GAMLAH VANA 33
33
Israel-te Khuolzinna Munte
1Moses le Aaron makaina tawh Egypt gam pan Israel-te a honin a pei lai-un, galkap kivaipuoh dan tawh a khuolzinna uh mun teng pen tam teng ahi hi. 2Moses in Topa’ thupiehna tawh phuol khat pan phuol khat a amau’ kipatna munte a giel hi. Tam teng pen amau’ kipatna mun tawh kizui-in a giephuolte uh ahi hi. 3A hla masa, tua hla ni sawm le ni nga ni-in Rameses panin a dingkhie uhi; peisan pawi a manzaw a zing ni-in Egypt-te’ mitmu-in Israel-te hangsan tahin a peikhie vua, 4Topa in amate lahah a satlia a tacil uh zosie Egypt-te in a vui laitah uh ahi hi. Topa in a pasien-te uh tung nangawnah thu a khen hi.
5Tuaci’n Rameses pan Israel-te ding khie-in Succoth-ah giephuol a sat uhi. 6Succoth pan ding khie-in senel gam mong Etham-ah giephuol a sat uhi. 7Etham panin amate dingkhie-in Baal-ephon tawh kimaingat Pi-hahiroth lamah a kiheikia uhi; amate in Migdol mai-ah giephuol a sat uhi. 8Pi-hahiroth pan dingkhie-in tuipi kantanin senel gamah a pei vua, Etham senel gamah nithum sung lamah pei-in Marah-ah giephuol a sat uhi. 9Marah pan dingkhie-in Elim a tung uhi; Elim-ah tuinah sawm le ni le lutu kung sawmsagi om a, khum munah giephuol a sat uhi. 10Elim panin a dingkhie vua, amate in San Tuipi#33:10 Ahi sihle “Pumpeng Tuipi” gei-ah giephuol a sat uhi. 11San Tuipi#33:11 Ahi sihle “Pumpeng Tuipi” pan a ding khie vua, Sin senel gamah giephuol a sat uhi. 12Sin senel gam pan amate a dingkhie vua, Dophkah-ah giephuol a sat uhi. 13Dophkah pan amate dingkhie vua, Alush-ah giephuol a sat uhi. 14Alush pan a ding khie vua, mite dawn ding tui a om lona Rephidim-ah giephuol a sat uhi. 15Rephidim pan a dingkhie vua, Sinai senel gamah giephuol a sat uhi. 16Sinai senel gam pan a dingkhie vua, Kibroth-hattaavah-ah giephuol a sat uhi. 17Kibroth-hattaavah pan a dingkhie vua, Hazeroth-ah giephuol a sat uhi. 18Hazeroth pan a dingkhie vua, Rithmah-ah giephuol a sat uhi. 19Rithmah pan a dingkhie vua, Rimmon-perez-ah giephuol a sat uhi. 20Rimmon-perez pan a ding khie vua, Libnah-ah giephuol a sat uhi. 21Libnah pan a dingkhie vua, Rissah-ah giephuol a sat uhi. 22Rissah pana dingkhie vua, Kehelathah-ah giephuol a sat uhi. 23Kehelathah pan a dingkhie vua, Shepher Muol ah giephuol a sat uhi. 24Shepher Muol pan a dingkhie vua, Haradah-ah giephuol a sat uhi. 25Haradah pan a dingkhie vua, Makheloth-ah giephuol a sat uhi. 26Makheloth pan a dingkhie vua, Tahath ah giephuol a sat uhi. 27Tahath pan a dingkhie vua, Terah-ah giephuol a sat uhi. 28Terah pan a dingkhie vua, Mithkah-ah giephuol a sat uhi. 29Mithkah pan a dingkhie vua, Hashmonah-ah giephuol a sat uhi. 30Hashmonah pan a dingkhie vua, Moseroth-ah giephuol a sat uhi. 31Moseroth pan a dingkhie vua, Bene-jaakan-ah giephuol a sat uhi. 32Bene-jaakan pan a dingkhie vua, Hor-haggidgad-ah giephuol a sat uhi. 33Hor-haggidgad pan a dingkhie vua, Jotbathah-ah giephuol a sat uhi. 34Jotbathah pan a dingkhie vua, Abronah-ah giephuol a sat uhi. 35Abronah pan a dingkhie vua, Ezion-geber ah giephuol a sat uhi. 36Ezion-geber pan a dingkhie vua, Zin senel gam ah giephuol a sat uhi (tua khu Kadesh mun ahi hi). 37Kadesh pan a dingkhie vua, Edom gammong-Hor Muol ah giephuol a sat uhi.
38Egypt pan Israel-te a peikhiet zaw uh a kum sawmlina, a hla ngana, a ni masa ni-in Topa’ thupiehna tawh Hor Muol tungah siempu Aaron kato a, khum munah a si hi.#Gam 20:22-28; Thkna 10:6; 32:50 39Hor Muol tungah Aaron a si laitahin kum za le kum sawmni le kum thum pha hi.
40Canaan gam Negeb-a a teng Canaan mi Arad kumpipa in Israel-te ang pei hi ci thu a za hi.#Gam 21:1
41Hor Muol panin a dingkhie vua, Zalmonah-ah giephuol a sat uhi. 42Zalmonah pan a dingkhie vua, Punon-ah giephuol a sat uhi. 43Punon pan a dingkhie vua, Oboth-ah giephuol a sat uhi. 44Oboth pan a dingkhie vua, Moab gam sung Iye-abarim ah giephuol a sat uhi. 45Iyim pan a dingkhie vua, Dibon-gad ah giephuol a sat uhi. 46Dibon-gad pan a dingkhie vua, Almon-diblathaim-ah giephuol a sat uhi. 47Almon-diblathaim pan a dingkhie vua, Nebo tun masang Abarim muolte-ah giephuol a sat uhi. 48Abarim muolte pan dingkhie-in Moab zanglei Jordan gungei Jericho-ah giephuol a sat uhi; 49amate in Jordan gei Beth-jeshimoth panin Moab zanglei-a om Abel-shittim dongin giephuol a sat uhi.
Canaan Zaw nading Lamlahna
50Moab zanglei Jordan gungei Jericho khuo-ah Topa in Moses hopi-in tam bangin a gen hi: 51Israel-te hopi inlen a kung vuah tam bangin gen in: Jordan gun kansanin Canaan gam na tun ciengun, 52na mai panun tua gama a teng zosie notmang sieng unlen, a suong milim zosie uh suhsiet piehin, a kisung a milimte uh na susie ding vua, a munsang zosie uh na phelmang ding uhi. 53Khum gam pen na nei ding vua kang pieh ahi ziehin tua leitang note in tang unlen a sungah teng un. 54Na be na phung utawh kizui-in aisanna tawh tua leitang na hawm ding uhi; mici tamte a golzaw pie-in mici tawmte a neuzaw na pie ding uhi; mi khatpo tunga ai a tuhna popo ama-a’ hi pai ding hi; na be na phung sung vua na pate uh nam tawh kizui-in khum gam na luo ding uhi.#Gam 26:54-56 55Ahi vangin na mai panun khum gama a na tengsa mite na nawmang sih uleh, na opsah lai uh mite pen note dingin na mit uh ang do, na pang uh ang sun ling tawh a kibang ding uhi; amate in na tenna gam vuah ang lung gimsah ding uhi. 56Amate tungah bawl dinga ka ngaisut bangin na tung vuah kang bawl ding hi, ci-in gen in,” a ci hi.
Currently Selected:
GAMLAH VANA 33: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
