१ कोरिन्थी 11

1छतसि ख्रीष्‍टजी लब् धोंलेन् ङइ लइमुँ, क्‍हेमैंज्‍यै या ङइ लब् धोंलेन् लद्।#१ कोर ४:१६; फिलि ३:१७

३ परमेश्‍वरए सेवा खैले लब

2ङइ क्‍हेमैंलाइ स्‍याबासि पिंम्, तलेबिस्याँ क्‍हेमैंइ खोंयोंन् बिलै ङलाइन मैंसि ङइ लोमिंब् धोंले लरिइमुँ। 3अझै क्‍हेमैंइ चु ताँ सेरिगे बिब ङए सैं मुँ: ख्रीष्‍ट ताँन् म्हिमैंए क्र ग, झाइले प्युँ प्ह्रेंस्योए क्र ग, परमेश्‍वर ख्रीष्‍टए क्र ग। 4छतसि प्राथना लमा अथवा अगमबाणि पोंमा ह्रोंसए क्र हुबै मुँयुँइ ह्रोंसए क्र [अथवा ख्रीष्‍टए] मान आल। 5छलेन क्र आउल्‍ले प्राथना लब नेरो अगमबाणि पोंबै च्हमिरिइ ह्रोंसए क्र [अथवा ह्रोंसए प्युँए] मान आल, तलेबिस्याँ च च्हमिरिए क्र खोरवाब् धोंन् तम्। 6च्हमिरिमैंइ क्र आउ बिस्‍याँ चइ क्र खोरवालेन् तम्। दिलेया क्र खोरवामा फा पिम् बिस्याँ चइ क्रमुँ कुल् त्‍हुम् 7मुँयुँमैंइ क्र हुल आत, तलेबिस्याँ मुँयुँमैं परमेश्‍वर धों ब्योंब मुँ धै चमैंइ परमेश्‍वरए ङ्‍हो लोंबै के लम्। छलेन च्हमिरिइ ह्रोंसए प्युँए ङ्‍हो लोंबै के लम्।#उत १:२६-२७ 8तलेबिस्याँ मुँयुँ च्हमिरिउँइँले बनेब आङिं, च्हमिरि मुँयुँउँइँले बनेब् ग। 9छलेन मुँयुँ च्हमिरिए ल्हागिर बनेब आङिं, च्हमिरि मुँयुँए ल्हागिर बनेब् ग।#उत २:१८-२३ 10छतसि स्वर्गदूतमैंए#11:10 स्वर्गदूतमैं ग्रिक क्युइरि, स्यार्बोमैं, अथबा चर्च ङ्ह्‍योबर कुल्मिंब्मैं उँइँरि ह्रोंसए प्युँए न्होंर टिइमुँ बिब् उँइँबर च्हमिरिमैंइ क्रमुँइ क्र हुल् त्हुम्। 11दिलेया प्रभुए उँइँर, प्ह्रेंस्यो या ह्रोंसए प्युँए न्होंर टिल् त्हुमुँ, छलेन प्युँ या ह्रोंसए प्ह्रेंस्योए न्होंर टिल् त्हुम्। 12तलेबिस्याँ मुँयुँउँइँले च्हमिरि बनेब् ग, मुँयुँ च्हमिरिइ फिब् ग। चु तोन्दोंरि सै परमेश्‍वरउँइँलेन् तब् ग।

13क्हेमैं ह्रोंसन् बिचार लद्, च्हमिरिइ क्र आउल्‍ले परमेश्‍वरने प्राथना लब ङ्‍हेंम्‍मा? 14मुँयुँमैंइ ह्रिंग्‍यो क्र न्‍हस्‍याँ चए ल्हागिर फापिन् तबै ताँ ग बिसि ह्‍युलर्बै छ्याइ ङ्योलाइ लोमिंम्, आङिं रो वा? 15दिलेया च्हमिरिए क्र ह्रिंग्‍यो मुइबिस्‍याँ च बेल्‍ले ङ्‍हेंम्। तलेबिस्याँ ह्रिंग्‍यो क्र परमेश्‍वरजी चलाइ हुबै ल्हागिर पिंब् ग। 16दिलेया चु ताँए बारेर को-कोइइ तोइ बिदा ङ्हाँम् बिस्‍याँ ङइ चमैंने बिमुँ, ङिए न्होंरि अरू तोइ रोसमैं आरे, परमेश्‍वरए बिश्‍वासीमैं न्‍होंरै या अरू तोइ रोसमैं आरे।

