JAMES 2
2
Mi Deidan lo ding Hilkholna
1Ka sanggamte aw, na mi deidan kawmpi ma-un a minthang i Topa Jesu a um tahtah ma na hi uh amah? 2Azieh pen na kikhopna sung vuah kham khutsip bun puonhoi sil khat le mizawng puonsie sil khat ang peiton uleh, 3puonhoi sil pa limbawl deu-in, “Tana tona ah hing to in,” na ci vua, tua laitahin mizawng pa kungah “Tuanah na ding phot in,” ahi sihle, “Ka keng#2:3 Gk “Ka keng ngapna nei-ah hing to in “ gei-ah hing to in,” na tuomci uleh, 4no le no sungah kideidanna bawl na hi vua, tuaci’n note pen gitlona lungsim tawh thukhente suoh hi ta lo na hi uh amah? 5Kang it sanggamte aw, ngai un. Pasien in leitungah mizawngte pen upna lamah a hau ding le ama a it mite tunga a kamciemsa kumpi gam a luote ahi dingin teel zo hi lo amah? 6Ahi vangin note in mizawngte na simmaw bawl uhi. No ang gawtte, mihaute hi lo uh amah? Thukhenna zumah ang kaite zong amate hi lo uh amah? 7Note ang kiphuo min ngaipen a gensiete zong amate ma hi lo uh amah?
8Lai Siengtho sungah “Nangma na ki-it bangin na vengte na it ding hi,” a ci dung zui-in thukham lienpi na zui zo tahpi uleh a hoi sep na hi ta uhi.#Siem 19:18 9Ahi vangin note in deidanna na nei uleh mawna bawl na hi vua, thukham palsatte ma bangin note zong thukham in maw ang tangsah hi. 10Bangzieh ahei cile mi khat in thukham zosie a zui sieng vangin khat a zuila leh a unpi-in a khiel ma hi veve hi. 11Azieh pen, “Ang kawm sin,” a ci mipa in, “Tuol that sin,” zong ci hi. Ang na kawm sih vangin tuol na tha leh thukham palsat khat ma na hi veve hi.#Pei 20:13-14; Thkna 5:17-18 12Tuaci’n suotahna thukham in thu a khen ding mite bangin thu genin gamta un. 13Azieh pen khuotuona a nei lo mi poma tungah khuotuona om loin thu kikhen ding hi; khuotuona in thukhenna tungah a guolzo hi.
Sepna Omlo Upna a Si hi.
14Ka sanggamte aw, mi khat in upna ka nei hi, a ci vangin gamtatna tawh a lah sih leh bang phattuomna om ding ahei? Upna in ang hundam zo ding amah? 15Sanggam pa khat ahi sihle sanggam nu khat in sil ding puon nei loin nisiel a neh ding an tasam a, 16tuale note khatpo in amau’ pumpi kitasapna bangma pie lo pi-in amate kungah, “Nuom tahin na pei un; na khuo uh lumin na gilva un,” mawh ci locin bang phattuomna om ding ahei? 17Tuaci’n gamtatna a nei lo upna guoh pen a si ahi hi.
18Hinanle mi pawlkhatte in, “Nang in upna na nei a, ke’n gamtatna ka nei hi,” ci ding uhi. Na gamtatna in a zui lo na upna ei lah inlen, ke’n ka gamtatna tawh ka upna kang lah ding hi. 19Pasien khat beh om hi, ci na um uhi; na hoi sep hi. Dawite nangawn in umin zau-in a ling uhi. 20Nang mimaw pa aw, gamtatna in a zui lo upna a si ahi lam ang kilah ding na dei ei mah? 21I pupi uh ahi Abraham in maitam tungah a tapa Isaac a na pieh lai-in gamtatna tawh dih na tang hi lo amah?#Pien 22:1-14 22Upna in a gamtatna tawh na semton a, gamtatna in upna kicingsah hi, ci note in na thei uhi. 23Tua ahi ziehin Lai Siengtho sungah, “Abraham in Pasien um a, tua khu ama tungah dihna-in a kisimpieh hi,” a ci thu ang tangtung ta a, ama pen Pasien’ lawmpa kici hi.#Pien 15:6; 2Khg 20:7; Isa 41:8 24Upna beh tawh hi loin gamtatna tawh mi khat dih kitangsah hi, ci thu note in na thei uhi. 25Tua ma bangin numei pahtat Rahab in zong thukante zin tungsahin lampi dang khatah a sawlkhiet hun lai-in, a gamtatna ziehin dih kitangsah hi lo amah?#Josh 2:1-21 26Azieh pen hlagau om lo pumpi a si ahi ma bangin gamtatna om lo upna zong a si ahi hi.
Currently Selected:
JAMES 2: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
