भजनमैं 135
135
याहवेहजी लबै थेब्-थेबै केमैं
1याहवेहए मिं क्वेद्!
याहवेहए मिं थेब् लद्,
ओ याहवेहए सेवा लब्मैं खीए मिं थेब् लद्!
2याहवेहए धिंर
ङ्योए परमेश्वरए धिंर्बै ह्युमैंर राब्मैं#135:2 ङ्योए परमेश्वरए धिंर्बै ह्युमैंर राब्मैं यहूदी खेगिमैं नेरो चमैंने बालु के लबै लेबीमैं खीए मिं क्वेद्।
3याहवेह बेल्ले स्वाब मुँ,
छतसि खीए मिं थेब लद्;
खीजी म्हिमैंए फिर ल्हयो खम्, छतसि खीए मिंर क्वे प्रिंन्।
4तलेबिस्याँ याहवेहजी याकूबलाइ ह्रोंसल् लबर,
धै इस्राएलीमैंलाइ ह्रोंसए म्हिमैं तबर त्हाँइमुँ।#व्य ७:६,७; १०:१५
5याहवेह बेल्ले थेब मुँ,
छतसि ङ्योए प्रभु ताँन् देवतामैं भन्दा थेब मुँ बिसि ङइ सेइमुँ।
6स्वर्गर, पृथ्बीर,
नेरो मा ङ्युँइमैंए गैरु क्ल्ह्योमैंरै या,
याहवेहजी ह्रोंसए सैंर मैंब् धोंले लम्।
7खीजी पृथ्बीए च्होउँइँले न्हाँम्स्यो रेमिंम्,
खीजी नाँने बालु काम्लि-तिम्लि कुल्मिंम्#135:7 हिब्रू: खीजी नाँए ल्हागिर काम्लि-तिम्लि बनेम्
धै खीए भण्डरउँइँले खैं तेमिंम्।
8स्योंम खीजी मिश्रीमैंए ओंसों फिबै च्हमैं,
नेरो ओंसों फिबै खेदोमैं सैवाइ।#प्रस १२:२९
9ओ मिश्र ह्युल, क्हिए ह्युलए म्हाँजोर्न
फारो नेरो चए ताँन् के लब्मैंए उँइँर
खीजी औदिबै चिनु नेरो प्लेटोयाबै केमैं लइ।
10खीजी ल्हें ह्रें-ह्रेंमैं सैवाइ,
भों-भोंबै म्रुँमैं या सैवाइ:
11एमोरीमैंए म्रुँ सिहोन,
नेरो बाशानर्बै म्रुँ ओगलाज्यै या सैवाइ,
धै कनान ह्युलर्बै ताँन् ग्याल्समैं खीजी नास लवाइ।#गन्ती २१:२१-२६,३३-३५; यहो १२:७-२४
12झाइले चमैंए क्ल्ह्यो-न्हेए फिर
खीए म्हिमैं इस्राएलीमैंलाइ क्ल्हे तल् पिंइ।#व्य २९:८
13ओ याहवेह, क्हिए मिं खोंयोंन् बिलै तरिम्,
ओ याहवेह, पुस्ता-पुस्ता समा म्हिमैंइ क्हि मैंरिब्मुँ।
14तलेबिस्याँ याहवेहजी ह्रोंसए म्हिमैंए ठिक निसाफ लब्मुँ,
धै ह्रोंसए सेवा लब्मैंए फिर ल्हयो खब्मुँ।
15अरू ह्रेंमैंए कुमैं मारा नेरो चाँदिउँइँले
म्हिमैंए योइन बनेब् ग।
16चमैंल सुँ मुँ, दिलेया पोंल् आखाँ;
मि मुँ, दिलेया म्रोंल् आखाँ;
17न्ह मुँ, दिलेया थेल् आखाँ,
चमैंइ सो आसें।
18छाबै सैमैं बनेब्मैं या छाबन् तब्मुँ,
धै कुमैंए फिर भर थेंब्मैं या कुमैं धोंन् तब्मुँ।#भज ११५:४-८; दर्शन ९:२०
19ओ इस्राएलए सन्तानमैं, याहवेहए मिं थेब् लद्!
ओ हारूनए सन्तानमैं, याहवेहए मिं थेब् लद्!
20ओ लेबीए सन्तानमैं, याहवेहए मिं थेब् लद्!
ओ याहवेहलाइ मान लब्मैं, याहवेहए मिं थेब् लद्!
21सियोनर टिब्मैं याहवेहए मिं थेब् लद्,
यरूशलेमर टिबै याहवेहए मिं थेब् लद्।
याहवेहए मिं क्वेद्!
Currently Selected:
भजनमैं 135: GCMB
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
