SIEMPU LAIBU 25
25
Sabbath Kum
(Thkna 15:1-11)
1 Topa in Sinai Muol tungah Moses hopi-in tam bangin gen hi: 2Israel mite hopi inlen a kung vuah tam bangin gen in: Note kang pieh ding leitangah na tun ciengun tua leitang in Topa adingin sabbath tang ding hi. 3Kum guh sung lo na pawi ding vua, kum guh sung na lengguite uh heuhin a ga na khawm ding uh;. 4ahi vangin a kum sagina sungin leitang ading a bukim tawlngahna sabbath khat om ding a, Topa ading sabbath hi ding hi. Na lo uh na pawi sih ding vua, na lenggui uzong na heuh sih ding uhi. 5Anlah nua-a ali pote na at sih ding vua, a kiheuh lo na lengguite na khawm sih ding uhi: Tua khu leitang adingin a bukim tawlngahna kum hi ding hi. 6Tua sabbath kum sunga leitang pana a piengte- note, na sila numeite le pasalte, a kiguoi na nasemte ule no tawh a tengton pemtate in na ne thei ding uhi; 7azieh pen tua na leitang panun a pieng zosie na ganhonte ading zong le na gam sung vua gamsate dingin an hi ding hi.#Pei 23:10-11
Jubilee Kum
8Kum nipi sagi#25:8 Ahi sihle “sabbath-te” hun pen kum sawmli le kum kuo ahi thei nadingin kum nipi sagi, kum sagi mun sagivei na simto ding uhi. 9Tua ciengin hla sagina a ni sawm ni-in pengkul na gingsah ding uhi; note in hla sagina a ni sawm ni ahi thoidamna ni-in na gam sung zosie vuah pengkul na gingsah ding uhi. 10A kum sawmngana na siengthosah ding vua, gam sung mun zosie-a teng mi zosie tungah suotahna thu na phuongzah ding uhi. Tua khu note dingin jubilee khat hi ding hi: Na unpi-un na logam ule na inn ciet vuah na kilekia ding uhi. 11Tua kum sawmnga cinna pen note adingin jubilee khat hi ding hi: Lo pawi lo, a lipote la lo, a kiheuh lo lengguite khawm loin na om ding uhi. 12Bangzieh ahei cile tua khu jubilee ahi hi; tua khu note dingin siengtho ding hi: Note in gamlah pana a piengte beh na ne ding uhi
13Tami jubilee kum sungin na neisa uh na logam ciet vuah a koimapo na peikia ding uhi. 14Na vengte kunga na zua cieng ule na vengte kung pana na lei ciengun khatlekhat na kisol sih ding uhi. 15Jubilee zaw ciengin a kum phaza tawh kituohin na vengte tung panin na lei ciengun a zuate in an pieng ding kum phaza tawh kituohin a manh tan ding uhi. 16A kum a tam leh a manh sangsahin, a kum a tawm leh a manh na tawmsah ding uhi; azieh pen an pieng ding kum tawh kituohin na tung vua ang kizua ahi hi. 17Khatlekhat kisoltuoh loin na Pasien uh na giing zaw ding uhi; bangzieh ahei cile keima Topa na Pasien uh ka hi hi.
18Tua leitang tungah lungmuong tahin na ten thei nadingun ka thukhamte zui-in ka biehna ngaina kipte na tang ding uhi. 19Tua leitang in an piengsahin gilva tahin an ne-in, a sungah lungmuong tahin na teng ding uhi. 20Note in lo pawi loin an lah at sih mawh leih a kum sagina kum ciengin bang i ne ta ding vuoi? na ci kha thei ding uhi. 21Keima in kum thum sung khom ding an a pien thei nadingin a kum guhna kumin note dingin ka thupha kang peisah ding hi. 22A kum gietna kumin lo na pawi ciengun anlui na ne ding uhi; antha ang tun nading a kum kuona masang anlui na ne ding uhi. 23Leitang keima-a’ ahi ziehin kumtawnin kizuamang thei lo ding hi; note na hi uleh keima tawh a omton pemta le leitang kawmte na hibo uhi. 24Na leitang neina zosie vuah leitang tatkia thei dingin na bawl ding uhi.
25Na tanaute uh khatpo in a hamsat ziehin a leitang behkhat a zua leh, a tanau a kinaipi pen pa pei-in tua a sanggampa’ zuasa leitang tankia ding hi. 26Tua mipa in a tan ding koima a nei sih a, hizongle ama ang citheikia ciengin a tat nading sum a kicingin ang mukia leh, 27a leitang a zua ni panin a kum phaza kisimin, a zuana pa kungah a piehbe ding teng lekia ding a, tuaci’n a neisate kipiekia ding hi. 28Ahi vangin tuate a ngakia thei nadingin sum a kicinga a nei sih leh, tua a vanzua pen a leipa kungah jubilee dong om ding hi; Jubilee hun ciengin kipiekia-in tua neisa kilekia ding hi.
