प्रस्थान 16
16
मन्न बिबै चबै सै नेरो बट्टे बिबै नेमेंमैं
1इस्राएलीमैं एलीमउँइँले प्रसि मिश्रउँइँले प्रबै म्हैंन ङ्हिंए च्युसे ङ्हगैंर एलीम नेरो सिनै बिबै कोंए म्हाँजोर मुँबै तोइ आरेबै सिनै बिबै क्ल्ह्योर फेखइ। 2चर फेखमा ताँन् म्हिमैं मोशा नेरो हारूनने गनगन लबर होंइ। 3इस्राएलीमैंइ चमैंने बिइ, “ङि मिश्रर याहवेहए योउँइँले सिस्याँ छ्याँब तमल। तलेबिस्याँ ङि चर ह्योबै भाँडोए कारग्युले क्हुँसि से नेरो अरू चबै सैमैं म्रेंन्ले चल् योंमल। दिलेया क्हेमैंइ ङि ताँन् फोतेंन् सैबर क्यु आयोंबै क्ल्ह्योर पखइमुँ।”
4छबिमा याहवेहजी मोशाने बिइ, “क्हेमैंए ल्हागिर ङइ स्वर्गउँइँले क्हें कुल्मिंब्मुँ। म्हिमैं त्हिंइ ह्रोंसे बैरु ह्यासि तिगैंर्बै छो योल्ले मत्त्रे खुरिगे। ङइ बिबै ताँ चमैंइ ङिमना उ आङिंमना बिसि ङइ जाँच लब्मुँ।#यूह ६:३१ 5तेल् उँइँ खुब् भन्दा ट्हुगैंर चमैंइ ङ्हिछो तल्ले खुसि छेनाले थेंरिगे।”
6छतसि मोशा नेरो हारूनइ ताँन् इस्राएलीमैंने बिइ, “याहवेहजीन् क्हेमैंलाइ मिश्रउँइँले तेइ पखब् ग बिसि क्हेमैंइ तिंयाँबै ङेसर था सेब्मुँ, 7प्हँना न्हाँगर क्हेमैंइ याहवेहए चारबै ह्वे म्रोंब्मुँ, क्हेमैंइ याहवेहए बिरोधर गनगन लब खीजी थेइमुँ। ङि खाब् जा क्हेमैं ङिए बिरोधर गनगन लब? ङिम् खीजी बिब् धोंले प्रब्मैं मत्त्रे ग्।” 8धबै मोशाइ बिइ, “याहवेहजी क्हेमैंलाइ ङेसर चबर से नेरो न्हाँगर म्रेंनाले क्हें पिंब्मुँ, तलेबिस्याँ क्हेमैंइ खीए बिरोधर गनगन लब खीजी थेइमुँ। ङि खाब् रो? क्हेमैंए चु गनगन ङिए बिरोधर आङिं, याहवेहए बिरोधर तइमुँ।”
9झाइले मोशाइ हारूनने बिइ, “इस्राएलर्बै ताँन् म्हिमैंने छ बिद्, ‘याहवेहए उँइँर खो, तलेबिस्याँ क्हेमैंइ लबै गनगन खीजी थेइमुँ।’” 10झाइले इस्राएलर्बै ताँन् म्हिमैंने हारून छले पोंमा चमैंइ क्यु आयोंबै क्ल्ह्योउँइँ ङ्ह्योइ। छले ङ्ह्योमा न्हँम्स्योर याहवेहए चारबै ह्वे म्रोंइ। 11याहवेहजी मोशाने बिइ, 12“इस्राएलीमैं गन गन लब ङइ थेइमुँ। क्हेमैंइ ङेसर से चल् योंब्मुँ, धै न्हाँगर क्हें म्रेंन्ले चल् योंब्मुँ। छले चल् योंमा ङ क्हेमैंए याहवेह परमेश्वर ग बिसि क्हेमैंइ सेब्मुँ।”
13च लिउँइँ ङेसर बट्टाइ नेमेमैं खसि चमैं टिबै ब्यारेक हुवाइ, धै न्हाँगर च ब्यारेकए कारग्युले शीत युरिइ। 14च शीत कारसि ह्रुइ धोंबै चबै सै तइ। 15इस्राएलीमैंइ च म्रोंसि खेंमैंए न्होंरि “चु सै तो जा?” बिबर होंइ, तलेबिस्याँ चमैंइ च सै तो जा बिसि आसेल।
छतमा मोशाइ चमैंने बिइ, “चु याहवेहजी क्हेमैंए ल्हागिर पिंबै क्हें ग।#१ कोर १०:३ 16याहवेहजी ‘क्हेमैं ताँनइ ह्रोंसइ कति चमुँ च्हग खुद्,’ बिइमुँ। ‘परवार्बै म्हि घ्रिए ल्हागिर म्हन् ङ्हिंए दरइ खुद्।’”
