DANIEL 11
11
1Kei ka hile Mede mi Darius a kum khatna kumin ama panpi dingin ka ding a, ama ka thakhausah hi.
2“Tu-in nangma kungah thuman kang tangko ding hi. Persia gamah kumpi thum khang lai ding hi. A lina pen tuate zosie sangin hauzaw ding a, a hauna huvangin a thahat ciengin ama in Greek kumpi gam langpang dingin mi zosie a holtuo ding hi. 3Tua ciengin galhang kumpi khat khang ding a, ama in thuneina aana tawh uhin a nop bangbangin gamta ding hi. 4Ama a vangliet laitahin a kumpi gam kehin leimong li lam manaw-in kikhenkhe ding a, ahi vangin ama’ suonlehlahte in vai a hawm nawn sih ding a, aana tawh a vaihawm lai a bang nawn sih ding hi; bangzieh ahei cile a kumpi gam kiphungkal ding a, tam mite simlo midangte kipie ding hi.
5“Tua ciengin leitaw lam kumpipa thahat ding a, ahi vangin a uliente lahah khat pen ama sangin thahatzaw-in ama’ gam sanga a golzaw gam khat a uh ding hi. 6Kum phabep khat zaw ciengin amate in kipawltonna a bawl ding vua, leilu lam kumpipa kungah thukimna bawl dingin leitaw lam kumpipa’ tanu a pei ding hi. Ahi vangin tua nu in a aana a tusuoh zo sih ding a, a suonlehlahte zong a kip sih ding hi. A cingte, a tapa le a panpite tawh tua nu kithat ding hi.
“Khum hun sung tengin 7tua pa munah tua nu’ gui panin a ba khat a khang ding hi. Galkapte sim dingin ama kuon ding a, leilu lam kumpipa’ kulpi-ah lutin amate simin a zo ding hi. 8Ama in a pasien-te uh nangawn, a milimte uh, ngun le kham tawh a kibawl a vanzah manpha teng utawh, Egypt gamah puomang ding a, ama in bakhat sung leilu lam kumpipa a do ding a ki-ip ding hi. 9Tua ciengin leilu lam kumpipa in leitaw lam kumpipa’ gam sim ding a, ahi vangin ama’ gamah a kilekia ding hi.
10“A tate in gal a bawl ding vua, galkap tampitah kaikhawmin tuikhang bangin kuonin a kansan ding vua, a kulpi dongah gal kidona a om ding hi. 11Leitaw lam kumpipa a lungthahsa-in kuonin leilu lam kumpipa a sim ding hi. Leilu lam kumpipa in galkap tampi a khop vangin leitaw lam kumpipa’ galkapte in a zo ding uhi. 12Galkap honpite a kipeipi ciengin a lungsim kiliensahin tulsawm tulza simin thatgam ding a, ahi vangin a zo tuom sih ding hi. 13Bangzieh ahei cile leilu lam kumpipa in a masa sanga a tamzaw galkap honpi khonkia-in kum phabep#11:13 Heb “tuale kumte hunte a tawp ciengin” khat zaw ciengin neh le tah kicingin galkap tampi tawh a kuonsuh ding hi.
14“Khum hun ciengin mi tampi in leitaw lam kumpipa a sim ding uhi. Na mite lahah a mottat mite in tua mangmuna a tangtun nadingin a sim ding vua, ahi vangin amate in gal a lel ding uhi. 15Tua ciengin leilu lam kumpipa kuonin khuopi imtawmna lei sungvum ding a, kul tawh ki-im khuopi a la ding hi. Leitaw lam galkapte in a nang zo sih ding vua, a teeltuom a galkapte nangawn in zong a nang zo sih ding uhi, azieh pen amate in nan zawh nading tha a nei sih ding uhi. 16Ahi vangin ama sim dinga a kuon pa in a dei bangin bawl ding a, koima in ama nang zo lo ding hi. Ama in gam nuom-ah panmun la ding a, tua gam teng zosie ama’ thuneina sungah om ding uhi. 17A kumpi gambup’ tha tawh ama kuon ding a, kilem nading thute#11:17 Gk: Heb “kumpi gam, le ama tawh thuman mipa khat” puo-in tuate sep sawm ding hi. Tua kumpi gam#11:17 Gk: Heb “”tua” a suhsiet thei nadingin numei khat tawh ama kinungsah ding hi; ahi vangin a gelna muolsuo zo loin a phattuompi sih ding hi. 18Tua zaw ciengin ama tuipi pang gam tengah kihei-in gam tampitah a zo ding hi. Ahi vangin galkapmang khat in a mi thusimlona teng maimangsah ding hi; a tahtahin#11:18 Heb ah a khietna kicien lo hi. mi thusim lona teng ama tungah a tusahkia ding hi. 19Tua ciengin ama a gam sunga kulpite lam manaw-in kilekia ding a, ahi vangin ama kipalpua-in a kimu zo nawn sih ding hi.
