GAMLAH VANA 5
5
Abua Mite
(Siem 15:1-33)
1 Topa in Moses hopi-in tam bangin a gen hi: 2Amate in miphahte,#5:2 Vun natna tuomtuomte dinga kizang kammal ahi hi; a khietna kicien thei lo hi. ahi sihle nin neite le misi tawh kisuhkhah zieha abua mi poma giephuol pulamah a nawmang nadingun Israel-te thu pie in; 3amate lahah ka tenna a giephuol uh a niehsah lo nadingun amate, pasal ahi a, numei ahi zongin giephuol pulamah na notmang ding hi. 4Tua ma bangin Israel-te in a bawl vua, giephuol pulamah amate a notmang uhi; Topa thupieh bangin Israel mite gamta uhi.
Mawna Pulahna le Lokiana
(Siem 6:1-7)
5 Topa in Moses hopi-in tam bangin a gen hi: 6Israel-te kungah tam bangin gen in: Midang khat tungah pasal khat ahi sihle numei khat a tatkhiel a, Topa tungah muonhuoi loin khielna a bawl ciengin, 7a gamtatnasa mawna pulah ding hi. A tatkhielna a cingin lokia ding a, ama in tua tungah nga-ah-khat belapin a tatkhielna pa kungah pie ding hi. 8A liem mipa in khielna zieha lokiana a sang ding a kinaipi tanau a nei sih leh, tua khielna zieha lokiana pen Topa kungah siempu pa adingin tung ding a, siempu pa in a khiel pa thoidam nadinga kibawl thoidamna tuutang pen zong tanbe lai ding hi.#Siem 6:1-7 9Israel-te’ silpieh siengtho zosie lahah siempu pa kunga a peipi uh letsong zosie ama-a’ hi ding hi. 10Silpieh siengtho zosie pen amau-a’ ahi hi; mi khatpo in siempu pa tunga a pieh poma ama-a’ hi ding hi.
A Muonhuoi lo Zi Tungtang Thu
11 Topa in Moses hopi-in tam bangin a gen hi: 12Israel-te hopi inlen amate kungah tam bangin gen in: Mi khatpo’ zi vahvai-in a pasal tungah a thuman sih a, 13pasal khat in tua nu na luppi-in hizongle a pasal in tua khu a thei sih a, tua nu ama le ama a kibuasah hi napi koima in thei loin a khiel laitahin zong a kimat lo ziehin ama langkhatah teci pang ding mi a op lo vangin; 14a pasal in tua nu tungah ginmawna lungsim nei-in abuasa-in a upmaw a; ahi sihle abua lo kimlai ama tungah ginmawna lungsim nei-in mi tawh tua nu a ginmaw leh; 15tua pa in siempu pa kungah a zi peipi ding hi. Tuale ama in tua nu adingin a kisam mangbuham ephah khat’ sawm-ah-khat peipi ding hi. Ama in tua tungah sathau sung loin gimnamtui zong koi lo ding hi. Bang ding ahei cile tam khu ginmawna zieha an tawh biehna ahi a, khielna phawkia nadinga an tawh biehna ahi hi.
16Tua ciengin siempu pa in a nai-ah tua nu peipi-in Topa mai-ah koi ding hi. 17Siempu pa in leibeel khat tawh tui siengtho la ding a, biehbuh kem tunga leivui themkhat la-in tua tui sungah sung ding hi. 18Siempu pa in numei nu’ sam hlamkhe-in Topa mai-ah koi ding a, ama’ khutah ginmawna zieha an tawh biehna ahi an tawh phawkiana biehna tawisah ding hi. Siempu pa in ama’ khut sungah samsietna tuisie tawi ding hi. 19Tua ciengin siempu pa in tua nu kiciemsah ding a, “Nang in na pasal’ uhna nei-a na om sungin koima’ pasal in hing luppi loin, a sieng lo lama a kihei lo na hi leh, samsiet ang tun thei tami tuisie panin suohta in. 20Hizongle na pasal’ uhna nei-a na om sungin vahvai-in nang le nang na kibuasah a, na pasal simlo pasal dang khatin ang luppi a ahile, 21siempu pa in tua numei kiciemsahin ama kungah, “Topa in na sulbu hing kiesahin na gilpi ang pawhsah ciengin, na mite lahah hamsie le kiciemna-a zah dingin Topa in hing bawl taheh; 22tu-in tami tuisie in na gil sung zui hinlen, na gilpi pawhsahin na sulbu kiesah taheh!” ci ding hi. Tuale numei in, “Amen. Amen,” ci ding hi.
23Tua ciengin siempu pa in tua samsietna thu zosie laibu sungah gielin a unpi-in tuisie sungah sawp sieng ding hi. 24Ama in samsietna a tun thei tua tuisie pen numei nu dawnsah dinga, ama sungah tua tui lutin aicim taangkha bang ding hi. 25Siempu pa in numei nu’ khut sung panin ginmawna zieha an tawh biehna la ding a, ama in Topa mai-ah tua an tawh biehna pen vei-in maitam ah peipi ding hi; 26siempu pa in phawna satanh dingin an tawh biehna lahah khutdim khat hamin maitam tungah hal ding a, tua ciengin numei nu tuisie dawnsah ding hi. 27Ama in numei nu tuisie a dawnsah zaw ciengin, numei nu ama le ama kibuasahin a pasal tunga a muonhuoi lo ahile, ama sungah samsietna a tun thei tua tuisie lutin aicim tangkha bang ding a, a gilpi pawhin a sulbu kie ding a, tuaci’n mite lahah tua numei samsietna-in kizang ding hi. 28Ahi vangin a numei ama le ama kibuasah lo a, a sieng ahi nah leh ama a khiel lo ahi a, tuaci’n ama nu suohta-in ta nei thei ding hi.
29Tam pen a pasal’ uhna sunga a om zi khat vahvai-in a kibuasah ciengin, 30ahi sihle a pasal in ama tungah ginmawna lungsim nei-in a zi mi tawh a upmaw ciengin tua bang kiginmawna thute-a zah ding thukham ahi hi; tua ciengin ama in Topa mai-ah tua numei koi ding a, tua ciengin siempu pa in numei nu tungah tam thukham zosie zang ding hi. 31Pasal pa pen khielna panin suohta ding a, ahi vangin numei in ama’ khielna puo ding hi.
Currently Selected:
GAMLAH VANA 5: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
