ရိမ့ၤ တၢ်ကတိၤဆှၢနုာ်
တၢ်ကတိၤဆှၢနုာ်
စီၤပီလူးအလံာ်ပရၢဆူပှၤရိမ့ၤဖိတဖၣ်အအိၣ်အံၤဘၣ် တၢ်ကွဲးအီၤလၢတၢ်ကတဲာ်ကတီၤကျဲလၢအဝဲကလဲၤအိၣ် သကိးတၢ်အိၣ်ဖှိၣ်လၢဝ့ၢ်ရိမ့ၤအဂီၢ်န့ၣ်လီၤ. အတၢ်ရဲၣ်တၢ်ကျဲၤတခီမ့ၢ်လၢအကမၤတၢ်လၢ ပှၤခရံာ်ဖိဖဲန့ၣ်တဖၣ်အသိးအကျါတစိၢ်တလီၢ်ဝံၤဒီး, ခီဖျိအဝဲသ့ၣ်အတၢ်မၤစၢၤအီၤန့ၣ်ကလဲၤဝဲဆူညါ ဆူကီၢ်စပၤနံန့ၣ်လီၤ. အဝဲကွဲးဖျါထီၣ်အတၢ်နၢ်ပၢၢ်ဘၣ် ဃးပှၤခရံာ်ဖိအတၢ်စူၢ်တၢ်နာ်ဒီးတၢ်အိၣ်မူမၤထွဲအီၤ လၢပှၤခရံာ်ဖိတဖၣ်အတၢ်အိၣ်မူအပူၤအဂီၢ်န့ၣ်လီၤ. လံာ်အံၤအိၣ်လၢပှဲၤဒီးစီၤပီလူးအတၢ်ပာ်ဖျါအလၢ အပှဲၤဘၣ်ဃးအတၢ်ကစီၣ်လၢအသးအိၣ်ဟ့ၣ်နီၤလီၤဝဲ တဖၣ်န့ၣ်လီၤ.
အဝဲဆၢဂ့ၤဆၢဝါတၢ်အိၣ်ဖှိၣ်လၢဝ့ၢ်ရိမ့ၤဒီးတဲဘၣ် အဝဲသ့ၣ်လၢကဘါထုကဖၣ်လၢအဝဲသ့ၣ်အဂီၢ်ဝံၤဒီး, စီၤပီလူးပာ်ဖျါအလံာ်အတၢ်ဂ့ၢ်မိၢ်ပှၢ်လၢအမ့ၢ်ဝဲ, “တၢ်သးခုအကစီၣ်လီၣ်ဖျါထီၣ်ကစၢ်ယွၤအတၢ်ပာ်တီ ပာ်လိၤပှၤကညီဒီးအကစၢ်ဒၣ်ဝဲဒီးမၤဝဲခီဖျိတၢ်စူၢ်တၢ်နာ်, စးထီၣ်လၢအခီၣ်ထံးတုၤလၢအကတၢၢ်န့ၣ်လီၤ” (ရိမ့ၤ ၁:၁၇).
ဝံၤဒီးစီၤပီလူးတဲဖျါအါထီၣ်တၢ်ဂ့ၢ်မိၢ်ပှၢ်ဝဲအံၤန့ၣ်လီၤ. ပှၤဟီၣ်ခိၣ်ဖိခဲလၢာ်, ယူဒၤဖိတဖၣ်မ့ၢ်ဂ့ၤ, ပှၤကလုာ်ဂၤ တဖၣ်မ့ၢ်ဂ့ၤ, လိၣ်တၢ်မၤလိၤမၤဘၣ်က့ၤဒီးကစၢ်ယွၤ, မ့ၢ်လၢပှၤခဲလၢာ်အိၣ်လၢတၢ်ဒဲးဘးအစိကမီၤအဖီလာ် အဃိန့ၣ်လီၤ. ပှၤခဲလၢာ်ဘၣ်တၢ်မၤလိၤမၤဘၣ်က့ၤဒီး ကစၢ်ယွၤခီဖျိတၢ်နာ်လၢယ့ၣ်ၡူးခရံာ်အပူၤအဃိန့ၣ်လီၤ.