20“Tua ciengin ama’ munah mi khat khangin tua pa in a kumpi gam thupi nadingin ulien khat a sawl ding hi; ahi vangin ni tomkal sungin lungthahna le gal kidona zieh hi loin ama kisugam ding hi. 21Ama’ munah kumpi thupina a kipie lo, a simmawhuoi mipa khat khang ding hi; genkhol loin ama kuonin zuouthu tawh kumpi gam a tang ding hi. 22Ama mai-ah galkapte kisumaimang ding a, thuciemna bawl ulienpa zong kisugam ding hi. 23Tuale ama tawh kipawltonna a bawl zaw ciengin ama zuoutatin mi themno khat tawh a thahat ding hi. 24Genkhol loin gam sunga leihoi pen#11:24 Ahi sihle “mihau pente lahah” munah pei-in a pu a pate in a na bawl ngai nai lo silte bawl ding a, galvanlahte, van kitomgamte, le haunate vautahin amate a hawmpieh ding hi. Ama in mun muonhuoite sim sawm ding a, ahi vangin bakhat sung beh hi ding hi. 25Ama in leitaw lam kumpipa sim dingin galkap tampi tawh a hatna le a khensatna satsuo ding a, leitaw lam kumpipa in a tamzaw le a hatzaw galkap tawh na do ding hi. Hinanle ama in a zo sih ding hi, azieh pen kumpi’ an a ne mite in 26ama do ding a sawmdap ding uhi. Amate in ama sugamin ama’ galkapte zong kisumaimang ding a, mi tampitah a si ding uhi. 27Kumpi tegel in a lungsim vuah gitlo ding beh a sawm vua, sabuoi khatah to tonin zuouthu a gen tuoh ding uhi. Ahi vangin a lawcing sih ding hi, azieh pen a kisesa tawpna ding hun tung lai ding hi. 28Ama’ gamah nei le lam tampi tawh kilekia ding a, ahi vangin ama in a lungsimin a siengtho thuciemna langpan ding hi. A nop a thei-in ama gamta-in a gamah kilekia ding hi.
29“A kisesa hun a cin ciengin ama kilekia-in leitaw lamah kuonsuh ding a, hizongle tam hun pen a masalaite tawh kibang lo ding hi. 30Azieh pen ama sim dingin Kittim tembawte pei ding a, tuale ama lungkie-in a kilekia ding hi. Ama kithangpaisah ding a, tuaci’n thuciemna siengtho a lang bawl ding hi. Ama kilekia-in tua thuciemna siengtho a taisante a thupi bawl ding hi. 31Ama’ sawl galkapte in biehinnpi le kulpi la-in a buasah ding uhi. Amate in nisim meihal biehna a khawlsah ding vua, a susie ding sil kidahuoi a koi ding uhi.#Dan 9:27; 12:11; Mat 24:15; Mrk 13:14 32Ama in zuouthu tawh thuciemna palsatte a zawl ding hi; hinanle a pasien uh tunga thuman mite in dingkipin a do ding uhi. 33Mite lahah mipilte in mi tampi tungah theitelna a neisah ding uhi; ahi vangin ni tomkal sungin meikuong le namsau tawh amate a si ding vua, sal dingin kipeipi-in kitomgam ding hi. 34Amate in tua banga a thuoh uh ciengin panpina themkhat beh a nga sam ding vua, mi tampite in lungsim tahtah hi lopi-in amate a pawl ding uhi. 35Tawpna hun a tun masangin amate kisusiengin kisiensuo a,#11:35 Heb “tuate kangsahin” a kisawpsieng thei nadingin mipil kim khat kithat ding hi, azieh pen a kisesa hun a tun masangin a kikalah hun khat a omlai hi.
36“Tua kumpipa a nop bangbangin a gamta ding hi. Ama le ama kitawisangin ama le ama pasien khat popo sangin a lienzaw-in kingaisun ding a, tuaci’n pasien-te’ Pasien langkhatah cizat huoi kam a ham ding hi. Lungthahna hun a bukim masangsie ama a cithei ding hi, azieh pen a kisesa bangin kisem ding hi.#2Thes 2:3-4; Kln 13:5-6 37Ama in a pu a pate’ pasien-te ahi sihle numeite’ deite zatah lo ding hi; ama in pasien dang khat popo zong a zatah sih ding hi, azieh pen tuate zosie sangin ama le ama a lienzaw-in a kingaisun hi. 38Ama in tam teng tangin kulpi cing pasien-te zatahzaw ding a, ngun le kham, suong manphate le letsong mantamte tawh a pu a pate’ na theikhah lo pasien a patawi ding hi. 39Ama in gamdang pasien khat’ panpina tawh kulpidet pente a sim ding hi. Ama in ama a pom mite hausah semsemin mi tampite tungah vaihawmin koi ding a, a man tawh kizui-in leitangte a hawmpieh ding hi.
A Tawpna Hun
40“Hun tawp ni ciengin leitaw lam kumpipa in ama a sim ding hi. Ahi vangin leilu lam kumpipa in sakol leengte, sakol galkapte, le tembaw tampi tawh pumpei bangin a simgawp ding hi. Gamcin teng do dingin ama kuon ding a, tuikhang bangin a nawtsuoh ding hi. 41Gamnuom sungah ama lutin mi tul tampi tahin sina thuoh ding a, ahi vangin ama’ khut sung panin Edom, Moab, le Ammon gam thupi mun teng suohta ding uhi. 42Ama in a khut zahin tua gamte sim ding a, Egypt gam a suohta sih ding hi. 43Kham le ngun ahi goute le Egypt hauna zosie tungah ama vaihawmin pang ding hi; tuale Libya le Ethiopia mite in ama nua a zui ding uhi.#11:43 Ahi sihle “Nubia-te; Heb “Cushte” 44Ahi vangin nisuona lam le leilu lam pana thu kipuohte in ama patausah ding a, mi tampitah a susie ding le a sumaimang dingin thangpaina tawh ama a kuon ding hi. 45Ama in a etlawm muol siengtho le tuipi kikalah a kumpi puonbuhte a sung ding hi. Hinanle koima’ panpi loin ama si ding hi.
Currently Selected:
DANIEL 11: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
