangho ei hihim pahsuh un hi. 4Ha masabel tuni in Izipt ngam pen tul uh ci. 5Topa in Kanaan mi, Hit mi, Amor mi, Hiv mi le Jebus mitei umnak ngam cu na lak uhah pia tukin na pu uh le na pa tei lakah thutiam zo a, khuinawi le khuaitui luannak ngam hi. Mah hangin mah ngam na hen uhten Abib ha, in naman hel ngawl cangho puai bawl tuk cu phawk ngil pahsuh un. 6Ni salih sung naman hel ngawl cangho ei unna, a ni salihnakin Topa ca in puai bawl un hi. 7Ni salih sung cu naman hel ngawl cangho ei un hi. Naman hel mi cangho le a naman hei hihen na ngamsung hihimah umtik pahsuh un. 8Hi hempoh a bawlnak uh cu Izipt ngam pen a tul uhten eimu ca in, Topa i bawlmi phawhlengnak tukin hi,” tin, na ca tei lakah hilh un hi. 9Topa i daan cu a hilh le son cawl ngawlin na bawl lelengnak uh, a theitiktu tukin, na khut uhah hihen, na cal uhah hihen, sialsiahnak hi tuk hi. Itahim titale a ngilnak huham tuah Topa in Izipt ngam pen suah hi. 10Kum khat nung kum khat a hun a hen ten komno in bawl leleng un hi.

Catawntil Piaknak

11“Topa in, Kanaan mitei ngamah hengtik tuk hi; itahim titale Ama min salin na pu le na pa tei lakah thutiam zo hi. Mah ngam cu na lak uhah a piak ten, 12na capa tawntil hempoh cu Topa i lakah pia tuk uh ci. Na ngan uh i hin masabel catawntil a pa cu Topa catuk hi.#Suah 34:19-20; Lk 2:23; 13Mahnaven laak catawntil a pa cu tuuno tuah tanleh un hi; na tan nuam ma uh tale, a ngawng ektuah un. Na capa tawntil hempoh tanleh un hi. 14Tu nungten na capa in, hi bangin na bawl uhmi hi itihnak kaw? tin, a dong tale, ‘Topa in, a saltannak, Izipt ngam pen a ngilnak huham tuah suahtul hi. 15Kumpi cu a lungmu khohin, Izipt ngam pen a suah nuam ngawl ten, Izipt ngam a, capa tawntil hempoh, mihing capa hihen, ngan tei ca hihen Topa in, na that khawng hi. Mah hangin capa tawntil hempoh cu Topa i lakah piak a hihnak hi; mahnaven ka capa tawntil cu tanleh ing hi,’ tin ti un. 16Hi bangin na bawlnak uh cu nunglam thu a theitiktu tukin na khut uhah hihen, na cal uhah hihen sialsiahnak bang hi tuk hi, itahim titale Izipt ngamsung pen Topa in, a ngilnak huham tuah suahtul hi,” ti hi.

Meingo Zial le Mei-alh Zial

17Kumpipa in Israel mite a hawhtik ten Filistia tuipi mawk a, hawhmi lampi cu a combel naven Topa in mah lampi pen pui ma hi. Itahim titale Pathian in, “Ngaldo tukmi amuh haw ten a lungmu haw thekin, Izipt ngam kikleh haw kha tuk tih deih mang,” ti hi. 18Mah lampi ai-in phillawn zin pen Tuipi San lamah Topa in kihpih hi. Israel mite cu ngaldo tukin tuangtimsa in, Izipt ngam pen tul haw hi.

19Moses in Josef i nguh vang pua hi, itahim titale Josef in, Israel mite nase zetin thutepnak a bawltiksa mi hi. A lak hawah, “Pathian in pan tuk hi. Hilai pen na tul uhten ka nguh pua un,” tin Josef in, ti hi.#Pian 50:25; Josh 24:32;

20Sukkoth pen Israel mite cu tul haw in, phillawn elno a, um Etham ah cam haw hi. 21Sunlamin, a lampi haw laktu tukin meingo zialpi in Topa cu a mai hawah hawh hi. Zan a hen ten vaknak piatu tukin le a sun a zanin, a hawh theih hawnak tukin mei alh zialpi in Topa cu a mai hawah hawh hi. 22Sunlamin meingo zial le zanlamin mei alh zial tuan Israel tei mai ah um leleng hi.

Currently Selected:

SUAHTULNAK 13: NBF1

Highlight

Copy

Compare