2 CORINTH 5

1Azieh pen i tenna uh leisiet puonbuh a kisiet a ahile khut tawh a kibawl lo, Pasien in a bawlsa kumtawn inn khat vantungah i nei lamtah i thei uhi. 2Bangzieh ahei i cile vantunga i ten nading mun ei kisilsah ding kal ngahla-in tami puonbuh ah khuisa-in i tau vangut uhi. 3Eite in tuami i sil tahtah ciengin guohtanga om bangin ei kimu nawn sih ding hi. 4Azieh pen tami puonbuh sungah i op laitahin eite in vagih puo-in khuisa-in i tau vangut uhi, tua pen eite in puon i sil nuom lo zieh uh ahi sih a, puon ei kisebe ding i nop zieh ule hinna in a si thei pumpi a valtum ding i nop zieh uh hizaw hi. 5Tami thu ei na bawlkholpieh pa pen khamkholna van dinga Hlagau ei pie Pasien ahi hi.

6Tuaci’n eite i hi leh lungmuongtahin i om zing uhi; i pumpi sunga i op laisie Topa tawh i kigamla hi, ci i thei uhi. 7Bangzieh ahei cile muna tawh hi loin upna tawh i kalsuon uhi. 8Hi hi, eite lungmuongtahin i om vua, pumpi tawh kigamla-in Topa tawh opton ding i nuomzaw uhi. 9Tuaci’n eite in inn ah i om a, a gamla-ah i om zongin, ama lungdamsah ding tup penin i nei uhi. 10Bangzieh ahei cile Khris’ thukhenna topha mai-ah eite zosie i unpi-un i kilaa valon ding vua, tuaci’n i pumpi-a i bawlsa i gamtatna utawh kizui-in a sie ahi a, a pha ahi zongin a nga ciet ding i hi hi.#Rom 14:10

Kilemkiana Nasep

11Tua ahi ziehin kote in Topa zatah dan ding ka thei ziehun midangte zawl ding ka hakat uhi; ahi vangin Pasien in koma mama ei theitel a, note in zong a sie le a pha na theina lungsim sung vuah ei theitel dingin kang lamen uhi. 12Note mai-ah ko le ko a kiphattawm kia ka hi sih vua, a lungsim tawng uh ahi lo, a putham a kisahtheipi mite na dawnkia thei nading ule kote zieha na kisahthei nading uh hizaw hi. 13Azieh pen ka mot uleh Pasien ading hi a, ka pil ule zong note ading ahi hi. 14Bangzieh ahei cile mi zosie adingin mi khat si zo hi, ci thu thei ka hi ziehun tua Khris’ itna in kote ei thuzaw hi; tua ahi ziehin mi zosie a si uhi. 15Tuale ama pen mi zosie adinga ang si ahi a, tua ahi ziehin a hing tasunte zong amau’ adinga a hing hi nawn loin, amau’ adingin si-in a thokiasah pa adinga hing ahi zaw uhi.

16Tua ahi ziehin tu-a kipanin kote in mihing mudan#5:16 Gk “cilesa mudan” tawh koima ka mu nawn sih uhi; hun khat lai-in mihing mudan#5:16 Gk “cilesa mudan” tawh Khris ka na thei ngai vangun, tua bang danin ama ka thei nawn sih uhi. 17Tuaci’n mi khatpo Khris sunga a op leh a kisiemtha ahi ta hi: a lui nate zosie mangthai zo hi; en un sil bangkim a tha a suoh zo hi! 18Tami thu zosie pen Khris tungtawnin ama tawh kote ei kilemsahkia Pasien kung pan ahi hi; ama in kote tungah kilemkiana nasep ei pie zo hi. 19Tua pen a deina bang ahei cile Pasien in amau’ thupalsatnate ciemte loin, Khris sungah leitung mite le ama a kilemsahkia a, ama in tua kilemkiana thu a gen dinga kote ei ngansie ahi hi.#5:19 Ahi sihle “Khris sunga om Pasien in leitung mite ama tawh kilemsahkia hi” 20Tuaci’n kote pen Khris adingin palaite ka hi uhi; Pasien tawh na kilem un, ci-in Pasien in kote tungtawnin ang thum ma bangin kote in zong Khris tangin kang thum uhi. 21Ama sungah Pasien’ dihna ka tan thei nadingun, mawna a thei lo pa pen kote tang dingin Pasien in mawnei mi a suohsah hi.

Currently Selected:

2 CORINTH 5: ZBOTF01

Highlight

Copy