AMOS 5

Israel’ Mawna Zieha Kaala

1Israel innkuonte aw, kaateng lo kawmin na kung vuah kang gen tam thu khu ngai un:

2Israel ngahnu pua a,

a thokia nawn sih hi;

a gam sungah kipampai a,

a phongto ding koima om lo hi.

3Azieh pen Topa Pasien in

tam bangin ci hi:

Mi tulkhat a kuonsah khuopi ah

mi zakhat hing lai ding a,

mi zakhat a kuonsah khuopi ah

mi sawm hing lai ding hi.#5:3 Heb in “Israel innkuonte tungah” belap hi.

4Azieh pen Topa in

Israel innkuon tungah tam bang ci hi:

Keima ei sui unlen hing un;

5hinanle Bethel sui sih unlen,

Gilgal ah lut loin,

Beer-sheba ah zong galkai sih un;

azieh pen salin Gilgal pei valon ding a,

Bethel zong bangma lo a suoh ding hi.

6 Topa sui un, tua hile na hing ding uhi.

na sui sih uleh Joseph innkuon tungah

mei bangin ang kuong ding a,

tua mei in Bethel katumin

koima in a phel zo sih ding hi.

7Thutang lumletin aicim kha suohsah a,

thudih tuol denna a nei note in gimna thuoh man va uciei!

8Bawmluoi le Zawlzawng a bawl,

khuomiel zingmawng a suohsah,

sunlai zan banga a mielsah,

tuipi panin tuite hlanin

lei maitanga tua tuite a sungsuh pa,

ama’ min Topa ahi hi.#Job 9:9; 38:31

9Mihatte suhsiet nadingin mallang mama a,

tuaci’n kulpi tungah sietna a tungsah hi.

10Amate in tunkota thuhil pa a muda vua,

amate in thuman gente a huo uhi.

11Tua ahi zehin mizawngte tuoncilin,

amau kung panin ankaihte na lah ziehun,

suong kilem innte lam nan locin

a sungah na tengkha sih ding uhi;

a dei huoi lengga lote bawl nan locin

lenggazu na dawn kha sih ding uhi.

12Bangzieh ahei cile na khielna za ule

na mawnate uh a liet lam ka thei a,

midihte genthei bawlin guhgol na la vua,

khuopi tunkot ah mi tasamte na sawnpua uhi.

13Tua ahi ziehin tam bang hun ciengin,

mi pilvangte a sip khinkhian ding uhi;

bangzieh ahei cile

tua hun pen hunsie ahi hi.

14Na hin thei nadingun hoina sui un,

gitlona sui sih un;

na gensa bangun Vanglien Topa Pasien in

note ang ompi ding hi.

15Gitlona muda-in thu hoi dei unlen,

khuopi tunkot ah thutang sukip un;

Joseph minam a omlai teng,

Topa, Vanglien Pasien in ang lainat kha thei ding hi.

16Tua ahi ziehin Topa, Vanglien Pasien in tam bangin ci hi:

Khuolai mun-awng zosie ah kaa le mau om ding hi;

amate in lamdung zosie ah,

“Kadeisei! kadeisei!” a ci ding uhi.

Amate in a kap dingin lohlote a ciel ding vua,

a thum a mau dingin kaateng law siemte a ciel ding uhi.

17Na laikim vuah kang kansan ding ziehin,

lengga lo zosie ah kaana le mauna om ding hi,

Topa in ci hi.

Khuomiel Ni khat ahi Topa’ Ni

18Azieh pen Topa’ ni ang tun ding

a lunggul note in gimna na thuoh ding uhi!

Topa’ ni bang dinga na lunggul uh ahei?

Tua ni pen khuomiel hi a, khuovah hi lo hi;

19Humpi kung pana a tai,

vompi khat tawh kituoh

mi khat tawh kibang ding hi;

ahi sihle a inn sungah lutin

kawma khut a ngap ciengin

gul in a tuh mipa tawh kibang ding hi.

20 Topa’ ni pen

khuovah hi loin khuomiel ni hi a,

a sungah a tang a om lo

khuomiel ni hi lo amah?

21Na biehna pawite uh ka muda a, ka thupisim sih hi,

na khawmpi bawlte un ka lung a kimsah sih hi.

22Keima kungah na meihal biehnate ule

an tawh biehnate nang tawi vangun, tuate ka sang sih ding hi;

thunuom biehna dinga nang peipi uh na ganthaute uzong

etin ka nei vet sih ding hi.#Isa 1:11-14

23Na lasah gamlumnate uh khawl un;

na harp lasahna tumgingte uh

ka ngai vawt sih ding hi.

24Thutang, tui bangin luongsah unlen,

dihna, a kang ngai lo luitui bangin luongsah un.

25Israel innkuonte aw, senel gamah kum sawmli na op sungun keima kungah biehpiehnate le biehnate nang tawi uh amah? 26Note in noma dinga na bawltawm uh na kumpipa uh Sakkuth le na aasi-pasien uh ahi na milimte#5:26 Heb “noma’ milimte, noma’ aasi-pasien” uh na puo ding uhi. 27Tua ahi ziehin Damascus galkhatah sal dingin kang kai ding hi, ama’ min Vanglien Pasien Topa in ci hi.#Sawl 7:42-43

Currently Selected:

AMOS 5: ZBOTF01

Highlight

Copy