KILAHNA 14
14
Tuuno le Mi 144,000
1Tua ciengin ka khuodah leh Zion Muol tungah Tuuno a dingin na om hi! A talpang tung vua ama’ min le a pa’ min a kigiel mi tul za le tul sawmli le tulli zong ama tawh a omton uhi.#Ezk 9:4; Kln 7:3 2Tuale tui tampi ging bang le vanto ging tawh a kibang a ginngai mama aw khat ka za hi. Tua ka zah awging pen harp tumte in a harp lasahna uh a tum cienga awging tawh kibang a, 3amate in kumpi topha mai, ganhing lite mai, le upate mai-ah la tha khat a sa uhi. Leitung pana a kitankhiesa mi tulza le tul sawmli le tul lite ci simlo koima dang in tua la sa thei lo hi. 4Tam mite ahile numei tawh a bua ngai nai sih uhi, azieh pen amate tangval ahi uhi; tam mite in Tuuno’ peipeina ah a zui kawikawi uhi. Amate Pasien le Tuuno adingin a ga masa pente ahi vua, 5a kam sung vuah zuouthu kici kimu loin paubanna a nei sih uhi.#Zeph 3:13
Vantungmi Thumte’ Thugen
6Tua ciengin leitunga a teng#14:6 Gk “a to “ mi namkim, be namkim, le mi zosie kungah kumtawn lungdamna thu phuongzah dinga van kimlai-a a leng vantungmi dang khat ka mu hi. 7Nahpi tahin ama kiko a, “A thukhen nading hun ang tung ta ahi ziehin Pasien giing unlen, ama phat un; van le lei le tuipi le tuinahte a siem pa ama bie un,” a ci hi.
8Tua ciengin a nina vantungmi dang khat in ei zui a, “Cim ta, a lien mama Babylon khuopi cim ta! Ama nu in a numei-pasal pahtatna tawh a kipawl lungthahna lenggazu minam zosie a dawnsah hi,” a ci hi.#Isa 21:9; Jer 51:8; Kln 18:2
9Tua ciengin a thumna vantungmi dang khat in amate zui-in aw lienpi tawh, “Tua gamsa le a lim bie-in a talpang tung uh ahi sihle a khut tung vuah ciemtena khat a nga mite in, 10Pasien’ thangpaina hai sungah bangma tawh kihal lo-a kisung Pasien’ lungthahna lenggazu zong a dawn ding vua, amate pen a siengtho vantungmite mai le Tuuno mai-ah meikuong le kaat tawh kibawlsie ding hi.#Isa 51:17; Pien 19:24; Ezk 38:22 11Amau’ kibawlsietna meikhu kumtawnin a kitungto valuh hi. Gamsa le a lim a bie mite le tua gamsa’ min ciemtena a nga tapo adingin sun ahi a, zan ahi zongin tawlngahna himhim a om sih hi,” ci-in a kiko hi.#Isa 34:10
12Tami sungah Pasien thupieh a zui mite le Jesu’ upna a pom misiengthote’ thuohzawhna kalh hi.
13Tuale vantung panin aw khat ka za a, “Tami giel in: Tu-a kipan Topa sunga a site mi hampha ahi hi,” a ci hi. Hlagau in, “Hi hi,” a ci a, “A sepnate un amate nuazui ding ahi ziehin a nasep gimna uh panin a tawlnga ta ding uhi,” ci-in a gen hi.
Leitung Anlahna
14Tua ciengin ka khuodah leh meiilum kang khat na kai a, tua meiilum kang tungah Mihing Tapa tawh a kibang mi khat to-in, kham lukhu khat khu a, a khut sungah phieukawi hiem khat a tawi hi!#Dan 7:13 15Biehinnpi panin vantungmi dang khat ang pusuoh a, meiilum kang tunga a to mipa nahpi tahin hlanin, “Leitung an lah hun ang tung zo ta ahi ziehin na phieukawi zang inlen at in, azieh pen leitunga ante min siengin kuotgawp ta hi,” a ci hi.#Joel 3:13 16Tuaci’n meiilum tunga a to mipa in leitungah a phieukawi a vat kawikawi leh leitung atsa a suoh hi.
17Tua ciengin biehinnpi panin vantung-mi adang khat ang pusuoh a, ama in zong phieukawi hiem khat ma nei hi. 18Tua ciengin mei tunga thunei vantungmi dang khat maitam panin ang pusuoh a, phieukawi hiem tawi mipa nahpi tahin hlanin, “Lenggate min zo ta ahi ziehin na phieukawi hiem zang inlen, leitung lengga gui panin lengga bawhte khawm in,” a ci hi. 19Tuaci’n vantungmi in leitungah a phieukawi a vat kawikawi a, lenggate khawmin Pasien’ thangpaina lengga cilna phuolah a pai hi. 20Khuopi pulamah lengga kicil a, tua lengga cilna phuol panin sisan luongin, tai zani#14:20 Gk “stadia tul le zaguh “ bang a gamlatna dongah sakol kamkai cieng banin a luong hi.#Isa 63:3; Kaa 1:15; Kln 19:15
Currently Selected:
KILAHNA 14: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
