2 CORINTH 6
6
1Ama tawh na semton ka hi bangun Pasien’ hepina a mawhna-a a sang ka suo lo nadingun kang thum uhi. 2Azieh pen ama in,
“San thei hunin na thu gen uh ka ngai a,
hutdamna ni ciengin note kang hu hi,” a ci hi.
En un, tulaitah pen san thei hun tah ahi hi; tulaitah pen hutdamna ni ahi hi!#Isa 49:8 3Ka nasep vuah khielna a kimu lo nadingin mi khatpo’ lampi-ah pua nading bangma ka koi sih uhi. 4Hizongle ko mama in Pasien’ nasemte ka hina uh sil bangkimah ka kilangsah uhi: thuohzawhna lienpite, genthei liengvainate, hahsatnate, vangsietnate, 5satnate, thongkiehnate, buoinate, na ham sepnate, zanlai-a kimutmaw law nate, le gilkielnate ahi a;#Sawl 16:23 6siengthona, thu theina, lungduoina, migitna, lungsim siengthona, itna tahtah tawh, 7thuman thutah genna le Pasien’ vanglietnate a kipan, zietlam le veilam ading dihna galhiemte tawh, 8patawina le simmawna ahi zongin, gensietna le genphatnate dong ciengah ka langsah uhi. Kote pen mi thumante ka hi vangun zuouthu gente bangin ei kingaisun hi; 9mi zosie in ei theitel vangin koima’ thei lote ka bang uhi; nei thei bangun a hing ka hi vangun a si dihtahte bangin ei kingaisun hi; gawtna dan ka thuoh vangun thalupin ka om sih uhi; 10a date tawh ka kibah vangun ka lungdam zing uhi; a zawng ka bah mawh vangun mi tampi ka hausah uhi; bangma nei lo ka bah vangun na zosie ka nei uhi.
11No Corinth mite kungah siengtahin kang gen zo vua, ka lungsim uh ka golhon uhi. 12Kote’ itna sungah ciengtan bangma a om sih a, noma’ sunga om hizaw hi. 13Kote-a’ bangin a kilawmin nei thuhkiana-un note in zong na lungsim uh golhon un, ci-in tate tunga thugen bangin kang gen hi.
A Nungta Pasien’ Biehinnpi
14Thu um lo mite tawh a kituoh lo hahkol na puoton sih un. Azieh pen dihna le gitlona kikalah bang kipawlna om thei ding ahei? Ahi sihle khuovah le khuomiel kikalah bang kipawlna om thei ding ahei? 15Khris in Beliar tawh bang thukimna nei ahei? Ahi sihle thu um mi khat in thu um lo mi khat tawh bang neiton ahei? 16Pasien’ biehinnpi in milimte tawh bang kithukimna nei ahei? Bangzieh ahei cile eite#6:16 Adang tang laibute ah “note” ci-in kigiel hi. pen a hing zing Pasien’ biehinnpi i hi uhi. Pasien in,
“Amate sungah tengin a lah vuah ka vah ding a,
amau’ Pasien hi-in, amate keima’ mi ahi ding uhi.#1Cor 3:16; 6:19; Siem 26:12; Ezk 37:27
17Tua ziehin amate kung panin hing peikhie unlen,
amate lah panin a tuomin om un, Topa in ci hi.
A sieng lo poma tham kha sih un,
tua hile keima in note kang sang ding hi.#Isa 52:11
18Keima na pa uh kang hi ding a,
note zong keima’ tapate le tanute na hi ding uhi,”
Vanglien Topa in ci hi.#2Sam 7:14; 1Khg 17:13; Isa 43:6; Jer 31:9
Currently Selected:
2 CORINTH 6: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
