1 THESSALONICA 2
2
Thessalonica Khuo-a Paul Nasepna
1Sanggamte aw, na kung vua kang hawna thu a mawhna suoh lo ding hi, ci pen no mama in na thei uhi. 2Hizongle na theisa ma bangun Philippi khuo ah gimna thuohin zumhuoi tahin ei kibawlsie a, langpanna nasie tahin a op vangin, na kung vuah Pasien’ lungdamna thu a gen dingin i Pasien sungah hansanna ka nei uhi.#Sawl 16:19-24; 17:1-9 3Bang ding ahei cile kote in kang ngetna uh pen zuouthu le ngimna sieng lo pan hi loin, sol bawla zawl ang sawm zong ka hi sih vua, 4lungdamna thu a gen dinga Pasien in ei thukimpisa ka hi ma bangun, thu gen nan uleng zong mite lungkim nading hi loin, ka lungtang uh ei sittel Pasien lungdam nadinga a gen ka hizaw uhi. 5Na thei ma bangun phatna kamteng tawh hitale kote’ phattuom nading ngaisutna tawh hitale kang pei ngai lo lam uh Pasien ka teci uh ahi hi; 6-7Khris’ sawltahpite bangin thu khatpopo kang kalh thei vangun note tung pan ahi a, midangte tung pan ahi zongin phatna ka sui sih uhi. Tuale mahin nupi naukem khat in a tate nunnemtahin a zen a khoi bangin note lahah ka nunnem#2:6-7 Adang tang laibute ah “nausente” ci-in kigiel hi. uhi. 8Tuaci’n note kang nah it seng ziehun Pasien’ lungdamna thu beh hi loin, ka hinna mama uzong hop dingin ka khensat va-ia uhi, bangzieh ahei cile ko tungah na it huoi mama uhi.
9Sanggamte aw, na tung vuah Pasien’ lungdamna thu kang hil lai-un, koima’ vangih ka suo lo nadingun sun le zanin gimpipi-a na ka sep lam na thei uhi. 10No thu um mite tungah ka gamtatna uh bangza-in siengtho-in dih a, mawsah nading om lo hi, ci thu Pasien zong teci ahi hi. 11Pa in a tate a bawl bangin note khat ciet kang bawlna na thei ma bangun, 12ama’ gam le a minthanna sungah ang hlanpa Pasien’ deina tawh kituoha na nuntah thei nadingun kang kunkun vua, hanthawnin zong kang thum uhi.
13Note in ko kung pana na zah uh Pasien’ thu na san lai-un, mihingte thugen bang hi loin, no thu um mite sungah zong na a sem Pasien’ thu bang lienin note in pom na hi ziehun kote in zong Pasien tungah nuomthu ka tut zing uhi. 14Bangzieh ahei cile sanggamte aw, note na hi ule Judea gam sunga om, Khris Jesu sunga Pasien’ hlattuom pawlpite’ ette na suoh uhi, azieh pen amate in Jew mite’ bawlsietna a thuoh ma bangun note in zong na mipite’ bawlsietna na thuoh uhi.#Sawl 17:5 15Tuale amate in Topa Jesu le kamsangte#2:15 Adang tang laibute ah “amau’ kamsangte” ci-in kigiel hi. thatin ko zong ei delmang uhi; amate in Pasien lungkimsah loin mi zosie a langbawl vua,#Sawl 9:23, 29; 13:45, 50; 14:2, 5, 19; 17:5, 13; 18:12 16Gentile-te hutdam nadinga amate kunga ka thu hil ding uh zong ei kham uhi. Tua bangin amate in a mawnate uh a dim zing uhi; ahi vangin a tawpna ah Pasien’ thangpaina in amate a nuaphah veve hi.#2:16 Ahi sihle “a unpi-in” ahi sihle “a tawntungin”
Thessalonica-te Kunga Paul a Hawkia Nopna
17Sanggamte aw, kote ka hi ule note tawh, lungtang tawh hi loin tahsa pumpi tawh, bakhat sung i kikhen sungin taga banga nei opsah ciengun kimaituo-a i kimu ding nahpi tahin ka lunggul mama uhi. 18Na kung vuah hing haw nuom ka hi ziehun, keima Paul in ka sawm zelzel a, hizongle Satan in ka lampi uh ei khahtan hi. 19Bangzieh ahei cile i Topa Jesu Khris ang pei ciengin ama mai-ah ka lametna uh, ka kipahna ule ka kisielpi ding uh lukhu bang hi mawh ahei? Note hi lo na hi uh amah? 20Hi hi, note pen ka minthanna ule ka kipahna na hi uhi.
Currently Selected:
1 THESSALONICA 2: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
