भजनमैं 77
77
दुःख योंबै त्हेर ङइ प्रभु म्हैम्
क्वे प्रिंब्मैंए चिब यदूतूनए#१ इति १६:४१,४२; २५:३-६ ल्हागिर, आसापए भजन घ्रि।
1थेबै कैले ङइ परमेश्वरने ग्वार ह्रिम्,
खीजी थेरिगे बिसि ङइ थेबै कैले ओरम्।
2दुःख योंबै त्हेर ङइ प्रभु म्हैम्;
ङइ आनारल्ले म्हुँइँस तिमिंन् ङए यो स्योंइ;
परमेश्वरजी आल्होमिंन् समा ङ छिं आङ्हाँ।
3परमेश्वर मैंमा ङइ न्हुँ लसि सो खुइ लम्;
खीलाइ मैंमा ङए सैं च्योंब् तम्। तिस्याँदे मैंन्
4क्हिजी ङए मि च्युँ ललै आपिं;
ङलाइ थेबै दुःख लमा पोंलै आखाँ।
5ह्याबै त्हिंइमैं, ओंसों ओंनोंबै बर्षमैं,
ङइ मैंम्।
6म्हुँइँसर ङइ ह्रोंसए क्वेमैं मैंइ;
तले जा बिसि ङइ सैंर मैंल।
धै ङए सैंइ चु ताँमैं ङ्योलु-च्युलु लइ:
7“प्रभुजी ङ्योलाइ युगुर्लै वाथेंम् रो वा?
खीजी धबै खोंयोंइ ङ्योए फिर ल्हयो आख रो वा?
8खीए खोंयोंइ आनुबै म्हाँया युगुर्लै खाँयाँइ वा?
खीए बाछा युगुर्लै नुयाइ वा?
9परमेश्वरजी दयाम्हाँया लब म्लेयाइ वा?
ह्रिस खसि तारे खीजी म्हाँया आल रो वा?” बिसि ङइ ङ्योएल। तिस्याँदे मैंन्
10झाइले ताँन् भन्दा थेबै परमेश्वरए क्योलो योर भों आरेन उ? बिब ङइ मैंइ।
चु ताँर ङए सैं च्योंब् तइ।#77:10 हिब्रू क्युइर चु पद स्पष्ट आरे।
11दिलेया याहवेहजी लबै केमैं ङ मैंब्मुँ;
क्ह्रोंसेंन्ले क्हिजी ओंसों ओंनोंन् लबै औदिबै केमैं ङ मैंब्मुँ।
12क्हिजी लबै ताँन् केमैंए बारेर ङइ सैंर मैंब्मुँ,
धै क्हिजी लबै ताँन् शक्तिए केमैंए बारेर ङ बिचार लब्मुँ।
13ओ परमेश्वर, क्हिजी लबै ताँन् केमैं पबित्र मुँ।
ङिए परमेश्वर धों तबै थेबै देवता अरू खाब् मुँ?
14क्हि औदिबै केमैं लबै परमेश्वर ग;
क्हिजी ह्रोंसए शक्ति ह्रें-ह्रेंमैंए म्हाँजोर उँइँमिंइमुँ।
15ह्रोंसए योए भोंइ क्हिजी ह्रोंसए म्हिमैं,
अथवा याकूब नेरो योसेफए सन्तानमैं जोगेमिंइ। तिस्याँदे मैंन्
16ओ परमेश्वर, मा ङ्युँइर्बै क्युइ क्हि म्रोंइ,
क्युइ क्हि म्रोंमा चमैं ङ्हिंयाँइ,
धै थेबै मा ङ्युँइ त्हारइ।
17न्हाम्स्योंमैंइ नाँ युमिंइ;
मु बेल्ले ङ्हेबर होंइ;
मेमैं धोंले क्हिए काम्लि-तिम्लि खोन्तोदोंन् चारबर होंइ।
18नाँ-खैंर मु ङ्हेब् धोंले क्हिए कै तेइ;
क्हिए कम्लि-तिम्लिइ ताँन् ह्युल चारइ;
पृथ्बी ङ्हिंसि त्हारइ।
19क्हिजी डोरेबै घ्याँ मा ङ्युँइए महाँजोर मुँल,
क्हि प्रबै घ्याँ थेबै क्युए महाँजोर मुँल;
दिलेया क्हिए प्हलेए म्है आम्रोंल।
20मोशा नेरो हारूनए योउँइँले
क्हिजी ह्रोंसए म्हिमैं क्युमैंए बगल धोंले डोरेइ।
Currently Selected:
भजनमैं 77: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