प्रभु भोजए बारेर्बै ताँ

17तारे अरू ताँरै या क्हेमैंइ ठिक के लइ बिसि ङइ बिल् आखाँ, तलेबिस्याँ क्‍हेमैं खागु तसि लल् म्हैबै केर छ्याँब् भन्दा आछ्याँब् त्हेन् तम्। 18ओंसों बिलन् त्हुमा, क्‍हेमैं परमेश्‍वरए सेवार खागु तमा ह्रों-ह्रोंसए न्‍होंर्न सैं फो आक्ह्रि रो बिबै ताँ ङइ थेइमुँ। चु ताँए बारेर ङए सैंरै या दे दे छान् ङ्हाँइमुँ। 19(छ्याँब नेरो आछ्याँबै म्‍हि छेनाले सेबै ल्हागिर क्‍हेमैं न्‍होंर आक्ह्रिबै ताँमैं या तलन् त्हुम्।) 20क्‍हेमैं खागु तसि चब् चमा च प्रभु भोजन् आङिं, 21तलेबिस्याँ चब् चबर टिमा क्‍हेमैं ह्रों-ह्रोंसइ पखबै सैमैं चम्, दिलेया तोइ आपखब्मैं बिस्याँ फोत्तेन् तम्, धै कोइ प्हा थुँसि म्हेरम्। 22चब् थुँब् लबै ल्हागिर क्हेमैंए धिं आरे वा? क्‍हेमैंइ परमेश्‍वरए म्हिमैंलाइ तो धोंइ आङ्हाँ वा, धै तोइ आरेब्‍मैंलाइ फा पिन् लब् वा? क्‍हेमैंए सैंर खै ङ्हाँइमुँ? छाबै केए ल्हागिर क्हेमैंइ ठिक लइ बिसि बिब् वा? अँहँ, ङइ तिफुँइ बिल् आखाँ।

प्रभु भोजए बारेर्बै ताँ

23तलेबिस्याँ प्रभुजी ङने लोमिंबै ताँमैंन् क्हेमैंलाज्यै या ङइ लोमिंइमुँ। खीलाइ क्हाबै म्‍हुँइँसर खीजी क्‍हें छेइ, 24झाइले परमेश्‍वरलाइ धन्‍यबाद पिंसि क्‍हें लुँसि छ बिइ, “चु क्‍हें क्‍हेमैंए ल्हागिर ङए ज्यु ग। ङलाइ मैंबै ल्हागिर चब्रें लद्।”

25छलेन क्हें चल् खाँबै लिउँइँ प्रभुजी प्‍हेला छेसि बिइ, “चु प्‍हेला ङए कोर मुँबै छारा बाछा ग। चु बाछार ङए कोइ छाप झोंइमुँ।#11:25 चु बाछार ङए कोइ छाप झोंइमुँ येशूजी बिब, कितबरि सहिछाप झोंसि पक्‍का लब् धोंलेन् चु छारा बाछारै या क्रूसर सिमिंसि खीजी पिंबै कोजी छाप झोंसि पक्‍का लमिंइमुँ। ङ मैंबै ल्हागिर चु क्‍हेमैंइ थुँब्रें लद्।”#प्रस २४:८; यर ३१:३१-३४; प्रस २४:६-८ 26छले चु क्‍हें चमा, चु प्‍हेलाउँइँले थुँमा प्रभु आयुन् समा क्‍हेमैंइ प्रभु सिबै बारेर आगुलाइ उँइँमिंब्रें लब्मुँ।

27छतसि खाबइ आगुए सैं फो नल् लसेया च ताँमैं आक्ह्रिल्‍लेन् चु क्‍हें चमुँ, धै चु प्‍हेलाउँइँले थुँम् बिस्याँ, प्रभुए ज्यु नेरो को तो धोंइ आङ्हाँन्ले चबइले प्रभुए उँइँर च म्‍हि दोषि तब्‍मुँ। 28छतसि ताँन् म्‍हिमैंइ ओंसों “ङ प्रभु भोज चबर लायकबै मुँ उ आरे?” बिसि ह्रोंसइन ह्रोंसलाइ जाँचेरिगे। च लिउँइँ मत्‍त्रे क्‍हें चरिगे धै प्‍हेलाउँइँले थुँरिगे। 29तलेबिस्याँ प्रभुए ज्यु कति थेबै सै जा बिसि छेनाले आक्होल्‍लेन् खाबइ क्‍हें चमुँ, प्‍हेलाउँइँले थुँमुँ चइ ह्रोंसए फिर्न दण्ड पखब्मुँ। 30छेनाले आक्होल्‍ले चबइले क्‍हेमैं न्‍होंरि ल्हें म्‍हिमैं नब छब तइमुँ, धै को-कोइम् सियाइमुँ। 31छतसि “ङ प्रभु भोज चबै लायकबै मुँ उ आरे?” बिसि ह्रोंसइन ह्रोंसलाइ जाँचेसि ङ्योइ प्रभु भोज चस्‍याँ परमेश्‍वरउँइँले ङ्योइ दण्ड योंरिब् आरे। 32दिलेया प्रभुजी ङ्योए निसाफ लमा खीए फिर बिश्‍वास आलब्मैं धोंलेन् ङ्यो या नास आतरिगे बिसि ङ्योलाइ तार झोंम्।

33छतसि ओ ङए अलि-अङाँमैं, प्रभु भोज चबर खागु तमा ताँन् बिश्‍वासीमैं आखन् समा पैंन्। 34बरु क्‍हेमैंइ प्रभु भोज चमा परमेश्‍वरजी दोषि आठर्दिरिगे बिसि क्‍हेमैं न्‍होंरि को-कोइ फो ख्रेंस्‍याँ धिंर्न चद्। अरू ताँमैं ङ क्‍हेमैं ङाँर खसि लस्यो।

Currently Selected:

१ कोरिन्थी 11: GCMB

Highlight

Copy

Compare