2 CORINTH 11

Paul le Sawltahpi Manlo te

1Ka mot opna nengneng teng ei ngaisiem locin ka nuom hi. Ei ngaisiem bo un! 2Note adingin Pasien’ ei deisahna ka nei hi, bangzieh ahei cile keima in pasal khat tawh kinung ngahnu siengtho khat bangin Khris tunga pieh dingin note kang kamciem zo hi. 3Ahi vangin gulpi in a ngienku tawh Eve a na sol bangin Khris tungah a dih le a siengtho#11:3 Adang tang laibute ah “a siengtho” om lo hi. na kipumpiehna panun na ngaisutnate uh na pielsah khah ding uh ka lung a himaw hi.#Pien 3:1-5, 13 4Azieh pen mi khatpo ang pei-in kang hilsa uh ahi lo adang Jesu’ thu ang hil a, ahi sihle note in na ngasa uh ahi lo adang hlagau khat nga-in, ahi sihle na sansa uh lungdamna thu ahi lo adang lungdamna thu khat ang hil ciengin na sang paipai uhi. 5Kote ka hi ule tami a thupi mama sawltahpite sangin a neu zaw-in ka kingaisun tuon vawt sih uhi. 6Thugen lamah ei kicil lo ka hi thei mai ding a, hinanle theina lamah ei kicil lo ka hi sam sih hi; note tungah tam bang ka hina sil bangkimah a kicien sinsenin ka langsah zo uhi.

7Note ang kitawisang nadingin keima le keima kiniemsahin man ngen loin Pasien’ lungdamna thu ka gen ziehin mawna a bawl ka hi amah? 8Na na sem dingin hlattuom pawlpi dangte tung panin huna sang ka hi ziehin amau’ sum a lahpieh ka suoh hi. 9Note tawh omtonin kisapna ka nei ciengin Macedonia gam pana ang pei ka lawmte in ka sapnate ei sih ziehun koima vangih ka suon sih hi. Tuaci’n lam khatpopo-ah note’ vangih ka suo lo nadingin ka kideh a, ka kideh lai ding hi.#Phil 4:15-18 10Keima sungah Khris’ thuman thutah a op ma bangin Achaia gam sung muncin tengah tami ka kisahtheipi pen gen loin ka dai op sih ding hi. 11Tua ahile bangzieh ahei? Ke’n note kang it lo zieh amah? Kang it lam uh Pasien in thei hi.

12Kote tawh a kikim dan a ciemtena a deite’ kisielna ka niel zawh nadingin ke’n zong ka sep pen ma ka semsuoh ding hi. 13Bangzieh ahei cile tua bang mite pen sawltahpi man lote ahi a, amau le amau Khris’ sawltahpi a kipang mi sol nasemte ahi uhi. 14Tua pen lamdang sah ding ahi sih hi! Azieh pen Satan nangawn khuovah vantungmi khat bangin a kipangtawm thei hi. 15Tuaci’n dihna tate bangin ama’ nasemte a kipantawm uleh lamdang sah ding ahi sih hi. Amau’ gamtatna bangin a tawpna-ah a thuoh ding uhi.

Sawltahpi Ahina Tawh Paul’ Thuohnate

16Koima in a maw-in ei ngaisun sih un, ci-in kang genkia hi; hinanle a maw a nei ngaisut uleh tawmkhat beh ka kisiel thei nadingin mimawte bangin ei ngaisunin ei sang veve un. 17Kimuong a, tami ka kisielna tungtanga kang gen ding thute pen Topa’ thuneina tawh ang gen ka hi sih a, mimaw khat banga ang gen ka hizaw hi. 18Mi tampite in leitung ziete#11:18 Gk “cilesa dante” a kisielpi ziehun kei zong ka kisiel ding hi. 19Bangzieh ahei cile nomate na pil ziehun lungdamtahin mimawte na thuoh zo veve uhi. 20Azieh pen mi khat in salin hing bawlin, ahi sihle hing netumin, ahi sihle hing metbawlin, ahi sihle kiliensahin ang pheta beh ciengin zong note in na thuoh zo uhi. 21Tua banga bawl ding lamah kote ka thanem nah mama uhi, ci-in maizum pipi-in kang gen hi!

Ahi vangin mimaw khat bangin thu hing gen leng: Mi khatpo in a kisielpi ngam pen kei zong ka kisielpi ngam hi. 22Amate Hebrew-te ahi uh amah? Kei zong ka hi hi. Amate Israel-te ahi uh amah? Kei zong ka hi hi. Amate Abraham’ suonlehlahte ahi uh amah? Kei zong tua bang ma ka hi hi. 23Amate Khris’ nasemte ahi uh amah? Mimaw khat bangin ham tadi leih, amate sangin ka hoizaw buong sam hi: Amate sangin na ka nahsep zaw a, thong zong ka tamkieh zaw hi. Simzawh lo satna ka thuoh a, tamveipitah sikhielin ka ommun zaw hi.#Sawl 16:23 24Judah-te’ satna sawmli-ah khat a kiemin ngavei tah ka thuoh hi.#Thkna 25:3 25Ciengpum tawh thumvei ei kisat a, khatvei suong tawh ei kisep hi. Tembaw kisietna thumvei ka tuoh ngai hi; sun khat le zan khat tuipi tungah ka om ngai hi;#Sawl 16:22; 14:19 26khuol ka zin munnate-ah keima in guntui khang panin zauhuoina, misuomte tung panin zauhuoina, ka mipite tung panin zauhuoina, Gentile-te tung panin zauhuoina, khuopi sunga zauhuoina, gamlaha zauhuoina, tuipi tunga zauhuoinate a kipanin sanggam man lote tung panin zauhuoinate ka tuoh a,#Sawl 9:23; 14:5 27nasep gimin hamsatna sungah omin, zan lai-in tamveipi tah kimu maw liengin ka om hi. Tuale gilkielna le dangtana a kipanin neh ding nei loin tamveipi ka om a, puon sil ding nei loin damsi-in ka om ngitnget hi. 28Thudangte banah hlattuom pawlpi zosiete ading lunghimaw-in ka lunggimpi lai hi. 29Ka thanempi lo koi om ahei? Ka lungkhampi lo-a mawna sunga kipuasah koi om ahei?

30Kisiel lo phamaw ding ahile ka thanemna ei kilangsah nate ma ka kisielpi ding hi. 31Pasien le Topa Jesu’ Pa (ama in thupha nga tawntung taheh!) in ka zuou lo lamtah thei hi. 32Keima ei mat thei nadingin Damascus khuo Kumpi Aretas’ khut nei-a om gam-uhpa in Damascus khuopi a cingsah hi. 33Hizongle seu khat sungah ei kikoi-in kul kotneu vang panin ei kikhiesuh a, ama’ khut sung panin ka suohta hi.#Sawl 9:23-25

Currently Selected:

2 CORINTH 11: ZBOTF01

Highlight

Copy