17इस्राएलीमैं छान् लइ, कोइइ ल्हें, कोइइ च्युगुदे खुइ। 18चमैंइ च चबै सै क्होंइँमा ल्हें खुब्मैंला ल्हें आत, च्युगुदे खुब्मैंलैया च्युगुदे आत। चमैं ताँनइ ह्रोंसइ चल् खाँब्दे खुइ।#२ कोर ८:१५ 19मोशाइ चमैंने बिइ, “खाबज्यै या च्हौदे ङैसि प्हँन्हाँग्धों समा आथेंन्।” 20दिलेया चमैं न्होंरि को-कोइइ मोशाए ताँ सैंर आथे, छतमा चमैंइ ह्रोंसइ चसि ङैब प्हँन्हाँग्धों समा थेंमा चर प्हुँलुँ तसि थाँ नाँबर होंइ। छाब् म्रोंसि मोशा चमैंने ह्रिस खइ। 21छले न्हाँग ह्रोंसे चमैं ताँनइ खेंमैंइ चल् खाँब्दे खुइ, त्हिंयाँ चर्केबै लिउँइँ च क्हें युलियामल।
22ट्हुगैंर चमैंइ म्हि घ्रिए ल्हागिर सोदाजरे भन्दा ङ्हिछो तल्ले म्हन् प्लि खुमल। छलमा चमैं न्होंर्बै चिब्मैं खसि च ताँए बारेर मोशाने ङ्योएइ। 23झाइले मोशाइ चमैंने बिइ, “याहवेहजी लद् बिबै ताँ चुन् ग: ‘प्हन्हाँग प्रिबै (के आलबै) त्हिंइ ग, याहवेहए ल्हागिर म्हाँदिबै त्हिंइ ग। ह्योल् त्हुबै सैमै ह्योद्, प्लुल् त्हुबै सैमैं प्लुद्। ङैबै सैमैं प्हन्हाँगए ल्हागिर थेंन्।’”#प्रस २०:८-११ 24मोशाइ बिब् धोंले चमैंइ ङैबै क्हें न्हाँग समन् थेंमा थाँ या आनाँ, प्हुँलुँ या आत। 25धै मोशाइ बिइ, “च तिंयाँ चद्, तलेबिस्याँ तिंयाँ याहवेहए ल्हागिर प्रिबै त्हे ग। तिंयाँ क्हेमैंइ च चबै सै सर योंरिब् आरे। 26ट्हुगैं समा क्हेमैंइ च चबै सै खुद्, दिलेया ङिगैंर प्रिबै त्हिंइ ग, छतसि च त्हिंइर क्हेमैंइ तोइ योंरिब् आरे।”
27दिलेया ङिगैंरै या चमैं न्होंर्बै को-कोइ च चबै सै खुबर ह्याइ, दिलेया चमैंइ तोइ आयोंल। 28झाइले याहवेहजी मोशाने बिइ, “क्हेमैंइ खोंयों समा ङइ बिबै ताँमैं आङिं? 29सैंर थेंन्, याहवेहजी क्हेमैंए ल्हागिर प्रिबै त्हिंइ पिंइमुँ। छतसि याहवेहजी क्हेमैंए ल्हागिर ट्हुगैंर ङ्हिरोबै क्हें पिंइमुँ। ङिगैंर क्हेमैं ताँन् खनिर मुँ चर्न टिरिद्, खाबै या ह्रोंसए धिंउँइँले बैरु आह्याद्।” 30छतसि म्हिमैंइ ङिगैंर भों न्हइ।
31इस्राएलीमैंइ च क्हेंए मिं “मन्न”#16:31 मन्न हिब्रू क्युइर “चु सै तो जा?” बिब् धों तल। थेंइ। च धनिया प्लु धों तब तार्ग्या मुँल। धै च क्वे खुदुर बनेबै क्हें धोंले लिंब मुँल।#गन्ती ११:७-८ 32मोशाइ बिइ, “क्हेमैंलाइ मिश्रउँइँले तेइ पखमा क्यु आयोंबै क्ल्ह्योर याहवेहजी क्हेमैंलाइ च चबै सै चल् पिंल। छतसि लिउँइँबै च्ह क्वें-क्वेंमिमैंइ म्रोंरिगे प्हना लिउँइँ समा मन्न ङ्हिम्न थेंन् बिसि खीजी बिइमुँ।” 33च लिउँइँ मोशाइ हारूनने बिइ, “झोंबै भाँडो घ्रि किंसि चर ङ्हिम्ना मन्न झोंसि लिउँइँबै च्ह क्वें-क्वेंमिमैंइ म्रोंबै ल्हागिर तरिगे बिसि याहवेहए ओंसों थेंमिन्।”#हिब्रू ९:४ 34याहवेहजी मोशाने बिब् धोंलेन् च मन्न खोंयोंइ बिले तरिगे बिसि हारूनइ ठिम थेंबै मुदुसए ओंसों मन्न थेंइ। च मन्न यहवेइ फैबै बाछा मुँबै युमा ङ्हि ओंसों थेंइ। 35इस्राएलीमैं कनान ह्युलर फेनेसि टिबै तौदु आतन् समा चमैंइ मन्न चरिइ।#यहो ५:१२ 36(ओमेरे घ्रि, आधा पथि ग।)
Currently Selected:
प्रस्थान 16: GCMB
Highlight
Share
Compare
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
