GAMLAH VANA 35
35
Levi-te’ Khuopite
1Jericho khuo Jordan gun gei Moab zanglei-ah Topa in Moses hopi-in tam bangin a gen hi: 2Amate in luo-in a nei ding uh sung panin Levi-te a sunga a ten nading khuopite a pieh nadingun Israel-te thu pie in; khuopite kimvela lonona mun teng zong Levi-te na pie ding hi. 3Khuopite pen amau’ tenna hi ding a, lonona munte zong amau’ tuuhonte le bawnghonte, amau’ ganhonte le amau’ ganta zosie-a’ hi ding hi. 4Levi-te na pieh ding uh khuopi lonona munte in khuopi kul panin a kimkot tong tulkhat huom ding hi. 5Khuopi pulam te inlen nisuona lampang tong tulni, leitaw lampang tong tulni, nitumna lampang tong tulni, leilu lampang tong tulni hi ding a, a laikimah khuopi om ding hi; tam pen amau’ khuopi lonona munin a nei ding uhi.
6Levi-te na pieh uh khuopite sungah kibuhna khuopi guh kihal ding a, khum munah mi thatpa na taisah ding vua, tua banah khuopi sawmli le ni na piehbe ding uhi. 7Levi-te na pieh ding uh khuopi zosie a unpi-in sawmli le giet hi ding a, lonona gamte tawh hi ding hi. 8Israel-te’ neisa lah panin na pieh ding uh khuopite tawh kisai-in, mi citamte tung panin tampitah na la ding uhi; mi citawmte tung panin tawmkhat beh na la ding uhi. Amau’ luo gamh tawh kizui-in Levi-te tungah a khuopite uh a pie ciet ding uhi.#Josh 21:1-42
Kibuhna Khuopite
9 Topa in Moses hopi-in tam bangin a gen hi: 10Israel-te hopi inlen a tung vuah tam bangin gen in: Jordan galkai-in Canaan gam na tun ciengun, sawm lopi-in 11khum munah mi khat a thatkha pa a tai thei nading, noma ading kibuhna khuopi dingin khuopite na tel ding uhi. 12Mihonpite mai-ah thukhenna a thuoh masangin, tua mithatpa a si lo nadingin khuopite pen phula pa kung pana na kibuhna uh hi ding hi.
13Noma adinga na ciemte uh khuopite ahile khuopi guh hi ding hi: 14Kibuhna khuopi dingin Jordan galkhatah khuopi thum, Canaan gam sungah khuopi thum na ciemte ding uhi. 15Sawm lopi-in mi khat a that khate khum munah a tai thei nadingin tam khuopi guhte pen Israel-te, note lahah a teng gamdang mite ahi sihle bakhat sung a peemte adingin kibuhna hi ding hi.
Tuolthana le Sisan Phulahna
16Ahi vangin mi khat in sia vanzah khat tawh midang khat satin tua mipa a si leh ama tuolthat ahi hi; tua tuolthat pa kithat ding hi. 17Ahi sihle mi khat in mi si thei nading ahi a khut sunga a tawi suong tawh midang khat sepin a si leh, ama tuolthat ahi hi; tua tuolthat pa kithat ding hi. 18Ahi sihle mi khat in mi a si thei nading ahi sing tawh kibawl hiem khat tawh midang khat satin a si leh, ama tuolthat ahi hi; tua tuolthat pa kithat ding hi. 19Tua tuolthat pa pen sisan phulapa in that ding hi; ama gel a kimu ciengun sisan phulapa in tuolthat pa that ding hi. 20Tua ma bangin mudana ziehin mi khat in adang khat sawnpua-in, ahi sihle na buhdapin bangkhat tawh khaw-in a si a, 21tua ahi sihle kigalbawlin a khut tawh tumin tua mipa a si leh, tua mitum pa kithat ding hi; tua mipa pen tuolthat ahi hi; ama gel a kimu ciengin sisan phulapa in tuolthatpa that ding hi.
22Ahi vangin kigalbawlna om lopi-in midang khat thakhatin sawnpua-in, ahi sihle buhdap loin bang khat tawh sepin, 23ahi sihle si thei nading suongtum khatpo tawi-in, a galte zong hi beh lo, suhliem zong sawm lo hi tama le sawm lopi-in#35:23 Heb “mu lopi-in” midang khat tungah tua suongtum in khieh kha-in tua mipa a si leh, 24mi honpite in tuolthat pa le sisan phulapa’ kikalah tam ngaina kipte tawh kituohin thu khen ding uhi; 25sisan phula pa khut sung panin mihonpi in tuolthat pa hunkhie ding uhi. Tua ciengin a kibuh masahna khuopi-ah tuolthat pa puohkia ding uhi. Sathau siengtho kinu siempu lien pa a si masangsie tua khuo-ah tuolthat pa a teng ding hi. 26Ahi vangin tuolthat pa in hun khatpo-ah a buhna masa khuopi’ gamgi kansanin a pei a, 27sisan phula pa in a kibuhna khuopi pulamah ama mukha-in phula pa in tua tuolthat pa a tha leh, ama in sisan suona ziehin mawna a puo sih ding hi. 28Azieh pen siempu lien pa a si masangsie tua mipa pen kibuhna khuopi sungah a om ding hi; ahi vangin siempu lien pa a si zaw ciengin tuolthat pa inn ah pei thei ding hi.#Thkna 19:2-4; Josh 20:1-9
29Tam teng pen na khang tawntung vua na tenna uh mun zosie-ah thukham le ngaina kipte hi ding hi.
30Mi khat in midang khat a tha leh tecite’ theina siasanin tuolthat pa kithat ding hi; ahi vangin teci khat beh’ tecipanna tungtawnin koima khat beh kithat lo ding hi.#Thkna 17:6; 19:15 31Tua banah sina dan thuoh dinga kilawm mipa khat a kitatna ding sum na sang sih ding uhi; tuolthat pa kithat ding hi. 32Kibuhna khuopi-a a taisa mi khatpo, siempu lien pa a si masangin kilekia-in gam sungah a ten thei nadingin kibuhna khuopi-a galtai pa kitat nading sum na sang sih ding uhi. 33Na tenna uh leitang na buasah sih ding uhi, sisan in leitang buasahin a sisan suohsah pa’ sisan longal tua leitang siensuo thei ding adang om lo hi. 34Na tenna uh leitang na buasah sih ding vua, keima’ tenna leitang zong na buasah sih ding uhi; azieh pen keima Topa Israel-te lahah ka teng hi, a ci hi.
Currently Selected:
GAMLAH VANA 35: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