ဝံၤဒီးစီၤပီလူးပာ်ဖျါတၢ်မူအသီလၢခရံာ်အပူၤလၢ အအိၣ်ထီၣ်ဝဲခီဖျိတၢ်ရ့လိာ်မုာ်လိာ်အသီဒီးကစၢ်ယွၤ န့ၣ်လီၤ. ပှၤစူၢ်က့ၤနာ်က့ၤတၢ်အိၣ်ဒီးတၢ်ဃူတၢ်ဖိးဒီး ကစၢ်ယွၤ, ဒီးဘၣ်တၢ်မၤထူၣ်ဖျဲးအီၤလၢကစၢ်ယွၤအသး လၢတၢ်ဒဲးဘးဒီးတၢ်သံအစိကမီၤအဖီလာ်န့ၣ်လီၤ. လၢအဆၢဒိၣ် ၅-၈ န့ၣ်, စီၤပီလူးကတိၤသကိးတၢ်ဘၣ်ဃး ကစၢ်ယွၤအတၢ်သိၣ်တၢ်သီအတၢ်တိာ်ဒီးကစၢ်ယွၤအသး အစိကမီၤလၢပှၤစူၢ်က့ၤနာ်က့ၤတၢ်အတၢ်အိၣ်မူပူၤန့ၣ်လီၤ. ဝံၤဒီး, စီၤပီလူးကျဲးစၢးစံးဆၢတၢ်သံကွၢ်လၢ ပှၤယူဒၤဖိဒီးပှၤကလုာ်ဂၤတဖၣ်နုာ်လီၤဘၣ်လၢ ကစၢ်ယွၤအတၢ်ရဲၣ်တၢ်ကျဲၤလၢပှၤဟီၣ်ခိၣ်ဖိအဂီၢ်ဒ်လဲၣ် အဂ့ၢ်န့ၣ်လီၤ. အဝဲထံၣ်သ့ၣ်ညါဝဲလၢပှၤယူဒၤဖိတဖၣ် အတၢ်တတူၢ်လိာ်ယ့ၣ်ၡူးအံၤမ့ၢ်ယွၤအတၢ်ရဲၣ်တၢ်ကျဲၤ တနီၤလၢကထုးဖှိၣ်က့ၤပှၤဟီၣ်ခိၣ်ဖိခဲလၢာ်လၢကတုၤဃီၤ ဘၣ်လၢကစၢ်ယွၤအဘျုးအဖှိၣ်လၢယ့ၣ်ၡူးခရံာ်အပူၤအဂီၢ် န့ၣ်လီၤ. ဒီးအဝဲနာ်စ့ၢ်ကီးဝဲဒၣ်လၢပှၤယူဒၤဖိတဖၣ်တမ့ၢ် လၢအကသမၢယ့ၣ်ၡူးထီဘိဘၣ်န့ၣ်လီၤ.
လၢခံကတၢၢ်န့ၣ်, စီၤပီလူးကွဲးတၢ်ဘၣ်ဃးတၢ်ကဘၣ်အိၣ်မူ ခရံာ်ဖိအတၢ်အိၣ်မူဒ်လဲၣ်, လီၤဆီဒၣ်တၢ်ဘၣ်ဃးဒီးတၢ်အဲၣ် တၢ်ကွံအကျဲလၢတၢ်ရ့လိာ်မုာ်လိာ်ဒီးပှၤအဂၤတဖၣ်န့ၣ် လီၤ. အဝဲယၢၤထီၣ်စ့ၢ်ကီးတၢ်ဂ့ၢ်အဂၤတဖၣ်ဘၣ်ထွဲဒီး တၢ်မၤယွၤအတၢ်မၤ, ပှၤခရံာ်ဖိတဖၣ်အမူအဒါဘၣ်ထွဲဒီး ထံကီၢ်မ့ၢ်ဂ့ၤ, ဘၣ်ထွဲဒီးပှၤကဒဲကဒဲမ့ၢ်ဂ့ၤဒီးတၢ်သံကွၢ် တဖၣ်ဘၣ်ထွဲဒီးသးလၢအသ့ၣ်ညါဒၣ်တၢ်န့ၣ်လီၤ. အဝဲမၤကတၢၢ်က့ၤအလံာ်ပရၢလၢအနီၢ်ကစၢ်ဒၣ်ဝဲအတၢ် ကစီၣ်တဖၣ်ဒီးတၢ်ကတိၤစံးထီၣ်ပတြၢၤကစၢ်ယွၤန့ၣ်လီၤ.
လံာ်အတကွီၣ်
တၢ်ကတိၤလၢညါဒီးတၢ်ဂ့ၢ်မိၢ်ပှၢ် ၁:၁-၁၇
ပှၤကညီလိၣ်ဘၣ်တၢ်အုၣ်က့ၤခီၣ်က့ၤ ၁:၁၈-၃:၂၀
ယွၤအကျဲလၢတၢ်အုၣ်က့ၤခီၣ်က့ၤအဂီၢ် ၃:၂၁-၄:၂၅
တၢ်အိၣ်မူအသီလၢခရံာ်အပူၤ ၅:၁-၈:၃၉
အံၣ်စရ့လးလၢယွၤအတၢ်ရဲၣ်တၢ်ကျဲၤအပူၤ ၉:၁-၁၁:၃၆
ပှၤခရံာ်ဖိအသကဲာ်ပဝး ၁၂:၁-၁၅:၁၃
တၢ်ကတိၤလၢခံဒီးတၢ်ဆၢဂ့ၤဆၢဝါတဖၣ် ၁၅:၁၄-၁၆:၂၇
Currently Selected:
ရိမ့ၤ တၢ်ကတိၤဆှၢနုာ်: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.