29Mi khatpo in khuo kulpi sungah tenna inn khat a zua leh, a zua huna kipanin kum khat a cin zaw ciengin tankia thei ding hi; tatkia theina ding hun pen kum khat sung hi ding hi. 30Kum khatbih a cin zaw masangin tua inn a kitat zawh sih leh, tua khuo kulpi sunga om inn pen a khan tawntunga a nei den dingin a leipa kungah kipie ding hi; Jubilee ciengin tuate kipiekia lo ding hi. 31Ahi vangin kul a nei lo a kimvela khuota innte ahileh, gamlaha lote tawh kibangin kiciemte ding hi; tuate kitanthei kia-in jubilee hun sungin kipiekia ding hi. 32Levi-te’ nei khuopite tungtang thu-ah, Levi-te in tua khuopite sunga a nei uh innte a tawntungin tatkia theina thu nei ding uhi. 33Levi-te tung panin tua bang neisate-khuopi khat sunga a nei uh a kizuasa innte kitankia thei ding a- jubilee hun sungin kipekia ding hi; azieh pen Levi-te’ khuopite sunga innte pen Israel mite lahah amate’ neisa ahi hi. 34Ahi vangin a khuopi uh kim gamlaha lote pen kizua thei lo ding hi; azieh pen tuate amau’ nei den ahi hi.
35Hamsatna ziehin na tanau khatpo un note#25:35 Heb ah a khietna kicien lo hi. ang bel leh amate na va ding uhi; amate pen note tawh khuolmi pemta bangin teng ding uhi.#Thkna 15:7-8 36Amate tung panin a met la masa sih unlen, tua ahi sihle a met a khang la loin na Pasien ging zaw un; amate, note lahah tengsah un. 37Amate tungah na sum uh a metin palahsah loin, a metin na an uzong na pie sih ding uhi.#Pei 22:25; Thkna 23:19-20 38Kei pen na Pasien uh ahi ding le note’ tunga Canaan leitang ang pie dingin Egypt pan ang peipi Topa na Pasien uh ka hi hi.
39No ang belte lahah mite in a zawn ziehin na tung vua ang kizua uleh, silate bangin amate na bawl sih ding uhi. 40Amate pen a kiciel nasemte ahi sihle a kihen nasemte bangin note tawh omden ding uhi. Jubilee kum masangin amate in na na uh a sem ding uhi. 41Tua ciengin na khut sung panun a tate utawh amate a suohta ding uhi; a inn uh lam zuonin a peikia ding vua, a pu a pa’ gamah a kilekia ding uhi. 42Azieh pen Egypt gam pana ka peipi amate pen keima’ nasemte ahi uhi; silate kizua bangin amate kizua lo ding hi. 43Pauhat thu tawh amate na uh sih ding vua, na Pasien uh na giingzaw ding uhi. 44Note’ nei thei ding sila numeite le sila pasalte tam bang ahi hi: Na kimvel vua a om minamte lah panin sila numeite le sila pasalte na lei thei ding uhi. 45Note tawh a tengton pemtate lah pan le na gam sung vua a suoh note tawh a tengton amau’ innkuon lah panin na lei thei ding uhi; amate pen na neisa uh a suoh thei ding hi. 46Na nua cieng vua na tate uh’ nei le luo dingin amate na koi thei ding uhi. Silate bangin amate na bawl thei ding vua, ahi vangin na sanggamte uh Israel-te ahile, mi koima in adang khat tungah ngongtatna tawh uh lo ding hi.#Pei 21:2-6; Thkna 15:12-18
47Note lahah khuolmi pemta khat ang cithei a, na tanaute un hamsatna tuohin tua pemta pa kungah amau le amau a kizua vua, ahi sihle tua pemta pa’ innkuon khatpo tungah a kizua uleh, 48amau le amau a kizua zawciengun a kitatkia theina ding thu nei ding uhi; amau’ sanggamte khatpo in amate tankia thei ding a, 49ahi sihle amau’ pano ahi sihle amau’ pano’ tapa amate tankia thei ding a, ahi sihle amau’ innkuon sunga si le sa-a a kinaipi uh khatpo in amate tan thei ding hi; ahi sihle a cithei vua ahile amau le amau zong kitan thei ding hi. 50Tua pemta pa tunga amate a kizua kum panin jubilee kum dong a kum teng zosie a unpi-in a leipa tawh tuot ding uhi; a kizua manh pen a kum phaza tawh kituot ding hi: A neipa tawh a omton hun sung teng pen a kiciel nasem khat’ thaman tawh a kikimin kise ding hi. 51Kum tampi a sap lai leh a kileina manh tawh kituohin amau’ kitatna pie ding uhi; 52tuale Jubilee kum masang kum tawmno in a sap lai leh tam bangin tuot ding uhi: Amate in nasep kum kisam dung zui-in amau’ kitat manh pie ding uhi. 53Amate pen a kumkumin a kicieltawm nasem khat bangin tua pa’ thuneina sungah a om ding vua, ahi zongin ama in note’ muna-ah amate gamtahin uh lo ding hi. 54Tam dan teng lahah khat penpen tawh amate a kitat sih leh, Jubilee hun ciengin amate le a ompi a tate utawh a suohta ding uhi. 55Bang ding ahei cile Israel mite pen kei adingin ka nasemte ahi uhi; amate pen keima in Egypt leitang pana ka peitopi ka nasemte ahi uhi: Keima Topa na Pasien uh ka hi hi.
Currently Selected:
SIEMPU LAIBU 25: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
